1 Alla bo ibyegak kan chikayu mipanggop si chilagupyu un ituɏungyu kan cha tagun Apudyus ud Judea. Siyad koonyu imbyegak kan cha mamati si kaili-ili un sakupon chi probinsiya ud Galatia. 2 Ked ha koonyu, bibiɏu lu chiluminggu un kacha osa kan chikayu umiwalin otyan si sin-akkit un kilawachiyala. Ked umungonyu ta achi kayu manchaguchagup lu umaliyak. 3 Ked lu gumatongak, mangwaak bo si suɏat un awiton cha hachiʼn chilutukanyu un mangiyoy ud Jerusalem si ilumungyu, ta awed mangagammuwancha si panggop chi ituɏungyu. 4 Ked lu awatlaʼn sakon chi mangiyoy, ulay kadwaalak kan cha chilutukanyu.

5 Ha somsomokku, inyak umula ud Macedonia asiyak ot umali utlat. 6 Ked lu gumatongak utlat, mabyeyegak lin un inggew kan chikayu, inggala magamput chi agilid. Ked lu magamput, chikayu mampalubbyat kan sakon si uchum un ayak. 7 Ta lu ipalubus Apudyus, piok un mabyeyegak otyan kan chikayu ti lawwingok lu sin-akitan chi makabibiɏulak kan chikayu. 8 Ngim inggewak yan utla Ephesus inggala magamput chi eɏgew chi Pentecost. 9 Ti ulay achu mallawing kan sakon utla, achu wayak un mantudtuchu ti achu cha meɏyed un manchongeɏ.

10 Lu umali si Timothy utlat, ammanyu bo mangiliyon, ti siya bo osaʼn mangkawakawachi para kan Apu Jesus un isuk. 11 Ked ilanyu ta achiyu ak-akiton siya, ked ammanyu tuɏungan taplu bibiɏu mangulilala kan sakon utla, ti uuwayok siya ya cha susulud taku.

12 Lu mipanggop kan Apollos un sulud taku, ilàaɏokku siya ta mibiɏun otyan kan cha uchum un susulud taku un umali utlat, ngim achipun makwa si sala. Ngim umali lu awed wayala.

13 Susulud, man-an-alled kayu ya ipapatiyu pammatiyu. Achi kayu otyan mabiin si pammatiyu ngim ipailayu kilatuledyu. 14 Si losan un koonyu, ipailayu ayatyu si asintataguyu.

15 Susulud, ammuyu mipanggop kan cha Stephanas un simbyeyan, chicha ummulaʼn lamatiʼd Achaia. Ked ammuyuʼn ipapatichaʼn tumuɏung kan cha losan un tagun Apudyus. 16 Ked chawatok kan chikayuʼn susulud, ta potgonyu otyan cha taguʼn kamatchi, ya ulay bo cha losan un makakawachi kan chicha un mansimbi kan Apudyus.

17 Amod chi galasku si ummaliyan cha Stephanas, Fortunatus ya Achaicus, ti lakaan chi amod un ayuk kan chikayu si langitullongak kan chicha. 18 Ked silegegcha bo somsomokku un isun chi lalegagencha kan chikayu. Ked masapuɏʼn ipotpotogyu cha kamatchiʼn tagu.

19 Cha allaʼn mamati un pin-a manchetchetong si kaili-ili un sakupon chi probinsiya ud Asia, pakumustaon chikayu utlat. Ya ulay bo cha Aquila kan Priscila un man-asawa ya losan cha mamati un pin-a manchetchetong ud byeɏoycha, losancha bo pakumustaon chikayuʼn susuludmi kan Kristu. 20 Ya ulay bo cha losan un mamati utla Ephesus, pakumustaoncha bo chikayu. Ked chikayu, lu mampakillumusta kayu, ipailayu otyan chi ayatyu.

21 Sakon si Paul, mismuʼn imak chi langisuɏat si allaʼn alungus chi suɏatku, “Sapay otyan ta bibiɏu kayu utlat.”

22 Lu silu achipun mangayat kan Apu takuʼn Jesu Kristu, kapilitan un machusacha kan Apudyus. Sapay otyan ta chakampun un mabyeyeg ked mangulin si Apu takuʼn Jesu Kristu!

23 Kacheguwan otyan Apu Jesus chitaku losan!

24 Ay-ayatok chikayu losan mipagapu kan Jesu Kristu.