1 Alusanyu otyan sakon ulay isuk chi latingang kan cha allaʼn ibyegak. O, alusanyu sakon. 2 Ti mangimulak kan chikayu un isun chi man-iimun Apudyus lu sabyali patiyonyu. Ti miyalig kayu si mampeɏkas un byebyeɏasang un intuɏegkuʼn miyasawa si ossaan un leɏaki, siya si Kristu. 3 Ngim umogyatak ti maallilaw ked chi somsomokyu ya maawis kayu si sabyaliʼn tudtuchu ked man-awichenyu sipupusu ya mampeɏkas un ayatyu kan Kristu, un isun Eve un silikapan chi uɏog. 4 Ti lu awed umaliʼd utlat un mangibyegbyega si sabyaliʼn Jesus un chakampun un isun chi imbyegbyegami, lalakayuʼn tuttuwaon chicha. Willu lalakayuʼn awaton chi sabyaliʼn Ispiritu lu ha Ispiritun Apudyus un sigud un ilawatyu, willu lamati kayu si sabyaliʼn chameg lu ha imbyegbyegami kan chikayu un pilatiyu. 5 Ngim ammuk un chakampun si labyabyaak lu cha mangkakapotog un apostolesyu. 6 Ulay lu buwatku un man-ugud, ngim chakampun un langkuɏangak si ammu. Impakaawatmi cha alla kan chikayu si losan un timpu.

7 Ked lappun silinginku si tangchenku si langibyegbyeg-ak kan chikayu si Bibiɏuʼn Chameg.*11:7 1 Corinthians 9:3-18 Impabyabyak chi long-egku taplu michayaw kayu. Ha byasuɏ kamma killingwak? 8 Ha laludtuchuwak kan chikayu, tilangchelalak kan cha mamati si uchum un ili, ked isun chi ilakawak chicha taplu matuɏungan kayu. 9 Ti ha illiinggewak kan chikayu, lu awed kasapuɏak achipulak mangkochew kan chikayu, ti langatod cha susulud taku un leɏpuʼd Macedonia si iluseɏk.†11:9 Philippians 4:14-15 Kamatchi killingwak ya kook ti lawwingok un mapaligatan kayu. 10 Ha kilatuttuwaala un awed si Kristu kan sakon, lappun sinlobbong ulay silu kan chikayu ud Achaia un makwaʼn mampagilok kan sakon un mangichaychayaw si allaya. 11 Puggey un ibyegak cha alla? Gapu ta lawwingok chikayu! Ammun Apudyus un ay-ayatok chikayu. 12 Ked ituɏutuɏuyku koon cha pin-ak koon si sala taplu lappun in-ilon cha mangibyegbyegan apostolescha kalu un mampachayaw un man-isu kalu cha pin-acha koon si cha pin-ami koon.

13 Ti cha allaʼn tagu, chakampun un tuttuwaʼn apostolescha. Silan-apostolescha, sikapancha cha tagu si losan un kooncha, ya aginpepeɏangchaʼn apostoles Kristu. 14 Ked achi taku otyan maschaaw, ti ulay si Satalas ked makwa un mampeɏang un isun chi anghel Apudyus. 15 Ked chakampun un lakaskaschaaw lu cha mansimsimbi kan siya ked mampeɏangcha un isun chi mansimbi si katuttuwaan. Ngim ha mambyalagela, machusacha si losan un killingwacha.

16 Isaɏedku ibyega, lappun otyan singkalan kan chikayu un latingangak. Ngim lu katchi kalanyu, alusanyu un chongɏon cha allaʼn mangipachayawak akit si long-egku. 17 Ti agammuk un chakampun kan Apu Jesus chi langibyega un uguchok chi katla kan chikayu, ngim ulay isuk chi latingang ituledkuʼn mangichayaw si kamatla kan chikayu. 18 Ngim gapu ta achu cha mangichayaw si lailubungan un pin-acha koon, hachi bo mampachayawak. 19 Lalaing kayu siya, ked siya mangan-alusanyu si tilitingang! 20 Ti attomanyu cha taguʼn mambyalilola chikayu musassu, willu lukuponcha ya sikapancha chikayu willu amsiwoncha kan lipakoncha chikayu. 21 Ngim tuttuwaʼn mabiilak un mangwa si isun chi pin-acha koon kan chikayu!

Ngim lu awatlaʼn mampachayawcha, maituledku boʼn mangichayaw si long-egku un isuk chi latingtingangan. 22 Lu kalanchaʼn Hebrewcha, Hebrewak bo. Ked lu kalanchaʼn Israelitascha, ulay bo sakon. Ked lu kalancha boʼn chicha galak Abraham, galakak mit bo kan Abraham. 23 Ked lu kalanchaʼn mansimsimbicha kan Kristu, sinchumadlu chi mansimbiyak lu chicha. Isuk chi latingang un man-ugud. Laligat chi kawachi, libyaɏubyaɏuchak ya labyaubyautalak ya achu bo amasku matoyan gapu si mangipapattiyak. 24 Langalliman silapsaplitan cha Judio sakon si sintutlumpuɏu ya siyam un saplit. 25 Ked lamitlu boʼn silapsaplitalak kan cha iRome. Ked lamingsan chi labintukak. Ya lamitlu bo layam-alan chi bapur un lallugalak. Ya lamingsan un lalaptapɏakak si byeybyey si sillabi ya sin-eɏgew. 26 Singkawed chi lakwa kan sakon si lambiyabiyasiyak, langampiga un amasak maalud si chewwang, ked langampiga boʼn amasak mapatoy kan cha akkawan. Ya langampiga boʼn amas cha kailiyak un Judio mangtoyan kan sakon ya ulay bod cha Gentil. Ya achu bod cha kaam-amak si siudad, si lugeɏ un lappun ummili, si byeybyey ya sinchumadlu cha aginpapati un susulud kan Kristu. 27 Launge-ungeɏak ya laligligatak. Pappasig un lapuyapuyatalak, labitibitilak ya lauwauwawak, ya lappun kalok, lappun byeɏoy un masuypak ya lappun silupku. 28 Ked chakampun bo un abus cha hachi, ti biligat un machanchalagelak gapu kan cha losan un mamati un pin-a manchetchetong si kaili-ili. 29 Ta lu awed kumapsut chi pammatila, kumapsutak bo. Ked lu awed masulisug makabyasuɏ, maam-amod chi sigeb chi somsomokku.

30 Lu awed masapuɏʼn pachayawak, siyad ichayawku cha byaleg un mangipaila si kilakapsutku. 31 Ked si Apudyus un Aman Apu Jesus chi machaychayaw chi ngachenla si ing-inggala, ammula un achipulak mantuntulli. 32 Si illinggewak ud Damascus, impabyentay chi gubillachuɏ un chilutukan Ari Aretas chi losan un liwangan chi siudad ta chokmaalak. 33 Ngim cha mamati udchi, inyinchayulak impacheɏa si lasin chi tiluping un aɏed chi hachiʼn ili, ot lakaawichak.