1 Ked simsimmokku un achipulak umali si sala ti lawingok un maasusu somsomokyu. 2 Ti simma mampagalas kan sakon lu achi chokon kan chikayu? Simman bo in-ilonyuʼn mampagalas kan sakon lu pauyaok chikayu? 3 Ked hachi langisuɏatak si hachiʼn osaʼn suɏatku kan chikayu, ta lemanyu cha koonyu lu umaliyak, ti lawingok un maasusu somsomokyu ti chikayu chi ustuʼn mampagalas kan sakon. Ked ammuk un lu lagalasak si umaliyak, sigulachu boʼn lagalas kayu. 4 Ked chakampun un lalaka hachiʼn laluɏatak kan chikayu, ti amod chi sigeb chi somsomokku, ya mantodtodtod chi luwak un mammammok si pin-ayu koon. Ti ha panggop chi hachiʼn suɏatku, chakampun un lumawingan cha somsomokyu ngim mangipain-ak otyan si amod un man-aayatku kan chikayu.

5 Lu awed biɏunyu un langwa si lawwing, chakampun si somsomokku pewingola ngim ulay bo chikayu ti masintut bo somsomokyu. Ngim chakampun si piok un pachangaɏon chi kamatchi kan chikayu. 6 Umalay chi killingwayuʼn siya kachusaala. 7 Ked ha koonyu si sala, pakawalonyu siya ya segagonyu ta achila iyagey si pammatila. 8 Ked chawatok kan chikayu ta ipailayu un tuttuwaʼn ay-ayatonyu siya. 9 Ti ha osaʼn panggopku si hachiʼn laluɏatak kan chikayu, piok un mangin-in-an lu tuttuwaʼn tuttuwaonyu cha losan un intudtuchumi kan chikayu. 10 Lu awed pakawalonyu, pakawalok bo siya. Ked ammun Kristu un lu awed pakawalok, liwatak bo cha lakabyasuɏala. Killingwak cha katchi ta siya tuɏachonyu si bumaɏuwanyu 11 ta achipun chitaku allilawon ya abyakon kan Satalas, ti tagammu taku kilasikaplaʼn maluntulli kan chitaku.

12 Ha gummatngak ud Troas lambyegbyegaak si Bibiɏuʼn Chameg mipanggop kan Kristu, lasegegak ti liwayaalak kan Apudyus un lambyegbyega udchi. 13 Ngim patungechak lachalagen ti lappun inchesak kan sulud takuʼn Titus. Ot lampakachaak kan cha susulud taku udchi, ot inyak ud Macedonia sington si Titus ot inchesak siyà udchi.

14 Manyamalak kan Apudyus gapu si litipugen taku kan Kristu, ti tuɏungan chitaku si mangɏogen taku si kabusuɏ taku. Ked iluseɏla chikami bo un mangibyegbyega si Bibiɏuʼn Chameg mipanggop kan Kristu si losan un ayanmi. Hachiʼn chameg, ked isun chi byangbyanglun Apudyus un mambyanguwon cha losan un tagu.*2:14 ha allaʼn miyaligela mibyaseɏ si ugalin cha Romans. Lu abyakoncha cha kabusuɏcha, ha pangpangun cha suɏchachu un langabyak, siya mangipangu si suɏchachun laabyak si kesa si ili, ta itullong cha tagu. Gapu ta silupling Paul si kristu si chamu, ibilangla long-egla un osaʼn byaɏud un ilabyak Kristu. 15 Ked chitaku boʼn mamati, isu taku byangbyanglu un inchatun Kristu kan Apudyus un mambyanguwon cha losan un tagu, cha matagu ya cha achipun. 16 Ha malungsungan cha achipun matagu, isu taku mambyangbyangtitan un umtoy. Ngim ha malungsungan cha matagu, isu taku mambyangubyangu un tumagu. Ked silu makabyeeɏ si allaʼn kawachi? 17 Chakampun un isumi cha uchum un ha mangibyegbyeg-ancha si ugud Apudyus, isun chi laku un mangeancha si pilak. Ngim imbuun chikami kan Apudyus, ipapatimi un man-ugud si sangwalanla, un isun chi mansimbi kan Kristu.