1 Si osaʼn eɏgew, ummoy cha Peter kan John si templo si machema un uras chi malluwaluwan. 2 Si hachi inggew chi osaʼn leɏakiʼn liyalak un lapilay un inggew si kalanchaʼn Bibiɏuʼn Sawang chi templo. Ileɏgew un achangoyoncha iyoy siya ta mampalimus kan cha taguʼn lumlok. 3 Intullongla pun cha Peter kan John un lumlok si templo, lampalimus kan chicha. 4 Intutukkeɏcha siya ot kalan Peter kan siya, “Itullonglu u chikami.” 5 Ot intullongla chicha ti kalala lu awed idchoncha kan siya.

6 Ngim kalan Peter, “Lappun akit pilakku ya buɏawanku, ngim ha awed kan sakon siya idchok. Mipagapu si kilabyelin ya kalobbongan un mampeɏpu kan Jesu Kristu un iNazareth, malidchaɏanka.” 7 Ot iloglen Peter chi machuwalan un imala ot pilasikedla siya ot kakma kummoscheɏ cha ikila. 8 Ot lasaliked ot lampepetuk ot illugilaʼn lalidchaɏan. Oli pun litun-ud kan cha Peter kan John un ummoy si templo ot lalidtidchaɏan ya lampepetuk un lanchaychayaw kan Apudyus. 9 Intullong losan cha tagu siyaʼn lalidtidchaɏan ya lanchaychayaw kan Apudyus, 10 ot immatulancha siya, siya hachiʼn taguʼn ummaammuy un mampampalimus si hachiʼn Bibiɏuʼn Sawang chi templo ot patungedcha laslaschaaw lu simma lakwa kan siya.

11 Si hachi, ummoycha Peter kan John si templo un kalanchaʼn Kallangan Solomon. Likikiwid chi hachiʼn leɏaki kan cha Peter kan John ked sintotodchak cha losan un taguʼn umoy si inggewancha, ti laschaawcha.

12 Intullong pun Peter chicha, kalala, “Kailiyan un iyIsrael, pakayuggey masmaschaaw si alla? Ked payuggey chikami itutukkeɏ un isun chi uwamiʼn kilabyelin willu kilabiɏu chi lampatidchaɏan si allaʼn tagu? 13 Chakampun kan chikami ngim si Apudyus un chilaychayaw cha chachakkey takuʼn Abraham, Isaac ya Jacob. Siya lampalin-awa si allaʼn tagu ta mipaila kila-Apudyus Jesus un lansimbi kan siya utla lubung, ti gilamputla impangatu si Jesus ud langit. Si Jesus, un impuɏangyu kan cha papangat ya ilissanyu si sangwalan Gubillachuɏn Pilate, ulay lu imbyegalan mawayawayaan siya. 14 Lappun byasuɏla ya lalintog, ngim ilissanyu siya ked ingkasinyu chilawat kan Pilate un wayawayaala osaʼn kapapatoy. 15 Ot pilatoyyu mampeɏpuwan chi biyeg, ngim tilagun Apudyus siya kasin ked chikami tistigu si alla. 16 Gapu si kilabyelin chi ngachen Jesus kummoscheɏ allaʼn tagu un itutullongyu ya ammuyu. Ked gapu si pammati kan Jesus lummin-awa chi allaʼn tagu si sangwalanyu losan.

17 “Susulud, ammuk un pilatoyyu pun si Jesus, achipunyu ammu lu silu siya. Ulay cha papangatyu, achipun cha bo ammu. 18 Ngim ha latoyan Jesus, hachi katungpaɏan chi impakaammun Apudyus kan cha losan un propeta, un kalala ha Messiah un ibuunla ked masapuɏʼn manligat ya matoy. 19 Ked chikayu masapuɏʼn mambyabyawi kayu ya mansagung kayu kan Apudyus ta pakawalola cha byasbyasuɏyu. 20 Ti lu koonyu hachi, idchen Apudyus chikayu si koscheɏn chi somsomok ya ibuunla kasin si Jesus un Messiah un chilutukala un manturay kan chitaku. 21 Ngim masapuɏʼn inggew si Jesus ud langit inggala chumtong chi timpuʼn mampabiɏuwan Apudyus kan cha losan, ti siya ingkarin Apudyus si awi kan cha propetala.

24 “Ked losan cha propeta mallugi kan Samuel inggala kan cha lisagsagulud kan siya ked impadtucha mipanggop kan cha makmakwa si sala. 25 Chikayu galak cha propeta ked lipati kayu si katuɏagen un ingkarin Apudyus kan cha aappuyu. Kalan Apudyus kan Abraham, ‘Mipagapu kan cha galaklu, mabinchisyulan cha losan un tagu si losan un ili utla lubung.’†3:25 Genesis 22:18 26 Ked chitakuʼn Judio chi ummulaʼn langibuulan Apudyus si Messiah un chilutukala un mansimbi kan siya, ta binchisyulala chitaku lu man-awichen taku lawwing un kokòon taku.”