1 Chillumtong pu piyasta un eɏgew chi Pentecost, lachagup cha losan un mamati si osaʼn byeɏoy. 2 Hachi ked, kakma inggew chi unguɏ un lampeɏpuʼd langit un isun chi unguɏn chi lapigsan bidbid ot langaliwebweb si byeɏoy un lachagupancha. 3 Ot intullongcha isun chi gileb chi apuy un liwaɏas ya lanchissu si kacha osa kan chicha. 4 Ot ummoy chi Ispiritun Apudyus kan chicha losan ot laidchencha si kilabyelin ot illugichaʼn man-ugud si mansabsabyalin ugud un achipuncha maawatan.

5 Si hachiʼn timpu, inggew cha Judio un mangapudyus un ummiliʼd Jerusalem. Lampeɏpucha si lansabsabyalin ili utla lubung.*2:5 Piolaʼn ibyega, ha nasyun un Rome achipun lampatingga, ti ha somsomokcha chicha abus chi nasyun. 6 Chingngeɏcha pu hachiʼn unguɏ, ummoy cha amod un tagu intullong ot lataegcha ti chingngeɏcha cha mamatiʼn man-ugud si uwachaʼn ugud. 7 Patungedcha laslaschaaw un kangkalancha, “Himmaga in-ilon chi laoy? Chakampun kamman un losan cha allaʼn man-ugu-ugud iGalilee? 8 Mugga in-ilolaʼn kacha osa kan chitaku ked chochongɏola uwalaʼn ugud. 9 Ked awed cha uchum kan chitakun lampeɏpuchaʼd Parthia, Medes, Elam, Mesopotamia, Judea, Cappadocia, Pontus ya Asia, 10 Phrygia, Pamphylia, Egypt ya sakupon Libya un achaliʼd Cyrene. Cha uchum un iRome un langgaggakay utla. 11 Cha uchum Judio, cha uchum Gentil ngim suysuɏutoncha ugalin cha Judio. Cha uchum bo iCreta ya iyArabia. Ked chochongɏon taku losan cha mansabsabyalin ugud un us-useɏoncha un mangibyega si lakaskaschaaw un killingwan Apudyus.” 12 Patungedcha laslaschaaw ya lappun ammucha si pin-acha koon ot lan-asi-imuscha, “Simma pion chi allaʼn uguchon?”

13 Ngim inggew cha uchum un langam-amsiw kan cha mamati un kalancha, “Labuuk cha allaʼn tagu!”

14 Ot summiked si Peter pati cha lasawaɏan un apostoles ot lan-ichakeɏla gingala un lan-ugud, “Kailiyan un Judio ya chikayu losan un ummili utla Jerusalem, chongɏonyu ta ipakaawatku chi pion chi allaʼn uguchon. 15 Kalanyu lin lu labuukcha ngim chakampun si labuukcha, ti achipun chi tagu mabuuk si machigas. 16 Ngim, allaya katungpaɏan chi impadtun propeta Joel si awi, 17 ‘Kalan Apudyus, Ha kook lu chumtong chi alungus chi eɏgew ked ibuunku Ispirituk ta inggew si tagu.

22 Ot intuɏuy Peter un kalala, “Kailiyan un iyIsrael, chongɏonyu allaʼn ibyegak. Impaloklok Apudyus kan chikayu un si Jesus un iNazareth imbuunla gapu si cha lakaskaschaaw ya sinyeɏ un impakwala kan siya. Ammuyu hachi ti utla lakwaala kan chikayu. 23 Si Jesus, sigud un simsimmok Apudyus un ipuɏang kan chikayu ti siya planula si awi. Ked chikayu lamatoy ya langipuɏang kan cha lawwing un tagu ta ilansacha siya si krus. 24 Si lanwayawayaala kan siya si kilabyelin chi otoy, tilagun Apudyus kasin siya ti achipun makwa kilabyelin otoy kan siya. 25 Si awi impadtun Ari David chi imbyegan Jesus,

29 Oli pun kalala, “Susulud, piok un ipakaammu ustu-ustu kan chikayu mipanggop kan Ari David un chachakkeɏ taku. Latoy siya ya lilobon ked si sala sissiya un maila lobonla. 30 Ngim gapu ta osaʼn propeta siya, ammula ingkarin Apudyus kan siya un awed chi osaʼn galakla un man-Ariyon Apudyus un misagulud kan siya.§2:30 Psalm 132:11; 2 Samuel 7:12-13 31 Sigud un ammun David un pauliyon Apudyus taguwon kasin chi hachiʼn galakla ya achipunla byeybyey-an ud Hades ya achipun bo meɏpos chi long-egla, siyad ibyegbyegala Messias un ibuun Apudyus. 32 Si Jesus chi mismuʼn Messias, ti siya tilagun Apudyus kasin ked chikami losan cha mangipakaammu si alla. 33 Lipangatu siyaʼd langit ot un laidchen si kilabyelin*2:33 Ha piolaʼn uguchon si Greek, lipangatu siyaʼd langit ot ummamuy si machuwalan Apudyus. ya kalobbongan Apudyus. Ot si langawatala si Ispiritun Apudyus un ingkarila, si Jesus chi langibuun si Ispiritun Apudyus ta inggew kan chitaku. Cha intullongyu ya chingngeɏyu si sala, ked kingwan chi Ispiritun Apudyus. 34-35 Awed chi inggilin David mipanggop si hachiʼn lipangatuʼd langit un kalala,

37 Chingngeɏn pun cha achuʼn tagu imbyegan Peter, amod chi chachaulicha ot kalancha kan Peter ya cha uchum un apostoles, “Susulud, simma koonmi?”

38 Ot kalan Peter kan chicha, “Losan kayu ked masapuɏʼn mambyabyawi kayu kan cha byasuɏyu ya mampabunyeg kayu mipagapu si kilabyelin ya kalobbongan Jesu Kristu‡2:38 Ha ibyegala si Greek, mampabunyeg kayu si ngachen Jesu Kristu. Itullongyu bo 10:48 ta mapakawan cha byasuɏyu, ya awatonyu Ispiritun Apudyus un idchola kan chikayu. 39 Ti hachi ingkarin Apudyus un idchola kan chikayu ya cha galakyu ya cha tagu si adchayuwan un ili un pililiyalan mantagula.”

40 Ot achu imbyegbyegan Peter kan chicha un kalala, “Masapuɏʼn ilisiyu long-egyu si machusaan cha lawwing un tagu si salaʼn lolap.” 41 Ot achu cha lamati si imbyegan Peter ot lampabunyegcha ot si hachiʼn eɏgew umoy si tiɏullibuʼn tagu lichoga kan cha mamati. 42 Ot impapaticha lan-acheɏ ya siluɏutcha tudtuchun cha apostoles. Litimpuyugcha bo kan cha mamati un malluluwalu ya mangkakakan si tilapay un mammammokancha si latoyan Jesus.

43 Achu cha lakaskaschaaw ya sinyeɏ un impakwan Apudyus kan cha apostoles, ot patunged laschaaw cha achuʼn tagu. 44 Ot intuɏutuɏuy cha losan un mamati un lachagup ya lampàatodcha si kacha osa kan chicha si kukkuwacha. 45 Lan-ilakucha si kukkuwacha ya pitacha ta idchoncha kan cha kadwachaʼn mamati un makasapuɏ. 46 Ileɏgew un intuytuɏuycha un lachagup lan-os-ossaan un lanchaychayaw si templo. Leɏaluscha un pin-a mangkakakan si byebbyeɏoy ot tuttuwaʼn lagalascha. 47 Chilaychayawcha si Apudyus ya masmas-om cha losan un tagu kan chicha. Ot ileɏgew un ichogan Apu kan chicha cha taguwola.