8
Jai, go hahac‐nane fuarâ
neŋgoc‐nanere susu nanʒaŋ me!
Go iŋuc etec muzac no ira me ira bâfuacguhuc muducgupe
ŋic jaŋe mi mana sâqore‐narenʒapiŋ.
Ehame no jowacgurâ neŋgoc‐nanere ficko râecgupe
maŋ rârâec eere fuŋne qazu‐narenʒaŋ.
Ehuc waiŋ opâ wiac âsu biaŋhec bâsifuckekicne
i â mandariŋ opâ gare gumec ezapo.
Ehame meqanagezi qizec roŋgâŋ‐nane ezac,
â mefâregezi hâpocnunʒaŋ.
O Jerusalemte otâfâc,
ŋoŋe joroc biaŋ‐nane kosa mi wiwickenʒepieŋ,
e jahac mana ɋâɋârerâ faharezejec.
Maŋzi ʒâʒâfic i wiac sanaŋne jâmbâŋ
Mâreŋ burocnaonec warehuc joroc biaŋ‐ticne
erao roweckekac e mo?
 
No neŋgocgezi gozi kime rocguwec
woraŋjâc irec fuŋnao wiwicgupo.
Meo fefe mahec rojueŋgopieŋ irec sâc
maŋgao â meombâŋgao râecnuzemec.
Maŋzi ʒâʒâfic irec tâpiri i hâmocte tâpiri
irec sâc sanaŋne jâmbâŋ ekac,
â ʒâŋeruŋzi âgo mi bacnâpoekac
irec sâc jaha mamanauŋheczi jauŋ tâmiric juekac.
Maŋ rârâec ee i wiac fofo sanaŋ,
wiac moczi moc mi bawahaocmu.
Rumi sâkozi sâcne mi jowa raocmu
â opâ sâkozi wâc mi qâuruckeocmu.
I ŋic moczi moneŋ mafa wiac sâko‐ticnezi
furine baocte mume muzac
ine mu ruruc boc ecnenʒapiŋ.
 
Nâŋe qonâŋec piticne moc jukac
e susu‐ticne kucguŋne ŋekac,
irec ŋic moczi biŋe qacnenaŋte ware mume
qonâŋec e weniŋuc ecnenaŋmu?
E qânâsac iŋucne fome
fainao siliwa hendiŋ hecnepene huocmu,
me motâc iŋucne domame
jâmâzâc katapazi foŋkenaŋmu.
10 No qânâsac iŋucne ehape
susu jahec‐nane jahe ficʒora‐ticne irec sâc ferâ ŋekopirec,
ehame honecnume wamane jukopac tinac ekac.
 
11 Salomo e Baali‐Hamoŋ mâreŋko waiŋ gie‐ticne moc fokac,
i ŋic gâcne jaŋe hotâ bajuhuc soŋaŋkeniŋte jarewec,
ehuc fârine fuame ro nâc ehuc furine ru sâc
siliwa moneŋ wâŋ tauseŋ râcneniŋte mujarewec.
12 Nore waiŋ gie i no nahacne biŋe jâmbâŋ,
irec Salomo go moneŋge wâŋ tauseŋ i fogarezo murâ fogarezejec,
â soŋaŋ gie baeŋgopieŋ jaŋere moneŋ 200 fojarezo murâ fojarezejec wâc.
 
13 O ŋokac biŋe‐nane, go jufu gieo juhaŋte
âgofâc‐nane jaŋe dâŋmaracge mananiŋte hazec râeeŋgopieŋ,
irec dâŋ mutec noni maracge manazepac wâc.
 
14 O joroc biaŋ‐nane, go biac ware hofao fuazemec,
ehuc tiki noniŋ me kâte bulimakao motecnezi ŋicne
jaŋe tikio wiac âsu biaŋ fuaekacko jueŋgopieŋ jaŋere sâc ezemec.