1 Ha ibilinku kan sika, Timothy, si sangwalan Apudyus ya si Jesu Kristu un kasin umali un manturay ya manguis kan cha losan un tagu, latattagu man willu cha langkakatoy. 2 Ibyegbyegam chi ugud Apudyus. Pasigka lakasagala, bibiɏu man willu lawwik un timpu. Awisom chicha ya omɏam cha mangwa si lawwing ya segagom chicha losan. Masapuɏʼn alusam un mantudtuchu. 3 Ti gumatong chi timpu un achipun cha tagu chongɏon chi katuttuwaan mipanggop kan Apudyus. Ti siyad suɏutoncha cha pipion chi long-egcha ya man-ayegcha kan cha achuʼn mantudtuchu ta siyad abus chi ibyegacha cha pipionchaʼn chongɏon. 4 Man-awichencha katuttuwaan ti siyad abus potpotgoncha cha liyaawiʼn is-istoryacha. 5 Ngim sika, masapuɏʼn matingngem chi long-eglu, attomam ulay siluʼn ligat ya ipapatim un mangibyegbyega si bibiɏuʼn chameg ya koom losan cha akomlu un osaʼn mansimbi kan Apudyus.

6 Lu mipanggop kan sakon, gummatong chi uras un michatun chi biyegku un isun chi mailum, ya gummatong chi timpu un malelak si allaʼn lubung. 7 Impapatik un langwa si pion Apudyus si patinggan chi kabyeeɏak, ya tilungpeɏk cha losan un impiyeɏla kan sakon, ya pilopotpotak chi pammatik. 8 Ked liiyala ud langit chi bibiɏu un gunggula un idchon Apu Jesu Kristu kan sakon. Ti siya lalintog un kuis si eɏgew un manguisala kan cha losan un tagu. Ked chakampun un abusak si magunggulaan, ngim losan cha taguʼn meɏyed un manguuway si umaliyala.

9 Timothy, masapsapaka otyan umali utla lu makwa. 10 Ti tilelalak kan Demas ti pipiola cha lailubungan ked ummoy ud Thessalonica. Ked si Crescens, ummoy ud Galatia, ya si Titus, ummoy ud Dalmatia 11-12 Lappun bo si Tychicus ti imbuunku ud Ephesus. Abus si Luke chi awed utla. Ked chegasom si Mark ked igetonglu utla, ti masapuɏk chi tuɏungla si allaʼn kawachik. 13 Ked lu umali kayu, awitonyu pokosku un tilelak kan Carpus ud Troas. Awitonyu bo cha libluk, amod gey cha mansuɏatan ti masasapuɏk.

14 Si Alexander un mamboboseɏ, achu killingwalaʼn lawwing kan sakon. Ked si Apudyus chi mangamung un malusa kan siya gapu si killingwala. 15 Man-alledka bo kan siya ti susuplingola cha itudtuchu taku.

16 Si chamuʼn lasumeɏyaak, lappun ossaan si biɏunku un langitakcheɏ kan sakon, ngim losan cha tilelan sakon. Sapay otyan ta achipun Apudyus pabyasuɏon chicha. 17 Ulay katchi, tiluɏungalak kan Apudyus ti pilakoscheɏla sakon un mangibyegbyega si bibiɏuʼn chameg ta siya mangngeɏan cha losan un Gentil. Ya siya bo lanseɏaklib kan sakon ti amasak mapatoy si hachiʼn timpu. 18 Ammuk un seɏaklibyen Apudyus sakon si losan un lawwing ya eɏala sakon si mampangatalaʼd langit. Ked machaychayaw si Apudyus si ing-inggala.

19 Pakumustaom cha Priscilla kan Aquila ya cha Onesiphorus un simbyeyan. 20 Latelan si Erastus ud Corinth, ked tilelak si Trophimus ud Miletus ti lasakit. 21 Lu makwa, umalika utla ti chaampun umagilid. Cha Eubulus, Pudens, Linus, Claudia ya cha uchum un susulud taku, pakumustaoncha bo sika.

22 Sapay otyan ta iinggew si Apu Jesus kan sika, ya ha kachegula makaawed kan chikayu losan.