92
Anutu e tiŋnere gie baekac irec mumuteŋ dâŋ
1 Wofuŋ daŋge ââzâcne i wiac furi sâko,
Femicne sâko ʒâŋege mumumbiaŋke i aŋacne.
2 Furicte aki anonocge mutaniŋkezo,
â ŋafeo jauŋ fârige musokazo.
3 Ehuc gita mucne teŋzi musi bahuc woŋgâŋ qazo,
erâ wâc kulele fâze sarickehuc fâzezo.
4 O Wofuŋ, go gie batec honerâ bunane biaŋkekac,
megere qâreŋ honehuc ʒeri gae heekopac.
5 O Wofuŋ, go gie baekic i qeŋ bipinehec,
mamanasuge i qame hukicne jâmbâŋ!
6 Ŋic maŋ tâmiriczi kâuc baekac,
mutucnezi sâcne mi mana taraekac.
7 Ŋic sindaŋne jaŋe kecɋaŋ iŋucne fua ɋârâŋkehuc,
â sâqocne bapa jaŋe fua biaŋ eipiehuc
sifu sisipiric sanaŋte biŋe eeŋgopieŋ;
8 ehame, Wofuŋ, go ine faic jusanaŋkerâ jucmu.
9 Eme jei, Wofuŋ, râsifâcge jaŋe siroweniŋmu,
â sâqocne bapa jaŋe tâtie‐fâreniŋmu.
10 Go ine tâpiri‐nane kâte bulimakaore iŋucne râemeŋ,
goki wokemaŋ ɋâricne rua‐naremeŋ.
11 Ʒâŋe‐nanezi râsifâcne‐nane waha jopame honec‐jopakopac;
â sâqocne bapa qaisocnueŋgopieŋ
jaŋe wiac hâhâwicne fua‐jareme
hazec‐nanezi biŋene manakopac.
12 Tiŋne jaŋe hâmu jâcne iŋucne fua biaŋ eeŋgopieŋ,
Lebanoŋ tikire jâmâzâc iŋucne fua sokac eeŋgopieŋ.
13 Jaŋe Wofuŋte ficko sarac‐jopakicnere
Anutu‐nâŋecte hae ʒoŋao fua biaŋ eeŋgopieŋ.
14 Jaŋe raŋɋaŋke‐bipiehuc fâri bâfuaeŋgopieŋ,
maŋopâ‐jeŋic fofo sanaŋ â rehac‐jeŋic qacfirichec.
15 Izi Wofuŋte siocmâc juju mutaniŋkeekac;
e qânâ sanaŋ‐nane, â hehesic moc erao mi fokac.