1 Masapuɏʼn ituɏuyku un mangichayaw, ulay lu lappun maitodla. Ked si sala ug-ugguchok cha impain-ilop Apu Jesus kan sakon ya cha impakaammula. 2-3 Awed chi osaʼn lamati kan Kristu un lipangatu ud langit un inggewan Apudyus.*12:2-3 Issan Paul un mangipasweɏ mipanggop si long-egla, ked si in-ilopla, isun chi awed uchum un tagu si ibyegbyegala. Ngim maawatan taku si v. 1 ya 7 un long-egla ibyegbyegala. Simpuɏu ya opat un tawon chi lummaus. Achipunku ammu lu kalichodwala ummoy willu lipati long-egla, si Apudyus abus chi langagammu. Ha ammuk, liiyoy si hachiʼn kabiɏuwan un lugeɏ.†12:2-3 Ha ibyegala si Greek... lipangatu si mikatlun langit. Ha bibliya ibyegala tiɏun langit. Ha kabyabyaan ked awechen cha libuu. Ha mikadwa ked inggewan ilit, cha bituwon ya seɏeg. Ha mikatlu ked inggewan Apudyus. 4 Ked udchi langit, illinggew chi chingngeɏlaʼn achipun Apudyus ipalubus un maugud, un achipun chi tagu maibyega. 5 Ked siya ichayawku allaʼn tagu, ngim achipunku ichayaw chi long-egku ti siyad ichayawku kilakapsutku. 6 Lu piok un mangichayaw si long-egku, mamàila un chakampun un latingangak ti pasig tuttuwa cha losan un ibyegak. Ngim achipunku ichayaw ti issak un awed mangibyegaʼn langatngatuwak lu ha intullongla un killingwak willu chingngeɏla un ilugudku.

7 Taplu achipulak mamaspasweɏ gapu kan cha achuʼn lakaskaschaaw un intullongku kan impalubusla lamaligatan cha anghel Satalas kan sakon ta achipulak mamaspasweɏ. 8 Ked lamitluwok chilawat kan Apu Jesus ta kaalola otyan chi allaʼn ligatku. 9 Ngim ha insongbyatla kan sakon, kalala, “Umalay chi kacheguk kan sika un mangiyalus si halat un ligatlu. Ta siyad mangiklaam si kilabyelinku kumapsutam.” Ked amod chi galasku un mangipasweɏ si kilakapsutku ta magiklak chi kilabyelin Kristu kan sakon. 10 Gapu kan Kristu, lappun kalala kan sakon lu lakapsutak, lu maibibiilak, lu laklak-amok cha ligat, lu mapampaligatalak, lu masuksuklutalak. Ti lu magiklak un kummapsutak, kumoscheɏak ti pakoscheɏola sakon.

11 Isuk chi latingtingangan ngim chikayu chi langipatut kan sakon un lambyalin katchi. Ti chikayu otyan chi mangipasweɏ kan sakon. Ti ulay lu lappun potogku, achipulak ilatiw si ulay silu kan cha langangatuʼn apostolesyu. 12 Ti ha illinggewak kan chikayu, ilalu-alusak cha losan un ligat ta ipailak kan chikayu osaʼn tuttuwaʼn apostoles. Ked achu bo cha killingwalaʼn sinye ya lakaskaschaaw. 13 Ked cha losan un killingwak kan cha mamati si cha uchum un ili, isun bod chi killingwak kan chikayu malaksig chi osaʼn byaleg un achipunyu sakon gilastuwan. Ked pakawalolak otyan lu lawwing chi hachi!

14 Lakasagalaak si sala un umali kasin manggeggakay kan chikayu, ked mikapitluk un umali utlat. Chakampun si mampatuɏungak, ti chikayu mismu masapuɏk chakampun un pilakyu. Ti chakampun un masapuɏʼn cha aalak chi mangatod si kasapuɏan cha aamma ya iilla, ngim cha aamma ya iilla mangatod si kasapuɏan cha aalak. 15 Ked lagalasok ulay gastuwok cha losan un awed kan sakon ya ulay chi losan un koscheɏk para si laispirituan un biyegyu. Ulay kummapsut chi ayatyu kan sakon, maam-amod kumoscheɏ ayatku kan chikayu.

16 Ked umalamung kayu un chakpun lambyalin un pakachegsolanyu. Ngim awed cha mangibyega un silikapak ya ilallilawku chikayu si tilutuli un ugud. 17 Ngim simma in-ilok un lalluku kan chikayu? Ha langgachingak kamma mipagapu si osa kan cha imbuunku kan chikayu? 18 Sakon un mismu langibuun kan Titus un umali utlat, ya imbuunku osaʼn sulud taku un lamiɏun kan siya. Ked lilukucha kamman chikayu? Achipun mit, ti os-ossaan chi Ispiritu un langichaɏan kan chikami ked os-ossaan chi panggopmi.

19 Ha somsomokyu lin inggala si sala, taktakcheɏanmi chi long-egmi kan chikayu. Chakampun, ti abus un uguchonmi cha pion Kristu si sangwalan Apudyus ked losan un koonmi, ay-ayatok un susulud, kooncha losan ta matuɏungan kayu. 20 Ngim machalagelak lu ochesak chikayu un siyad pin-ayu koon cha lawwingok lu umaliyak utlat. Ked kook bo cha achipunyu pion, ti omɏak chikayu lu ochesak chikayuʼn mansusubog, man-iillapos, mallasu sumangaanyu, man-asiimut kayu, man-asikiyap kayu, man-asilikud kayu, man-asipasweɏ kayu, kan lappun timpuyugyu. 21 Machalagelak lu umaliyak kasin, mabiilak kan Apudyus si sangwalanyu lu ochesak chikayu. Machalagelak lu manchachauyak gapu kan cha losan un lakabyasuɏ si lummaus un eɏgew ya achipuncha lambyabyawi si lawwing un kokkooncha ya lakachegchegascha ya cha losan un lawwing un pipion chi long-eg.