1 Chongɏonyu, chikayuʼn byabyaklang! Man-ibin kayu ya mallangchu kayu gapu si ligat un makwa kan chikayu. 2 Laumas cha bilaklangyu ya amilon cha ataki cha silupyu. 3 Letiyan cha buɏawanyu ya pilakyu. Ked ha laticha siya mampaloklok un chakampun si ustu languseɏanyu si kilabyaklangyu. Ked yam-alon Apudyus cha long-egyu un isun chi apuy ti lan-umung kayu si kilabyaklang si salaʼn alungus chi eɏgew. 4 Achipunyu illidchon cha tangchen cha pilanguyu ya cha lan-aliyonyu si cha payawyu. Man-ibiibincha kan chikayu ked ha lilicha chingngeɏn Apudyus un Mallakabyelin. 5 Chikayu, lalam-ay chi biyegyu utla pita ya gilanggalasyu si byaɏanglaʼn pin-ayu koon. Isuyu byaka un pilalungpuyu cha long-egyu sakbyey un mapeti kayu ti pinpillokyu chi long-egyu sakbyey un chusaon Apudyus chikayu. 6 Kilodchonganyu ya pilatoyyu cha gigillok un lappun kabyasbyasuɏala.

7 Ked chikayuʼn susuludku, masapuɏʼn alusanyu inggala si mangulilan Jesu Kristu. Ilanyu ked cha kauuma un alusancha uwayon chi uchen si man-oskancha si pitacha ya alusancha uwayon chi mamungaan cha immuɏacha asicha ot apiton chi lapotog un bungan chi immuɏacha. 8 Chikayu masapuɏ bon alusanyu. Pakoscheɏonyu somsomokyu ti chanchali mangulilan Apu Jesu Kristu. 9 Susulud, achi kayu man-asiinguk ta achipun Apudyus chikayu kodchongan. Masapuɏʼn ammuwonyu un chanchali timpu un gumatngala ya manguisala si tagu.

10 Susulud, somsomkonyu cha propetan Apudyus un ummoy langibyegbyega si ugud Apudyus. Chicha mansampaɏanyu si kilaalus un mangiyattom si losan un ligat. 11 Ha kilatuttuwaala, pian cha tagu un mangiyalus un mangiyattom si cha ligat. Chingngeɏyu kilaalus Job un ilan-alusala ligat ya ammuyu in-ilon Apudyus un langwa kan siya un kapipian si alungusla.*5:11 Job 1:21-22, 2:10, 42:12-16 Ti malagchegu ya malag-ayat si Apudyus.

12 Ngim ha kapopotgen si losan, susulud, achi kayu mansapata un useɏonyu ngachen Apudyus ud langit willu cha inggew utla pita. Ngim kalanyu “O” lu tuttuwa, willu “Lai” lu chakampun, ta achipun Apudyus chikayu kodchongan.

13 Lu awed mapaligatan kan chikayu? Masapuɏʼn malluwalu kan Apudyus. Lu awed lagalas kan chikayu, masapuɏʼn mangkanta si palagchaychayaw kan Apudyus. 14 Ked lu awed masakit kan chikayu, masapuɏʼn ipaayegla cha pallakayon chi simbyaan ta iluwaluwancha siya ya apɏusancha siya si ngachen Apu Jesu Kristu. 15 Ked gapu si luwalucha un mamaticha kan Apudyus, makaan chi sakitla ti kaalon Apudyus ya pakawalola bo cha byasuɏla. 16 Ked man-asibyega kayu kan cha byasuɏyu ya man-asiluwalu kayu ta maagasan kayu. Ti ha luwalun chi lalintog un tagu ked amod kilabyelinla ya bibiɏu makwaala.

17 Isun propeta Elijah. Siya ked tagu un isu taku. Inggettokla un lalluwalu ta achipun otyan umuchen ot achipun ummuchen si tiɏuʼn tawon ya godwa. 18 Ingkasinla bo lalluwalu ta umuchen ot tuttuwan ummuchen ot tummubu kasin cha muɏa si pita.†5:18 1 Kings 17:1, 18:42-45

19 Susuludku, lu awed osa kan chikayuʼn man-awichela chi katuttuwaan ya awed bo mangiyulin kan siya, ked lansagung kan Apudyus, 20 masapuɏʼn ammuwonyu un lu silu mangiyulin si osaʼn malagbyasuɏ kan Apudyus, ked siya lalagu si malagbyasuɏ si matoyala un mangisila kan siya kan Apudyus ing-inggala ya mapakawan chi amod un byasuɏla.