132
Zioŋ tikire nunumu gae
1 O Wofuŋ, Dawidizi neneŋ qâqâreŋ ehuc juwec,
irec manasuzemec.
2 Ehuc Wofuŋ, Jakobore Tâpiri wânʒâŋ go hâcne,
mujomire‐garehuc ʒiŋuc muwec:
3 “No qoruc boze‐naneo biac mi fepemu,
â fofo‐naneo biac mi waha fopemu;
4 no sifu mana takirehuc,
ʒâŋe‐nane guŋ sakarecnepemu;
5 ehuc qanaŋ Wofuŋ gore ŋeŋe hae bâfuapemu,
Jakobore Tâpiri wânʒâŋ go hâcne fic moc bagarepemu.”
6 Oc, nâŋe Efarata haeo,
qorac tapa katapare biŋe manambeŋ,
erâ Jara wâneŋko fârine bâfuambeŋ.
7 Ajoc, warepie ficticnao raʒinaŋ,
kike‐ticnere ââtesiŋko dunduŋ hunaŋ.
8 O Wofuŋ, go fahare ŋeŋemana haegao rac,
go â tâpiri qorac tapa katapage.
9 Taha bapafâcge jaŋe tiŋne juju hepie huzejec,
â mitiŋicfâcge jaŋe ʒeri bari enʒepieŋ.
10 Kiŋaŋŋicge Dawidire erâ,
wokemaŋ ruacnemeŋ e mi suŋgiŋkezemec.
11 Wofuŋzi Dawidi dâŋ moc mujomirecnewec,
dâŋ fârine, moc mi bebehene:
“Gore bifuŋkonec fuaniŋmu jaŋeraonec moc
eri ŋeŋegao hepe ŋeocmu.
12 Ŋokâfâcge jaŋe ʒâʒâfic â sâcmutâc dâŋnane
qazu‐jarepemu i baju sanaŋkeniŋmuo
ine ŋokâfâc‐jeŋic jaŋe iŋuc jaha,
eri ŋeŋegao tatara tâmiric ŋehuc junʒepieŋ.”
13 Jâmbomac Wofuŋzi Zioŋ rowosâewec,
ehuc ira ŋeŋe juju eocte ʒiŋuc muhuc sakarewec:
14 “Ŋeŋemana hae sanaŋ‐nane ʒine hâcne,
irec enarekacte ʒira ŋec juc epemu.
15 No nânâ rowaŋ‐ticne fehuc jambuŋkepemu,
hapetacfâcne gumec‐jopape nâ gapec eniŋmu.
16 Taha bapafâcne tiŋne juju hejarepe huocmu,
â mitiŋicfâc‐ticne jaŋe ʒeri bari eniŋmu.
17 Ira hâcne Dawidi tâpiri‐ticne mupe fahareocmu,
ŋicwofuŋ wokemaŋ ruacnehuc tatamac bâmockecnepo.
18 Râsifâcne mimi qaqa hejarepe huocmu;
ere qizecko ine eridu sâsârehuc ŋeocmu.”