4
Boasizi Ruti ŋonâŋ‐ticne rowec
Eme Boasi e ferâ hae ʒoŋao waha ŋewec. Ŋehuc, qanaŋ soctofa fuŋfuŋ jâmbâŋte dâŋ binaŋ ewec ŋic e hâcne fotâcnezo ehame muwec: “Âgo, go ware ʒira waha ŋec.” Mume ŋic e rarâ waha ŋewec. Eme Boasizi haere soŋaŋ ŋic 10 rocjoparâ muwec: “Ʒira waha ŋeniŋ.” Mume waha ŋembiŋ. Iŋuc erâ soctofa fuŋfuŋ jâmbâŋ ʒiŋuc âzâcnewec: “Naomi Moabi mâreŋkonec risiewec e soctofa‐nâhec Elimelec ere mâreŋ dâkâ i qikiŋnehuc furine roocte mukac. Irec no ʒiŋuc muhuc gazazo manasukopac: Haeru â micnefâc‐nâhec ʒi ŋeŋgopieŋ jaŋere maio rozo mukicko furine bazemec, me mi rozo mukicko i wâc nazatec manape. Soctofa moc mi jukac, nâhâc sawa jukoperec.” Mume muwec, “No furine bapemu.” Mume Boasizi ʒiŋuc muhuc âzâcnewec: “Go Naomire meonec mâreŋ furine bacmu dameŋ ijaha Moabi ŋokac Ruti, hâmockicnere hozec hâcne, e mâmâc rozemec. Iŋuc etec ŋic hâmokicnere merâfâc irec rune fuarâ ʒâŋe‐ticne bajume forazejec.” Iŋuc âzâcneme ŋic e dâŋ ʒiŋuc bâtikiecnewec: “Mâcne, no nahacne merâfâc wiac sipirickezipore ro rauc sâcne mi epemu. Noni ro rauc ezapo irec okacne goki ro rauc ec. No sâcne mi epemu.”
Mârâc jaha Israe guruo wiac nareŋ gareŋ â ro rauc ee mâsi moc ʒiŋuc fowec: Nareŋ gareŋ i sanaŋkeocte ŋic moczi kikehuhu‐ticne hetararâ ŋic moc râcne jujec. Eebapa izi ine Israe guruo eebapa sanaŋ‐jeŋic ewec. Irec soctofa fuŋfuŋ jâmbâŋ e “go gahac furi bac” Boasi iŋuc âzâcnehuc kikehuhu‐ticne hetararâ râcnewec. Eme Boasizi soŋaŋ â ŋic ŋokac sasawa ʒiŋuc jazawec: “Ŋoŋe ʒoaŋ ʒira hâcne Elimelec, Kilioŋ â Maloŋ jaŋere wiac sasawa Naomire meonec furi bakopac i hone‐fâreŋgopieŋ. 10 Erâ Moabi ŋokac Ruti, Maloŋte hozec hâcne, e ŋonâŋ‐nane eocte mâmâc rokopac. I ŋic hâmokicne e jahacne mâreŋko â âgofâc‐ticne jaŋerao, erâ hae‐ticnao ere ʒâŋe biŋezi fohuc juocte miŋecgac ŋoŋere maio iŋuc hâcne ekopac.” 11 Iŋuc mume soŋaŋ â ŋic ŋokac sasawa tumaŋnembiŋ jaŋe mâmâc qâtâc hecnerâ ʒiŋuc mumbiŋ: “Hone manac efâreŋgopeneŋ. Ŋokac ficgao fekac e Israe ŋic jaŋere neŋgoc jahec Rahe â Lea jahere sâc eocte Wofuŋzi ehâmocnezejec. Go ine Efarata guruo soka maka ezemec, ehame Betelehem haeo ʒâŋe biŋege musokanʒepieŋ. 12 Erâ gurufâcge jaŋe Judare ŋokâ Perese, Tamazi rowec, ere gurufâc iŋucne enʒepieŋ. Ŋokac naru ʒi Wofuŋzi manacneme naru motec rocjopame iŋuc hâcne fuazejec.”
13 Eme Boasizi Ruti rome ŋonâŋ‐ticne ewec. Eme ehec juhame Wofuŋzi manacneme motec moc kiweckerâ rowec. 14 Eme ŋokac jaŋe Naomi âzâcnerâ mumbiŋ, “Wofuŋ mumbiaŋkezo. E mi behecguhuc âkehoc moc bâfua‐garekac. Irec ere ʒâŋe biŋe Israe guruo biaŋne fohuc juzejec. 15 E hâcne baficguhuc juocmu. Ŋokac qizec ehaŋtec bâmiriŋgume dope mi basacmu. Joŋaoge gore boc ecneekaczi rokac hâcne. E ŋokâ 7 jaŋere sâc sirickehuc jugarekac.” 16 Eme Naomizi motec e rorâ qicticnao râerâ hone jauŋ ecnewec. 17 Eme ŋokac âgofâc‐ticne jaŋe Naomi motec fuacnekac muhuc ʒâŋe‐ticne Obede mumbiŋ. Obede e Isaire mamac, â Isai e ine Dawidire mamac.
18 Peresere oso gitecfâc jaŋere ʒâŋe biri ʒiŋuc fokac: Perese eraonec Hezoroŋ fuawec. 19 Hezoroŋtaonec Ram, Ramtaonec Aminada. 20 Aminadaraonec Nasoŋ, Nasoŋtaonec Salamoŋ. 21 Salamoŋtaonec Boasi, Boasiraonec Obede. 22 Obederaonec Isai â Isairaonec ine Dawidi.