SALOMORE GAE
SALOMORE GAE i mumumbiaŋ â mumuteŋ gae. Erâ i wemo wiacte hefuakicne i mi fua taniŋkekac â mi mana‐hâmoŋgopeneŋ. Mâc gae wiac izi maŋjauŋ ee mumbiaŋkekac i ine fua taniŋkekac. Gae i ŋic mocjahazi mi hefuawec, erâ gae i gae mocjaha wâc aricne, i gae wiac 25 me 30 iŋuc qâturekicne tinac ekac.
Ŋic gâcne jaŋe gae irec ʒiŋuc mueŋgopieŋ: Gae i Israe ŋic jaŋe Aigita mâreŋkonec waharâ juwefuhapie Anutuzi maŋjauŋ â hone maiŋ ejarewec irec manasuhuc hefuakicne. Â ŋic gâcne jaŋe ʒiŋuc mueŋgopieŋ: Aricne, i Jesu â kikefuŋfâc‐ticne jaŋe maŋjauŋ eec eeŋgopieŋ irec sâsâc ekac, erâ irec erâ Miti Raŋɋao râekicne fokac. Ŋic gâcne jaŋe ine ʒiŋuc mueŋgopieŋ wâc: I gae jâmbâŋ aricne, i sâsâc wiac moc gae‐ticnehec. Wiac kecʒiŋuc irec sâsâc: Ŋokac naru moc e maŋticne lama soŋaŋ moctao râeme domawec. Ehame Salomo e naru ere ecneme mume ŋonâŋ‐ticne eocte erao jowa rambiŋ. Mâc naru eki ine Salomore moc mi ecnewecte qatara sanaŋkewec. Iŋuc ekume Salomozi mocwâc bârisieme hae‐ticnao rarâ lama soŋaŋ hâcne ŋowe‐ticne rowec.
Erâ gae irec fuŋne iŋuc mi mecne fokac. Gae i ŋic ŋokac socɋâri maŋ nareŋ gareŋ, me maŋ rârâe me maŋjauŋ eec ehuc ŋowe ŋonâŋ erâ juniŋte manasuŋgopieŋ jaŋere erâ hefuakicne. Wemocte? Ʒiŋuc mananaŋ: Anutu e bâbâfua‐nâŋeczi ŋic ŋokac bâfuac‐jofarâ ʒiŋuc jasawec: “Ɋârichec ehuc fua sawec erâ mâreŋ ŋefusucmahuc ruckenʒepieŋ.” E iŋuc muhuc ŋic ŋokac jahe jambuŋ‐jofaweczi ŋowe ŋonâŋ nâŋâc maŋzi ʒâʒâfic ehuc maŋjauŋ eec enaŋte manasuwec wâc. Irec maŋjauŋ ee â maŋ rârâe i Anuturaonec taha biaŋ moc ekac. Ehame ŋic ŋokac jajahec jahe maŋzi ʒâʒâfic ee â maŋ rârâe ee erâ maŋjauŋ eec ehuc Anutu bâbâfua‐jekic muteŋkenicmu. Iŋuc mananʒepeneŋ. Eme ŋic ŋokac gâcne jaŋe kosa juhuc taha biaŋ i sipirickerâ juhapie miti mamana nâŋâc sifu maŋjauŋte â maŋ rârâere manapene Anuturaonec taha biaŋ ekac ezejec. Eme irec hâcne maŋjauŋ â maŋ rârâe gae wiac iŋucne mitio wâc fuame manapene sâckekac.
1
1 Salomore gae fekicne ʒine hâcne.
Ŋokac ŋic biŋe qakicne e Jerusalem haeo fisiwec
2 Ei, go masugezi muducnucte enarekac.
Maŋjauŋgezi waiŋ opâ sirickerâ aŋacne eekac.
3 Rurua wokemaŋ opâge i âsu biaŋ‐ticnehec,
â ʒâŋe biŋege i opâ âsu biaŋ irec sâc,
eme naru jaŋe irec hâcne gore boc ejareekac.
4 Jowacnutec gohec mâmâc gasackerâ ranac.
O ŋicwofuŋ, go ficgao râecnuzemec,
eme nâŋe gore bubiaŋ manahuc ʒeri bari enaŋmu,
ehuc waiŋ opâ mumbiaŋkeeŋgopeneŋ
i sirickehuc go muac baafec egarenaŋmu.
Naru jaŋe gore ejareme sâcke‐jâmbâŋkekac.
5 O Jerusalemte otâfâc,
no sahac‐nane gâpâre‐bipieha sifu hawari biaŋ juekopac.
Sahac‐nane i Kedaŋic jaŋere qoruc boze iŋucne,
erâ Salama ŋic jaŋere fofo qoruc irec sâc.
6 Sahac‐nane gâgâpâc irec boc mi hone sâqorecnuniŋ,
ʒoaŋzi sahac‐nane rikeme iŋuc hâcne eekac.
Hahac ɋafâc‐nane jaŋe aaric mana‐narembiŋ,
ehuc waiŋ gie‐jeŋicte soŋaŋ râecnumbiŋte
no nahacne waiŋ gie hone soŋaŋ mi epo.
7 Joroc biaŋ‐nane, go nazac:
Lamafâcge mâreŋ wena râec‐jopaekic,
â guŋpiticko wena ejaretec fomanaeŋgopieŋ?
No wemocte âgofâcge jaŋere lama guruo
naru qâsoriekicne tinac jupemu?
8 O ŋokac hawari biaŋ mocjaha,
go mi manakicko ine
lama jaŋere kike hata bâjâperâ razemec,
ehuc lama motecfâcge lama soŋaŋ jaŋere
boze heririŋnao râec‐jopazemec.
Ŋic ŋokac biŋe qacjofakicne jahere dâŋ
9 Joroc biaŋ‐nane, no gore manape
Farao keretac‐ticnere becâsicfâc jaŋere sâc ekomec.
10 Maucge erickekicnere boc biaŋkekac,
â upegao eri qoqonaŋ furi sâko râekicne fokac.
11 Nâŋe eri wiac golzi bagarehuc
ŋondeŋnao siliwazi kubu bakicne i mâmâc râenaŋmu.
12 Ŋicwofuŋ e nânâ nâocte waha ŋehame
eri qoqonaŋ‐nanere âsu biaŋzi sâkene babatarawec.
13 Joroc biaŋ‐nane e hâpo heâroŋ enareme
manape ʒariŋ ɋitickekicnezi amec‐naneo fokac tinac ekac.
14 No ere manape Eŋgedi mâreŋte waiŋ gieonec
ʒariŋ âsunehec tinac ekac hâcne.
15 O joroc biaŋ‐nane,
go sahac hawari biaŋ,
go ʒâŋe kereŋ biaŋ‐nane!
16 O joroc biaŋ‐nane,
go sahac hawari biaŋ,
go boc biaŋne jâmbâŋ ekomec.
Manakic, qinʒiŋ geunezi fofo‐nâhec tinac ekac,
17 â jâmâzâc jâczi ficnâhec tinac ekac
erâ wete becʒi wiaczi sâpene â tapane tinac ekac.