1 Sakon si Paul ya biɏunku cha Silas kan Timothy. Allaya suɏatmi kan chikayuʼn mamati un pin-a manchetchetong utlat Thessalonica un lititimpuyug kan Ama takuʼn Apudyus ya Apu takuʼn Jesu Kristu. 2 Iluwalumi ta kacheguwan chikayu otyan kan Apudyus un Ama ya si Apu Jesu Kristu ya palin-awaoncha somsomokyu.

3 Susulud, masapuɏʼn pasig kami manyamayaman kan Apudyus mipagapu kan chikayu. Bibiɏu lu kamatchi cha koonmi ta kumoskoscheɏ pammatiyu ya machogchog-an chi man-asiay-ayatanyu. 4 Ked hachi mangichayawanmi kan chikayu kan cha losan un mamati kan Apudyus un pin-a manchetchetong si kaili-ili un ayonmi, ti ulay mapampaligatan kayu mipagapu si pammatiyu, ya achu bo cha ligligatyu, alu-alusanyu ya ipapatiyu pammatiyu.

5 Hachi maluttuwaanmi un lalintog chi mangkukuis Apudyus kan cha losan un tagu, taplu lumbong kayu si mipatiyanyu si mampangatan Apudyus, ti siya maligligatanyu. 6 Ked gapu ta lalintog chi mangkukuis Apudyus, paligatala cha mamaligat kan chikayu, 7 ya chikayuʼn mapampaligatan un isumi, palin-awaon Apudyus chikayu si ligligatyu si mangulilan Apu Jesus un mampeɏpuʼd langit un kadwaan cha angheleslaʼn mallakabyelin.*1:7 Ha uchum un piolaʼn uguchon si Greek ked kadwaan cha anghelesla un chicha mampaloklok si kilabelinla. 8 Si hachiʼn umaliyala, awed chi gumilegileb un apuy un malusala kan cha achipun mamigbig kan Apudyus ya achipun tumuttuwa si bibiɏuʼn chameg mipanggop kan Jesus un Apu taku. 9 Lappun kiged chi machusaancha, ti misisilacha kan Apu Jesus si ing-inggala. Ked achipuncha maila pallakabyelinla un lappun miyisuwala. 10 Si hachiʼn eɏgew un umaliyala, losan un tagula, chaychayawoncha siya ked maschaaw taku si kila-Apudyusla. Ked michoga kayu ti pilatiyu ugud Apudyus un impakaammumi kan chikayu.

11 Ked hachi pasigmi mangiluwaluwan kan chikayu, ta si Apudyus mambyalilola chikayu tagula un lumbong si mangayagela kan chikayu. Iluwaluwanmi bo ta ichaɏan chikayu si pallakabyelinla un mangwa kan cha losan un bibiɏuʼn pionyu un koon ya gamputonyu cha losan un koonyu mipagapu si pammatiyu. 12 Ta lu kamatchi makwa, michayaw si Jesus un Apu taku mipagapu kan chikayu, ked michayaw kayu bo mipagapu kan siya. Makwa losan cha hachi gapu si kachegun Apudyus ya Apu Jesu Kristu.