1 Awed lin cha mangibyega un ichayawmi long-egmi, ya masapuɏʼn awed ipailamiʼn suɏat kan chikayu un maluttuwaanyu si kilaustumi un mangibyegbyega willu chikayu mangwa si suɏat un mangipain-anmi kan cha uchum ta maluttuwaancha si kilaustumi. 2 Chikayu mismu chi suɏatmi un maluttuwaancha, liigili si somsomokmi taplu mangagammuwancha ya mabyasan cha losan un tagu. 3 Ti chikayu isun chi suɏat Kristu un impakwala kan chikami un mamasaan cha losan un tagu. Ked chakampun un lapis chi langisuɏat ti ha Ispiritun chi matattaguʼn Apudyus. Ked chakampun bo un byetu lisuɏatala ti ha somsomokyu.

4 Ha langibyeg-anmi kan cha alla mantegod kami kan Apudyus mipagapu kan Kristu. 5 Ked lappun itangsitmi un kalanmi un kabyeeɏanmi allaʼn kawachi, ti lampeɏpu kan Apudyus chi losan un kabyeeɏanmi. 6 Ti siya langatod si kabyeeɏanmi un mangibyegbyega mipanggop si baruʼn intuɏeg Apudyus un mataguwan cha tagu. Ked ha baruʼn tuɏeg ked chakampun un isun chi liigili si lintog Moses, ngim gapu si kawachin chi Ispiritun Apudyus. Ti ha liigili un lintog, siyad ipakaammula misilaan chi tagu kan Apudyus si ing-inggala. Ngim ha Ispiritun Apudyus, siyad ipakaammula mataguwan kan Apudyus ing-inggala.

7 Ha langidchen Apudyus si hachiʼn lintog kan Moses si awi, un liigili si hachiʼn byetu, patunged summiling chi lupan Moses si kilasiling Apudyus si summanguwan Apudyus kan siya. Ked ulay lu maumas chi siling chi lupala, achipun makaitullong kan cha galak Israel un mangitutullong kan siya gapu si kilasilingla.*3:7 Exodus 34:29 Ked lu kamatchi kilakoscheɏn chi kilabiɏun chi hachiʼn lintog un lappun uchum si ibungala lu achi abus chi kachusaan chi tagu, 8 singkumoscheɏ kilabiɏun chi kawachin chi Ispiritun Apudyus! 9 Ked lu patunged machayaw chi lintog un machusaan chi tagu, sin-chumadlu bo un machayaw chi mangigetong si mataguwan taku. 10 Ked makwa un kalan taku un gapu ta lasilsiling patunged chi kilachayaw si sala, lataɏak chi kilachayaw si awi. 11 Ta lu machaychayaw chi hachiʼn chamuʼn imbyegan Apudyus un mangkiged, sinchumadlu bo un machayawan chi killingwala si sala ti lappun mangkigachela ing-inggala!

12 Ked gapu si lamlamami mipanggop si simsimmok Apudyus, latuled kami un mangibyegbyega. 13 Ti chakampun un isumi si Moses un sileilala lupala ta achipun cha Israelitas maila maumasan chi siling chi lupala.†3:13 Exodus 34:33 14 Ya isula bo kan cha Israelitas un isun chi latap-ulan chi somsomokcha inggala si sala, isucha lakuɏap. Ti lu byasaoncha chachaan un lintog Moses, achipuncha maawatan chi ibyegala. Ngim kamatchi makmakwa inggala mamati cha tagu kan Kristu ked hachi makaalan chi isun chi abungus un lalap-un si somsomokcha. 15 Ked ulay si sala, lu byasaon cha Judio lintog Moses, isun chi sissiya hachiʼn lalap-un si somsomokcha. 16 Ngim liigili si ugud Apudyus un lu mansagungcha kan Apu taku, makaan chi hachiʼn lalap-un si somsomokcha.‡3:16 Exodus 34:34 17 Ked ha Apu taku un ibyegbyegak, siya Ispiritun Apudyus, ked losan un tagu un inggewala, mawayawayaancha. 18 Ked losan taku un lappun lalap-un si lupala, ipaila taku chi kilabiɏun Apu taku. Ked mipagapu si mangkawachiyan chi Ispiritu kan chitaku, mapabiɏubiɏu taku un miyisu kan siya ta patunged un siya main-an chi kilangatula.