1 Susulud, awed chi pionmi un maawatanyu mipanggop si mangulilan Apu takuʼn Jesu Kristu ya ha mitipugen taku kan siya. 2 Achi kayu lalakan magalliwong ya achi kayu machalagen mipanggop si mangngeɏanyu un lagamput kalu lummaus chi eɏgew un mangulilan Apu Jesus. Ked ulay lu kalanchaʼn ha Ispiritun Apudyus kalu langipakaammu kan chicha, willu awed kalu langitudtuchu kan chicha, willu suɏatmi kalu langammuwancha si kamatchi, achiyu tuttuwaon! 3 Achi kayu maallilaw ulay silu mangibyega, ti ha eɏgew un mangulilala, achipun yan gumatong inggala umun-ula umachu cha taguʼn sumupling kan Apudyus. Ked si hachiʼn timpu, lumoswa osa un patunged chi mansusuplingla si lintog Apudyus, un machusa ud impiyeɏlu. 4 Suplingola si Apudyus ya cha losan un silan-apudyus ya cha losan un chayawon cha tagu, ya ipangatula long-egla lu cha losan. Lumlok ked ummamuy si templon Apudyus ud Jerusalem ked iweɏawegla un siya kalu tuttuwaʼn Apudyus!*2:4 Daniel 11:36

5 Ha achipunyu masmasmok cha alla, imbyegbyegak mit kan chikayu si illinggewak utlat. 6 Ked ammuyu lu silu malitippod si hachiʼn malusupling kan Apudyus taplu achipun yan lumoswa inggala chumtong chi ustuʼn timpula. 7 Tuttuwaʼn awed cha uchum un malusupling kan Apudyus ya ha lintogla si sala, ngim hachiʼn osa un patunged malupling kan siya si umaliʼn eɏgew chaampun mipatigammu ya achipun makwa inggala kaalon Apudyus chi malitippod si lumoswaala. 8 Ngim lu makaan, hachi lumoswaan chi hachiʼn patunged malusupling kan Apudyus. Ked hachi umaliyan Apu Jesus ked ha langɏang chi kila-Apudyusla maila ked kakma maabyak chi hachiʼn malusupling ked otoyon Apu Jesus siya si sap-uyla. 9 Ngim sakbyey un maabyak, gapu si kilabyelin Satalas un awed kan siya, mangkangkalasi cha koolaʼn milagro ya lakaskaschaaw un sinyeɏ 10 ya mangkangkalasi bo koolaʼn lawwing taplu siya mangallilawla kan cha tagu un misila kan Apudyus ta machusacha. Ha panggop chi machusaancha ked achipuncha potgon ya patiyon chi katuttuwaan un siya mataguwancha otyan. 11 Ked si Apudyus chi mangichaɏan si somsomokcha taplu maallilawcha ya tuttuwaoncha tuntulli 12 ya makodchongancha losan un machusa, ti achipuncha pilati katuttuwaan, ya siyad gilanggalascha cha killingkingwachaʼn lawwing.

13 Ngim kan chikayuʼn susuludmi un ay-ayaton chi Apu taku, masapuɏʼn pasig kami manyaman kan Apudyus mipagapu kan chikayu. Ti lalipud si chamchamu, chilutukan Apudyus chikayu un matatagu, mipagapu si lamatiyanyu si katuttuwaan ya lambyalilon chi Ispiritun Apudyus chikayu tagulaʼn lapapeɏkas. 14 Ilayagen Apudyus chikayu ta matatagu kayu mipagapu si bibiɏuʼn chameg un imbyegbyegami kan chikayu taplu makabingay kayu si langɏang chi kila-Apudyus Jesu Kristu. 15 Ked susulud, isosomokyu hachiʼn tudtuchun Apudyus un tilawid taku un intudtuchumi kan chikayu si illinggewanmi utlat, ya insuɏatmi bo taplu sigulachuwonyuʼn suɏuton.

16-17 Iluwaluk kan Apu takuʼn Jesu Kristu ya Ama takuʼn Apudyus ta pakoskoscheɏoncha somsomokyu ya tuɏungan chikayu taplu pasig bibiɏu cha losan un koonyu ya ibyegayu. Impailan Apudyus chi ayatla kan chitaku, ya mipagapu si kachegula langidchela si masegagen taku un lappun kigedla ya ha bibiɏuʼn lamlama taku.