1 Ngim kan sika, Titus, masapuɏʼn itudtuchum chi ustuʼn tudtuchu. 2 Tudtuchuwam cha mangkalakay ta man-alledcha, lobbongchaʼn mapotpotog, ya tingngeɏoncha pion chi long-egcha. Masapuɏʼn popotpotancha pammaticha kan Apudyus ya man-aayatcha kan cha asintatagucha ya masapuɏʼn maaluscha ulay achuʼn ligat. 3 Ulay bo cha mangkabyakot, tudtuchuwam chicha ta lemancha ugalicha. Achicha mallikud willu kabubuuk. Ngim abus cha bibiɏu itudtuchucha, 4 taplu cha byebyaiʼn kakoskoscheɏcha tagoponcha asawacha ya cha aalakcha, 5 ya tingngeɏoncha cha lawwing un pion chi long-egcha ya mampeɏkasoncha ugalicha. Tudtuchuwam bo chicha ta kooncha biyangcha si byeɏoy, maaluscha ya potgoncha asawacha. Hachi kooncha ta achi maamsiw chi ugud Apudyus gapu kan chicha.

6 Kamatchi boʼn segagom cha bumaru ta tingngeɏoncha long-egcha. 7 Ya sika, Titus chi mismu un mangipaila si losan un mantuɏachencha si bibiɏuʼn angwat, ya si mantudtudchuwam, ipailam un tuttuwa ya ipapatim. 8 Iyustu-ustum cha itudtuchum taplu lappun maamsiwala. Ya bumiin cha mallawing ti lappun maibyegacha si lawwing kan chitaku.

9 Tudtuchuwam cha musassu ta tuttuwaoncha cha simmusassu kan chicha si losan ya kooncha mat-opancha, achicha sumongsongbyat, 10 ya achicha man-akawan chicha. Masapuɏʼn ipailacha un mapiyeɏanchaʼn ustu-ustu, taplu si losan un kooncha, ha litudtuchu mipanggop kan Apudyus un Malagu kan chitaku ked michaychayaw.

11 Ti impailan Apudyus chi kachegula taplu taguwola cha losan un tagu. 12 Ya itudtuchula kan chitaku un masapuɏʼn miyagey cha losan un lawingon Apudyus ya cha lailubungan un pipion chi long-eg. Itudtuchula bo un masapuɏʼn tingngeɏon chi long-eg ya bibiɏuwon takuʼn mangwa si pion Apudyus ya laapudyusan un ugali koon taku si katattagu taku utla pita, 13 si manguuwayan taku si lamlama taku un mipain-an chi kilachayaw Jesu Kristu un kangatuwan un Apudyus taku ya Malagu kan chitaku. 14 Inchuyala long-egla para kan chitaku ta wayawayaala chitaku si losan un kilalawwing ya peɏkasola chitaku un mantagula ta pasig bibiɏu cha koon taku.

15 Itudtuchum cha alla kan cha tagu. Iyuseɏm chi kalobbongam un malegeg ya omɏam cha makabyasuɏ. Achim ipalubus un ak-akiton chika.