94
Anutu e kikefuŋte râsifâc okacne jareocte mitiŋiczi numuwec
1 O Wofuŋ, okac babazu Anutu,
okac babazu Anutu, go fua tâcnec!
2 Mâreŋte mumutara go faharec,
ŋic maŋfefe eebapa‐jeŋicte okacne jarec.
3 O Wofuŋ, ŋic sindaŋne jaŋe kiwac qawac eku
mo dameŋko beheniŋte mukic?
4 Jaŋe sahac fefe ehuc penaroŋ eeŋgopieŋ,
erâ pepecdâŋ mueŋgopieŋ, sâqocne bapa jaŋe.
5 O Wofuŋ, jaŋe gurufâcge ro waha âte ejareeŋgopieŋ,
â merâfâcge ba sipiric ejareeŋgopieŋ.
6 Jaŋe hozec erâ mafa fisikicne qa jâpec ejareeŋgopieŋ,
â bekâ ine qâhâmoc‐jopaeŋgopieŋ.
7 Ehuc mueŋgopieŋ, “Wofuŋ e mi honekac,
Jakobore Anutu e mi manakac.”
8 Ŋic maŋ tâmiric jâmbâŋ ŋoŋe mana jaŋgeŋkeniŋ me!
Mutucne ŋoŋe wezimucko mamanahec eniŋmu?
9 Hazec râewec e dâŋ mi manaekac me?
Ʒâŋe ba akic ewec e wiac mi honeekac me?
10 Ŋicguru bâtiŋ‐jopaekac e kâcbiŋ mi bajukac me?
Eki hâcne ŋic mamana qazu‐jareekac i!
11 Wofuŋ e ŋic maŋ mamanasu‐jeŋicte kâuc mi baekac,
nokafere sâc sawa eŋgopieŋ i hâcne manakac.
12 Wofuŋ, go ŋic moctao bâbâtiŋ gie bacmu,
me sâcmutâcge qazucnecmu, ere manape ʒerine ekac.
13 E hâcne ʒârâ hâriŋ dameŋ taracneme jujumana fuacneocmu,
ehame ŋic sindaŋnezi nombâŋko huocmu.
14 Wofuŋ e gurufâcne mi suŋgiŋ‐jopaocmu,
â merâfâcfâcne mi behec‐jopaocmu.
15 Ŋic tiŋne erao mumutiŋ risieocmu hâcne,
eme siocmâc sasawa jaŋe bâjâpeniŋmu.
16 Mozi ŋic sindaŋne râsi ejarehuc no ŋezicnuocmu?
Mozi sâqocne bapa bâsuec‐jopahuc sacfozic enareocmu?
17 Wofuŋzi no mi baficnume muzac,
qâqâtâc‐nanezi biac niniŋ siarereŋ mâreŋko juzac.
18 “Kike‐nanezi âte sowariekac” muhape,
Wofuŋ, gore aki anonoczi âkesiŋnuwec.
19 Maŋnaneo memezac bocjaha fuame,
gore bâbâmiriŋzi âke ɋârecnuekac.
20 Micne bapa sindaŋne jaŋe sâcne gohec ʒâʒâfic eene me?
Jaŋe hâcne mumupaŋ‐jeŋiczi wiac bâsâqoreeŋgopieŋ.
21 Jaŋe ŋic tiŋne ere juju sipirickeniŋte meo roroc eeŋgopieŋ,
erâ ŋic bahacmâc hâmocte biŋe qaŋgopieŋ.
22 Wofuŋzi ine hae sanaŋ‐nane ewec,
â Anutu‐nanezi qânâuŋ‐nane ewec.
23 Eki hâcne hehesic‐jeŋicte okacne bazu‐jareocmu,
â sindaŋ‐jeŋicte erâ bâsirowec‐jopaocmu;
Wofuŋ Anutu‐nâŋeczi bâsirowec‐jopaocmu.