1 Ibilangyu otyan chikamiʼn apostoles un bubùulon Jesu Kristu, ked impiyeɏn Apudyus kan chikami biyang un mangipatigammu si tuttuwaʼn chaampun mipatigammu inggala si sala. 2 Ked masapuɏ un pasig mantegochen chi bubùulon si apula. 3 Ked gapu ta bubùulolak kan Jesu Kristu, achipunku chongɏon cha manguisanyu kan sakon willu manguisan cha tagu si korti kan sakon. Ya achipunku kuison chi long-egku. 4 Mampeɏkas chi somsomokku, ngim achipunla pion un ibyegaʼn lappun pulus byasuɏk. Ti Apudyus abus chi maligammu, ked mangamung siya un manguis kan sakon. 5 Ked achi kayu manguis kan cha uchum inggala chumtong chi ustuʼn timpu. Ti siyad uuwayon taku mangulilan Apu takuʼn Jesu Kristu ta siya mangitokweɏ kan cha litataɏu un somsomok ya siya bo mangipakaammu si gegeɏaon chi somsomok.*4:5 Itullongyu Romans 2:16 Ked hachi malayawan Apudyus si kacha osaʼn tagu insigun si tuttuwaʼn killingwala.

6 Susulud, iluseɏk si Apollos ya long-egku si mansampaɏanyu, taplu man-acheɏ kayu kan chikami ta achiyu suplingon chi liigili un kalala, “Achiyu chog-an chi liigili.” Ked achiyu ipaspasweɏ chi osa si mangipabyabyaanyu si osa. 7 Simma langibyegan langatngatu kayu lu cha uchum? Chakampun kamman un si Apudyus chi langatod si losan un awed kan chikayu? Ked puggey un mamaspasweɏ kayu un isun chi achipunyu kabyeeɏan cha awed kan chikayu?

8 Chikayuʼn iCorinth, wechewed cha kasapuɏanyu! Bummaklang kayu! Lambyalin kayu ari ked achipunyu chikami masapuɏ! Bibiɏu otyan lu tuttuwaʼn ari kayu taplu makaturay kami bo kan chikayu! 9 Ti ha somsomokku, isun chi lambyalilon Apudyus chikami un apostoles kabyabyaan kan cha losan. Isumi lakodchongan un mapatoy, ti buyaon cha losan un tagu ya ulay cha angheles. 10 Ked chikami, gapu kan Kristu, kalanchaʼn tuntu kami. Ngim chikayu, kalanyuʼn lalaing kayu si lamatiyanyu! Lakapsut kami, ngim chikayu mangkoscheɏ kayu losan! Am-amsiwon cha tagu chikami, ngim las-oman chikayu! 11 Ulay si sala, mangkukuɏang kami si masapuɏmi un makan ya mailum. Ya lapispissay cha silupmi, ya pampaligatan chikami, ya lappun ustu si inggewanmi. 12 Ked mauungeɏ kami bo un lumabbu si kasapuɏanmi. Ked lu maeɏwagen kami, iluwaluwanmi chicha. Ked ulay lu mapampaligatan kami, alu-alusanmi. 13 Lu man-uguchencha chikami si lawwing, songbyatanmi si bibiɏu. Isumi luut un mibyellu, un lappun kasimbiyala si somsomok cha tagu.

14 Chakampun un siyad maluɏatak kan chikayu ta mabiilan kayu, ngim byegbyegaak chikayu un isun cha aalakku un tagtagopok. 15 Ti ulay lu kalibu-libu cha mangayyuwan si biyegyu kan Jesus Kristu, sakon abus chi pallakaamayu. Ti si lamatiyanyu kan Kristu, lambyalilak un amayu mipagapu si langibyegbyeg-ak si bibiɏuʼn chameg kan chikayu. 16 Ked chawatok kan chikayu ta tuɏachonyu sakon. 17 Ked hachi langibuulak kan Timothy utlat, un imbilangkuʼn tagtagopok un alakku ya mantegod un alak kan Apu taku. Ked ipasomsomokla kan chikayu mangkokopyak un maluɏut kan Jesus Kristu, siya itudtuchuk kan cha losan un mamati si kaili-ili un ummoyak.

18 Awed cha uchum un leɏastug kan chikayu un kalancha pun lu achipulak umali manggeggakay kan chikayu. 19 Ngim lu ipalubus Apudyus, achipun mabyeyeg ked umaliyak utlat. Ked hachi mangagammuwak kan cha halat un mamaspasweɏ, lu awed tuwa kabyeeɏancha willu ha tupokcha gey chi abus un man-uguugud. 20 Ti ha Mampangatan Apudyus, chakampun si mipanggop si ug-uggud taku ngim pallakabyelin Apudyus si biyeg taku. 21 Ked himma un-ulloyonyu? Lu umaliyak, om-omeɏak chikayu si bumaɏuwanyu, willu ipailak chi ayatku ya sayakawku? Awed kan chikayu un mampili!