1 Sakon si Peter un osaʼn apostoles Jesu Kristu. Allaya suɏatku kan chikayuʼn lachutukan un tagun Apudyus un liwaɏas kan cha ili-ili ud Pontus, Galatia, Cappadocia, Asia ya Bithynia. 2 Si chamu sigud un chiluchuttukan chikayu kan Ama un Apudyus un mibyeseɏ si sigud un simsimmokla. Ked piolaʼn mambyalin kayu laapudyusan un alakla mipagapu si Ispiritula ta tuttuwaonyu si Jesu Kristu ya lachuɏsan kayu gapu si libukbukan chi chaɏala.

Sapay otyan ta kacheguwala ya mallin-awaon Apudyus cha somsomokyu losan.

3 Machaychayaw si Apudyus un Aman Apu takuʼn Jesu Kristu! Gapu si amod un kachegula, illidchola kan chitaku baruʼn biyeg mipagapu si ummuliyan Jesu Kristu lataguwan. Ked ha lamlama taku illidchon chi allaʼn baruʼn biyeg. 4 Lamlamaon taku un tawichon taku cha kilabyaklang un lichuchulin ud langit un lappun miyisuwala, achipun mayam-an, achipun lumawing kan achipun kumupas. 5 Gapu si pammati, ayyuwalan Apudyus chikayu si pallakabyelinla inggala chumtong chi malaguwala kan chitaku un lisagala un mipaila si alungus chi timpu.

6 Ked gumalas kayu, ulay lu masapuɏʼn chumauy kayu si sin-akitan gapu si achuʼn kalasin chi ligat un mapachasanyu. 7 Ti cha achuʼn ligat un mapachasyu, hachi main-an chi katuttuwaan chi pammatiyu. Ulay chi byalituk mayam-an si apuy. Ked ha pammatiyu lapotpotog lu ha byalituk. Ked masapuɏʼn mapaloklokan chi pammatiyu, ta hachi main-an chi katuttuwaala. Ked gapu si tuttuwaʼn pammatiyu, michayaw kayu ya mipangatu kayu si mangulilan Jesu Kristu. 8 Ked si Jesu Kristu, ulay lu achipunyu intullong, ngim ay-ayatonyu. Ulay si sala, mamati kayu kan siya ulay achipunyu intullong. Ked amod chi galasyu un lappun miyisuwala. 9 Ti ha ibungan chi pammatiyu siya mataguwan chi kalichodwayu.

10 Ha allaʼn mataguwan siya simsimsimmok ya ilad-acheɏn cha propetan Apudyus un langipadtu si kachegu un idchon Apudyus kan chikayu. 11 Ilim-imuscha lu silu ustuʼn timpu un makwaala ya in-ilon bo chi milasilala. Ti ha Ispiritun Kristu un inggew kan chicha, ilun-ulala impakaammu kan chicha mapaligatan Kristu asi ot chi michayawala. 12 Impakaammun Apudyus kan cha propeta un chakampun un bumaɏuwancha cha pin-acha koon ngim bumaɏuwanyu. Libyega kan chikayu mipanggop kan cha alla. Impakaammun cha langibyegbyega si Bibiɏuʼn Chameg, un chicha inchaɏan chi Ispiritun Apudyus un libuun un lampeɏpuʼd langit. Cha allaʼn byaleg chi pionchaʼn maawatan ulay cha angheles.

13 Ked isagalayu somsomokyu un mangwa si pion Apudyus. Man-alled kayu ya popotpotanyu lamlama takuʼn binchisyun un maitod kan chikayu si mangulilan Jesu Kristu. 14 Aalak chikayu kan Apudyus, ked masapuɏʼn tuttuwaonyu siya. Ked achiyu ipalubus chi long-egyu un iturayan cha lawwing un sigud un pipionyu si chaampunyu mangagammuwan si katuttuwaan. 15 Ngim si sala, laapudyusan kayu otyan si losan un koonyu, un isun Apudyus un lappun byasuɏla un langayeg kan chikayu. 16 Ti liigili si ugud Apudyus un, “Masapuɏʼn laapudyusan kayu otyan ti lappun byasuɏk.”*1:16 Leviticus 11:44-45, 19:2

17 Lappun laksigon Apudyus. Kuisola tagu un miyulud si killingwala. Kalanyu, “Amami” lu malluwalu kayu kan Apudyus. Ked lu katlat, masapuɏʼn ibiinyu siya ya potgonyu siya si salaʼn matattaguwanyu utla pita. 18 Ti ammuyu un lawayawayaan kayu si lappun simbilaʼn mambibiyeg un tilawidyu kan cha aappuyu. Ked ha lansakala kan chikayu, chakampun un pilak willu byalituk un makwaʼn mayam-an, 19 ngim ha lansakala ked kapotgen un chaɏan Kristu un libukbuk si latoyala. Ked siya isun chi keɏlilu un lappun pulus lawwikla ya chipiktulaʼn maichatun kan Apudyus. 20 Si chaampun chi lubung makwaan, chilutukan Apudyus si Kristu ta mansakala kan cha tagu, ngim achipun siya lipaila ti bumaɏuwanyu inggala si alungus chi eɏgew. 21 Gapu kan siya lamati kayu, mantegod kayu kan Apudyus un langipauli lalagu kan siya ya langipachayaw kan siya. Taplu ha pammatiyu ya lamlamayu awed kan Apudyus.

22 Ked si sala, gapu si lamotgenyu si katuttuwaan lachuɏsan chi somsomokyu ta man-asiay-ayat kayu un mansusulud si pammati. Ked ha ibyegak, eɏ-eɏtonyu man-aayatyu si losan un somsomokyu, 23 ti liyalak kayu kasin, ked ha baruʼn biyegyu ked chakampun un lampeɏpu si taguʼn mamattoy, ngim lampeɏpu si matattagu ya mallalayun un ugud Apudyus. 24 Kalan chi liigiliʼn ugudla,

Hachiʼn ugud Apudyus ked siya bibiɏuʼn chameg un libyegbyega kan chikayu.