2
No Saroŋ mâreŋkonec ʒariŋ moc iŋucne,
erâ wâneŋko firindoac fuaekac irec sâc.
Aricne, joroc biaŋ‐nane e firindoac ʒârâ uupicko fuaekac
irec sâc naru jaŋere ŋondeŋko juekac.
 
Joroc biaŋ‐nane e woraŋjâczi jâc omane jaŋere ŋondeŋko domaekac
irec sâc ŋic socɋâri jaŋere ŋondeŋko juekac.
E maŋjauŋ sâko enarehuc
waiŋ gie‐ticnao jowacnu rawec.
Ehuc waiŋ hândâŋne nareme nâqiŋnepo
â woraŋ gumecnume nâpe bâgunucnuwec,
no ere boc enare sâqorekac i!
Meqana‐ticnezi qizec roŋgâŋ enarewec
â mefâre‐ticnezi hâpocnuwec.
O Jerusalemte otâfâc,
no tiki noniŋ â kâte bulimakao
jaŋerao ɋetickehuc ŋaza sanaŋkepe:
Ŋoŋe joroc biaŋ‐nane kosa mi wiwickeniŋ,
e jahac mana ɋâɋârerâ faharezejec.
 
Mananiŋ! Joroc biaŋ‐nane warekac.
Tikine tikine â facne facne
tara he tara he warekac hâcne.
Joroc biaŋ‐nane e tiki noniŋ iŋucne,
â kâte bulimakao motecnezi ŋicne irec sâc.
Honeniŋ, sac râpenao warejec domakac,
ehuc qâqâtâc kataŋko ʒâŋe fime wefukac.
10-11 Joroc biaŋ‐nane e kecʒiŋuc muhuc nazakac:
“Kogoc biaŋ‐nane, go faharerâ warec.
Manakic, mâmâteŋ dameŋ i tarakac,
â hoe dameŋ i wâc tarakac jaha.
12 Kâteo jâc wiac mocwâc fie âric eŋgopieŋ
â wipe jaŋe dâŋ hawari biaŋne eŋgopieŋ
erâ hapâ jaŋe jâchândâŋko hehefârec ehuc tumaŋneeŋgopieŋ.
13 O joroc biaŋ‐nane,
go nemuja fârinezi woze qeuc eme
â waiŋzi ârickehuc âsu biaŋ fiha
norao warezemec.
14 O kogoc biaŋ‐nane, qânâ â mâreŋ hawecko soŋkerâ juekic
go fua taniŋketec ʒâŋe maige honehape
dâŋetec maracge manazepac,
go ʒâŋe hawarige biaŋne
â marac faŋfaŋ jâmbâŋ jukomec hâcne.
15 Ŋoŋe puruŋ jaŋe ŋafeo fisirâ suc qeuc
me hândâŋ wiac gâcne nâ sipiric ehapie
honec‐joparâ rocjopa‐nârenʒepieŋ.”
 
16 Joroc biaŋ‐nane e nore biŋe eha
noni wâc ere biŋe ekopac,
e lamafâc‐ticne sapa biaŋnao râec‐jopaekac.
17 O joroc biaŋ‐nane,
go hae owâeha nâkumuc ʒorame norao warezemec.
Go tiki noniŋ â kâte bulimakao motecnezi ŋicne
tiki mâreŋko jueŋgopieŋ jaŋere sâc ezemec.