1 Naomi ŋowe‐ticne Elimelec ere soctofaonec ŋic fekicne moc juwec ʒâŋene Boasi. 2 Eme Moabi ŋokac Ruti e Naomi ʒiŋuc âzâcnewec: “Manatec sâckeme gieo rape. Ehuc ŋic moczi mana‐nareme padi fârine qahuc moc moc bâtiripie waha fome ro nusec ezepac.” Eme Naomizi muwec, “Joŋao‐mae go sâcne rac.” 3 Eme e gieo rarâ qa roro ŋic jaŋere râpefuŋko juhuc ro nusec ewec. Nânâ gie i Boasire, â e ine Elimelec ere birionec. 4 Boasi e dameŋ ijaha Betelehem haeonec waha fisirâ qa roro ŋic dâŋ bacjopahuc ʒiŋuc jazawec: “Wofuŋzi ŋoŋehec juzejec.” Mume jaŋe dâŋ kecʒiŋuc bâtikiecnembiŋ: “Wofuŋzi jambuŋguzejec.” 5 Eme Boasizi qa roro ŋic jaŋere soŋaŋ ʒiŋuc wiocnewec: ‘Ŋokac naru keci wenirec?” 6 Wiome qa roro ŋic jaŋere soŋaŋzi micnao rorâ muwec: “I Moabi ŋokac naru, Naomihec Moabi mâreŋkonec warewec e hâcne. 7 E warerâ ʒiŋuc mujec: ‘Sifu mac mana‐narepie qa roro ŋic jaŋere râpefuŋko juhuc padi dâtâc ŋondeŋkonec moc moc wahame ro nusec epe.’ Erâ e furic uupicte warerâ ŋeŋemana tâmiric ʒuʒuhuc jaha ro nusec ekac hâcne.”

8 Eme Boasizi Ruti âzâcne muwec, “Naru‐mae, hazec râerâ manac: Go ʒi beherâ mocko ro nusec ezore mi rahuc kiŋaŋ narufâc‐nane qâtec‐joparâ ʒi jaha juzemec. 9 Jaŋe giegaŋ wena qa roro ehuc juniŋmu i honehuc bâjâpec‐jopazemec. Kiŋaŋŋic jaŋeraonec moczi wiac i me i egarezacte muac‐jopakopâc. Erâ opare egareme ŋicmotec jaŋe fiambieŋ i sâcne rarâ nâzemec.” 10 Iŋuc âzâcneme Ruti e ʒâŋe maine mâreŋko hetutuckehuc ʒiŋuc âzâcnewec: “No furune warehape fuŋne weniŋucte manatec sâckeha âgo jauŋ enarekomec?” 11 Mume Boasizi dâŋ ʒiŋuc bâtikiecnewec: “Go ŋowege hâmohame juhuc joŋaogerao wiac sasawa ebac emeŋ, erâ neŋgoc mamac â hae mâreŋge behec‐joparâ ŋicguru furune mârâc jaha mi manac‐nâpomeŋ nâŋerao waremeŋ irec binaŋ wâc mâmâc banare‐fârekicne. 12 Wiac sasawa ebac emeŋ irec okacne Wofuŋzi bazu‐garezejec. Israere Anuture fakec rurumaŋko soŋkezo waremeŋ eki hâcne katucne fufusuc bazu‐garezejec.” 13 Eme ŋokac e muwec, “Bomboŋ‐nane, go ehâmo‐nare‐jâmbâŋkekomec i. No gore kiŋaŋ naru mi juhape biac bâmiriŋnuhuc urucnea dâŋ bacnukomec.”

14 Eme nânâ dameŋ maickeme Boasizi ʒiŋuc âzâcnewec: “Ʒira warerâ nânâ gâcne nâc. Ehuc nânâge waiŋko âke uruckerâ nâc.” Eme ŋokac e qa roro ŋic jaŋe ŋembiŋkoa waha ŋewec. Iŋuc eme Boasizi hândâŋ wiac ʒegoc ʒakicne râcneme nâ gapec erâ tiwâne beheme ŋewec. 15 Eme ŋokac e mocwâc ro nusec eocte fahareme Boasizi kiŋaŋŋicfâcne ʒiŋuc jazawec: “Manahapie dâtâc ŋondeŋkonec sâcne rozejec. Erâ moczi mimi qaqa moc mi ecnezejec. 16 Erâ wâc dâtâckekicnaonec gâcne unucke behec epie foha rozejec. Ehame moczi dâŋ moc mi mucnezejec.”

17 Irec Ruti e ro nusec ehuc juha hae owâewec. Eme fârine qaha hândâŋne wahame ro ŋihec eme târu piticne moc fusewec. 18 Eme i ro derâ haeo fisirâ joŋao‐ticne jâutuwec. Erâ nânâ tiwâne bafisiwec i wâc uturâ râcnewec. 19 Iŋuc eme joŋao‐ticnezi wiocnewec, “Go miŋecgac gie wena juhuc ro nusec emec? Hone jauŋ egarejec ere faio jambuŋ fozejec.” Eme Rutizi joŋao‐ticne gie wena ro nusec ewec irec âzâcnerâ muwec, “No miŋecgac ŋic moc ʒâŋene Boasi ere gieo jupac.” 20 Eme Naomizi joŋao‐ticne ʒiŋuc âzâcnewec: “Jukicne â hâmokicne jauŋ‐ticne mi sakare‐jareekac Wofuŋ eki hâcne ŋic e jambuŋkezejec.” Erâ ʒuhuckerâ ʒiŋuc muwec: “Manakic, ŋic e nâhâcne soctofa â babafic moc.” 21 Eme Moabi ŋokac Rutizi ʒiŋuc muwec: “E ʒiŋuc wâc nazajec: ‘Go kiŋaŋ qaqafâc‐nane jaŋehec juhaŋte qa roro dameŋ tara‐fârezejec.’ ” 22 Iŋuc mume Naomizi joŋao‐ticne ʒiŋuc âzâcnewec: “Joŋao‐mae, i sâckekac. Irec mocko ratec moczi wiac moc egarezacte ere kiŋaŋ narufâc jaŋehec sawa juzemec.” 23 Irec Ruti e joŋao‐ticnehec juhuc Boasire kiŋaŋ narufâc jaŋe qâtec‐joparâ ro nusec ehuc juha padi â jacgoŋ qa roro dameŋ tarawec.