95
Mumuteŋ dâŋ â uŋdâŋ
1 O warepie Wofuŋ gae hecnenaŋ,
huec sanaŋ â bâbâpiaŋ‐nâŋec
ʒeri fânâŋ sâko ecnenaŋ.
2 Mai‐ticnao fuahuc daŋge âzâcnenaŋ,
mumumbiaŋ gae hecnehuc kiwaecnenaŋ.
3 Wofuŋ e hâcne Anutu sâko,
erâ nemu sasawa jaŋere Femicne sâko.
4 Ere meo mâreŋ wâcne wâcne fokac,
â tikine tikine i ere jaha.
5 Hâwec i wâc ere, eki hâcne bawec,
â mâreŋ kereŋne i menezi ba akic ewec.
6 O warepie e sâsehuc dapecnenaŋ,
Wofuŋ bâbâfua‐nâŋec ere maio dieŋzi henaŋ.
7 E hâcne Anutu‐nâŋec, â nâŋâc sapa‐ticnere ŋicguru,
erâ wâc ere mere lamafâc juŋgopeneŋ.
Ŋoŋe miŋecgac hâcne dâŋticne mananʒapiŋ me!
8 Meriba opâo maŋsanaŋ ekicne iŋuc mi enʒepieŋ,
erâ ʒoaŋ moc Masao, mâreŋ tuhuo embiŋ.
9 Mimiŋnefâc‐ŋeŋic jaŋe dameŋ ira esâicnumbiŋ,
i wiac bapa‐nane hone‐bipiehuc embiŋ.
10 No jara 40 ŋicguru i jaŋere takicnuhuc juwec,
eme mupo, “Ŋic i jaŋe maŋjeŋic qac qâsoricne,
jaŋe hata‐nane moc mi hone manac eŋgopieŋ.”
11 Iŋucte kimbeŋ qajarehuc mumupaŋ dâŋ ʒiŋuc mupo:
“Jaŋe nore jujumana hae mâreŋko moc mi raʒinʒepieŋ.”