1 Timothy, maawatam otyan un lu allà akit chi alungus chi eɏgew, umachu cha ligat utla lubung. 2 Ti sumabyali somsomok cha tagu ti siyad abus si somsomkoncha long-egcha ya laagumcha si pilak. Mansokeɏcha, leɏastugcha, am-amsiwoncha cha uchum un tagu kan achipuncha tuttuwaon cha chachakkeɏcha. Lappun manyamalancha ya achipuncha potgon si Apudyus. 3 Mambyalin un lasukinchaʼn tagu, lappun chegucha si asintatagucha, achipuncha pakawalon ulay silu, mangkiyakiyapcha, lappun alledcha si long-egcha, leɏanggascha, ya isitoncha cha mangwa si bibiɏu. 4 Ulay chi biɏuncha iyibitcha, lappun alledcha, mansokeɏcha, pipioncha ganggalas chi lubung lu si Apudyus. 5 Ipappailacha un awed pammaticha, ngim achipuncha bigbigon chi kilabyelin Apudyus un mamaliw si lawwing un ugalicha. Timothy, achayuwam cha kamatchiʼn tagu.

6 Awed cha uchum un makageyyomcha kan cha mabyebyeyan, ked lu paingsaoncha, allilawoncha cha byebbyebyaiʼn mallasu awischa ya kapsut chi somsomokcha, lakabyasuɏcha ya mansabsabyaliʼn lawwing chi pion chi long-egcha. 7 Cha kamatchiʼn byebyai, pasigcha man-ad-acheɏ ngim achipuncha maammuwan chi katuttuwaan. 8 Ked cha hachiʼn masikap, suplingoncha katuttuwaan mipanggop kan Apudyus, un isun cha Jannes kan Jambres un siluplingcha si Moses. Ti chicha, lawwing chi somsomokcha ya pampaliwa pammaticha. 9 Ngim achipun mabyeyeg, ked maammuwan cha tagu un lalukucha, isun chi lakwa kan cha Jannes kan Jambres.

10 Ngim sika Timothy, tiluɏedlu mantutudtuchuk, mangkokopyak, ha panggopku si allaʼn biyeg, ha pammatik, ha alusku, ha man-aayatku ya ha kilaattomku. 11 Ya ammum bo cha losan un lakwa kan sakon ud Antioch, Iconium ya Lystra, un patungedku lapaligatan. Ngim sileɏaklibyelak kan Apudyus. 12 Ha katuttuwaan, losan un simpion un matagu si laapudyusan un biyeg gapu si litimpuyugen taku kan Jesu Kristu, ked mapaligatan. 13 Ngim cha lawwing ya cha mangallilaw, maam-amodcha allilawon cha tagu ya maallilawcha bo.

14 Ngim sika, ituɏutuɏuylu cha ilacheɏm ya pilatim un katuttuwaan, ti ammum cha kilatatagun cha langitudtuchu kan sika. 15 Somsomkom un malipud si kabyen-oglu, laammuwam cha liigiliʼn ugud Apudyus un siya langisuɏu kan sika mipanggop si mataguwan gapu si pammatim kan Jesu Kristu. 16 Cha losan un liigiliʼn ugud Apudyus, si Apudyus chi langipasomsomok si liigiliyala. Ked miyuseɏ un maludtuchu kan chitaku si katuttuwaan ya siya mambyegbyega kan chitaku un masapuɏʼn mabyaliwan cha lawwing un ugali taku ya mangun-ulan taku kan cha laillachuwan, ya maludtuchu kan chitaku un mangwa si ustuʼn mataguwan. 17 Taplu cha taguʼn Apudyus lappun mangkuɏangancha un mansimbi kan Apudyus, ngim lakasagala taku un mangwa kan cha losan un bibiɏu.