1 Sakon si Paul un mansimsimbi kan Apudyus ya apostoles Jesu Kristu. Imbuulak ta pakoscheɏok chi pammatin cha tagun Apudyus un chilutukala, ya tudtuchuwak chicha ta ammuwoncha katuttuwaan taplu laapudyusan chi mambibiyegcha, 2 ked lamlamaon taku biyeg un mallalayun. Ti siya ingkarin Apudyus si sin-eɏgew, ked achipun siya mantuli. 3 Ked si ustuʼn timpu, impakaammula ugudla. Impiyeɏla kan sakon chi allaʼn bilin ta ibyegbyegak si Apudyus un Malagu kan chitaku.

4 Sika Titus, un imbilangkuʼn alakku si pammati. Kacheguwan ya palin-awaon chika otyan kan Apudyus un Ama taku ya si Jesu Kristu un Malagu kan chitaku.

5 Ha gapun chi lalelak kan sika ud Crete ta igamputlu cha kawachi taku utlat ya chutukam cha pallakayon cha mamati si kacha ili un siya imbilinku. 6 Ha pallakayon masapuɏʼn lappun machillawala ya ossaan chi asawala ked cha aalakla masapuɏʼn mamaticha ya achipuncha lauyung kan masukin. 7 Ha pallakayon masapuɏʼn lappun machillawala ti siya piliyeɏn Apudyus un mangichaychaɏan kan cha mamati. Achipun leɏastug willu mallasu sangala willu kabubuuk willu kagugulu willu maagum. 8 Ngim masapuɏʼn malagmangili ya piola cha bibiɏu, laalled, ustu pin-ala koon, mangapudyus ya matingngeɏla pion chi long-egla. 9 Masapuɏʼn popotpotala tuttuwaʼn ugud Apudyus un litudtuchu, ta makwaʼn mambyegbyega si ustuʼn tudtuchu ya mantubngeɏ kan cha sumupling si ugud Apudyus.

10 Ti achu cha mangkasukin un tagu, isun cha uchum un Judio un lamaticha ked ipatutcha mampasogyaton cha mamati, ngim umallilawcha kan cha uchum un tagu ya lappun simbin cha ugudcha. 11 Masapuɏʼn pagingkom chicha ti pepewingoncha cha mabyebyeyan mipagapu si itudtuchuchaʼn adchayuwan si katuttuwaan pigagey lu awed mangeancha si pilak. 12 Osa kan chicha un ibilang cha Cretans un propeta, ked kalala, “Latuli cha iCreta ya laagumcha kan lasachutchaʼn mangkawachi isucha atap un ayam.” 13 Tuttuwa alla. Masapuɏʼn omɏam chicha ta kumoscheɏcha si pammaticha. 14  * 1:14 Achu cha bilin cha Judio mipanggop si makan ya uchum un byaleg un mauseɏyun ibilangcha mampeɏkas willu kaisaw. Ngim imbyegan Jesus un chakampun un makan chi mampakaisaw si tagu ngim ha lawwik un awed si somsomokla. Ked lu mampeɏkas chi somsomok chi tagu, makwan ibilangla losan un makan ya byaleg un mampeɏkas. Mark 7:14-19 and Colosian 2:20-22 lan-awichencha katuttuwaan.Masapuɏʼn achipuncha chongɏon cha istoryan cha iyawiʼn Judio ya achipuncha chongɏon cha bilin cha taguʼn lan-awichencha katuttuwaan. 15 Cha taguʼn mampeɏkas chi somsomokcha, ibilangcha bo losan un mampeɏkas. Ngim cha kaisaw cha somsomokcha ya achipun mamati, pasig kaisaw cha awed si somsomokcha ya tiktikeɏcha. 16 Kalanchaʼn ammucha kalu si Apudyus, ngim achipuncha matakcheɏan siya gapu si pin-acha koon. Kasusuklacha, lappun potgoncha ya lappun pulus kabyeeɏancha un mangwa si bibiɏu.