1 Sala pamitluk un umali manggeggakay kan chikayu utlat. Kalan chi liigili un ugud Apudyus, “Lu awed ipabyasuɏcha kan chikayu, masapuɏʼn awed chuwa willu tiɏu un tagu un malistigu lu tuttuwa.”*13:1 Deuteronomy 19:15

2 Ha pidwan chi ummaliyak utlat, impatupgak imbyega kan cha lakabyasuɏ ya cha uchum ta iyageycha. Ked ha lappulak kan chikayu, kasinku bo impatupga kan chikayu losan un lappun makailisi si machusaancha si pitluʼn umaliyak. 3 Kook alla ta paloklokak kan chikayu un si Kristu leɏpuwan chi kalobbongak. Ti chakampun un lakapsut si Jesu Kristu un mangwa si koola kan chikayu, ngim ipailala pallakabyelinla kan chikayu. 4 Ti ulay lu kilakapsut Kristu latoyala si krus, ngim latagu gapu si kilabyelin Apudyus. Ked chikami lakapsut kami bo, si lipatiyanmi kan siya. Ngim lu mipanggop si koonmi kan chikayu, ipailami pallakabyelin Apudyus si litimpuyugenmi kan siya si latattaguwala.

5 Kacha osa kan chikayu usigola long-egla ta mangitullongala lu tuttuwa un popotpotala pammatila. Sigulachuʼn ammuyu un awed si Jesu Kristu kan chikayu, malaksig lu chakampun un tuttuwaʼn lamati kayu kan siya. 6 Lamlamaok un maammuwanyu un tuttuwaʼn apostolesak. 7 Iluwalumi kan Apudyus un lappun otyan koonyu si lawwing, chakampun un gapu ta mangɏogenmi ngim gapu ta koonyu ustu, ulay lu isun chi laabyak kami. 8 Ti lappun kalobbonganmi un mallawing si katuttuwaan, ngim alla pallakabyelinmi un mansimbi si katuttuwaan. 9 Magalasan kami lu lakapsut kami ked mangkoscheɏ kayu. Ked ha iluwalumi kan Apudyus miyustu-ustu otyan pammatiyu kan siya. 10 Ked hachi panggopkuʼn mangisuɏat si alla ti lappulak kan chikayu, taplu lu umaliyak utlat achipunku ipaila kalobbongak un malusa kan chikayu. Ti ha manguseɏak si allaʼn kalobbongan un illidchon Apu Jesus kan sakon, ta bumaɏuwanyu, chakampun si mayam-alanyu.

11 Susulud, hachi ibyegak kan chikayu. Otyan ta bibiɏu kayu losan utlat, ya pabiɏuwonyu kachawiyanyu. Siyad isosomokyuʼn abus cha imbyegbyegak kan chikayu. Mantitimpuyug kayu ot mallin-awa kayu. Ked si Apudyus un puun chi ayat ya lin-awa, iinggew kan chikayu.

12 Man-asikumusta kayu un ipailayu ayatyu kan cha biɏunyu. 13 Losan cha allaʼn tagun Apudyus, pakumustaoncha chikayu utlat.

14 Ha kachegun Apu Jesus ya ayat Apudyus ya timpuyug chi Ispiritu awed kan chikayu losan.