1 Eme Naomizi Ruti ʒiŋuc muhuc âzâcnewec: “Joŋao‐mae, no ŋeŋe juju moc bâfua‐garepe juhâmozemec. 2 Manakic, Boasi kiŋaŋ narufâc‐ticne jaŋehec jumeŋ e soctofa‐nâhec jukac hâcne. Erâ e miŋecgac ŋafeo gieficko hândâŋ ba wosâc gie baocmu. 3 Irec go opâ ruarâ tokic ruac. Erâ ŋaqi qorucge biaŋne hetec hume gieficko huzemec. Erâ nânâ opâ‐ticne nâfâreme honehuc ine fuacnezemec. 4 Ehuc waha foocmu fofo‐ticne i hone tâcnezemec. Erâ rarâ kike‐ticnao bilaŋke bafaharerâ waha fozemec. Ehame e wiac i me i ecmurâ gazaocmu.” 5 Eme eki dâŋ ʒiŋuc bâtikiecnewec: “Wiac sasawa mukomec i efârepemu.”

6 Ruti e iŋuc murâ gieficko hurâ joŋao‐ticnezi âzâcnewec sâc efârewec. 7 Eme Boasi e nânâ opâ‐ticne nâqiŋnerâ aŋac faio padi guruckekicne irec heririŋko waha fowec. Ehame ŋokac e kamic kamic rarâ kike‐ticnao bilaŋke bafaharerâ waha fowec. 8 Eme ŋic e ŋafe ʒâʒâŋiŋko ɋârerâ ŋokaczi kike‐ticnao fowec i honerâ fâfârewec. 9 Ehuc muwec, “Go mo?” Mume ŋokaczi dâŋ ʒiŋuc bâtikiecnewec: “No kiŋaŋ naruge Ruti. Irec ŋaqige bâdâmârerâ kiŋaŋ naruge no rufa‐narec. Go soctofa‐nane jukicte iŋuc enarec.” 10 Eme Boasizi muwec, “Naru‐mae, Wofuŋzi jambuŋguoc. Ʒi jauŋ gie bakomec izi mârâc bameŋ i sirickekac. Go ŋicmotec hapetac me mâririhec jaŋerao mi qohotaekic. 11 Irec naru‐mae, go mi hâwicguoc. No wiac irec me irec numu‐naretec sâc garepemu. Nore âgofâc sasawa jaŋe gore ʒiŋuc manaŋgopieŋ: E ŋokac biaŋne. 12 Jâmbomac, soctofage jukopac, erâ soctofage fuŋfuŋ jâmbâŋ ine ŋic moc jukac. 13 Ŋafe ʒi sâcne ʒuhuckerâ fohaŋtec hae fureoc. Eme hae fureme ŋic moczi merâfâc raucguzo murâ furi bacguhuc raucguzejec, mi eocmuo ine noni epemu. I Wofuŋzi manaha mukopac. Irec waha fohaŋtec hae fureoc.”

14 Boasi e ŋokac iŋuc âzâcneme waha kikefuŋ‐ticnao foha hae furewec. Erâ furic uupicte jâmbâŋ faharewec. Iŋuc eme ŋic e ʒiŋuc manawec: “Ŋokaczi gieficko warejec i moczi moc mi manajec.” 15 Erâ muwec, “Rurufage i ro badomac.” Eme badomahame padi fiame arec 6 eme ɋawenao hecneme barâ haeo rawec. 16 Ra joŋao‐ticnerao fisime muwec: “Joŋao‐nane, weniŋuc fuakac?” Mume Ruti e ŋiczi wiac sasawa ecnewec irec binaŋ bacne‐fârewec. 17 Ehuc ʒiŋuc muwec: “Padi arec 6 fia‐narehuc ʒiŋuc muhuc nazajec: ‘Joŋaogerao metariŋ mi risiezemec.’ ” 18 Eme eki ʒiŋuc âzâcnewec: “Joŋao‐mae, wiac weniŋuc jaha fua raocmu i fua taniŋkeocte woŋec juzemec. Ŋic e qâoma mi ehuc miŋecgac jaha bataraocmu.”