7
1 O naru ŋokac fekicne,
no kike tapegere manape boc biaŋkekac.
Gozi jahecge i qânâ furi sâko irec sâc,
ŋic mamana saric moczi bâfuawec tinac ekac.
2 Funʒuŋge i râqâc oorâŋ iŋucne,
ira waiŋ opâ wiac âsu biaŋhec bâsifuckekicne ŋehuc juekac,
â bururuge i padi sesucne ʒariŋ âsu biaŋzi
râreckehuc domakac irec sâc.
3 Susu jahecge i noniŋ motecne jajahec jahere sâc,
tiki noniŋ motecne funʒuŋ fâri iŋucne hâcne.
4 Upege i ficsanaŋ elefaŋte ʒuŋezi bakicne irec sâc,
â ʒâŋe hândâŋ jahecge i Hesiboŋ haeo
Batarabim sacmotâc ŋifecnao opâ riqic ŋekac iŋucne,
â sâke tetecge i Lebanoŋte ficʒora
Damasko haeopec ŋekac irec sâc.
5 Qizecge i Karamele tiki iŋucne ferâ ŋekac,
â qizec susucge ʒoricne waha domakac i gâgâpâc jâmbâŋ,
ehame ŋicwofuŋzi hone rârâqârehuc maŋticne gorao qohotaekac.
Ŋic ŋokac bibiŋe jahe bubiaŋ mamanac ekopirec
6 O joroc biaŋ‐nane, naru ŋokac hone aŋacne,
sahac hawari biaŋge kereŋ bareŋne.
7 Go fâujâc iŋucne ferâ domakomec,
â susu jahecge jahe fâu fârine irec sâc.
8 No ʒiŋuc mupo: No fâujâc hahaŋko ferâ fârine rohape
susu jahecgezi waiŋ ɋiti iŋucne ezepirec,
â micâsugezi ine woraŋ ââsu irec sâc ezejec.
9 Ehame go arec faio dâŋ nazatec manape
waiŋ opâ aŋac ʒizine nâkâcnepene quŋquŋke tâmiric
biaŋne huekac irec sâc ezejec.
10 No joroc biaŋ‐nanere biŋe,
e nore mâretec ecnekac hâcne.
11 Joroc biaŋ‐nane, go warec,
eme jufu gieo rarâ jâwecjâc fuŋnao guŋ fonac.
12 Hae fureme ine waiŋ gieo rarâ
waiŋ i âpâu‐ticnehec fokac me biac fâuckejec,
erâ bojazaŋ wâc âri qakac me mâc fokac i honezeperec.
Eme no ira hâcne maŋzi ʒâficgupemu.
13 O joroc biaŋ‐nane, ira gâgâsere âsu biaŋ biac fuakac,
erâ jâchândâŋ aŋacne â nânâne fuŋne fuŋne,
raŋɋane â ɋâricne i gore biŋe râe biric efârepo hâcne.