1 Si lakaug-ugguchen cha Peter kan John kan cha achuʼn tagu, gummatong cha uchum un papachi, kapitan cha man-aachug si templo ya Saduceo. 2 Summangacha ti cha Peter itudtuchucha ya ibyegbyegacha un ummuli latagu si Jesus, ked losan un matoy umuli cha bo matagu. 3 Ot chilokmaancha chicha ya gapu ta lummaschom, imbyaɏudcha chicha inggala labigat. 4 Ngim achu cha lanchochongngeɏ un lamati. Ot ummachu cha bilang cha lamati un umoy si limallibu si hachiʼn timpu.

5 Labigat pun, lachagup cha papangat cha Judio, pallakayoncha ya mimistulun chi lintog ud Jerusalem. 6 Ot inggew cha Annas un kangatuwan un pachi ya si Caiaphas, John, Alexander ya uchum un agin chi kangatuwan un pachi. 7 Ummoycha illaɏa cha Peter kan John ot pilasikedcha chicha si sangwalancha ot silumeɏyacha chicha un kalancha, “Simma lampeɏpuwan chi kilabyelinyu un lampalin-awa si allaʼn lapilay? Simma ngachen un us-useɏonyu?”

8 Ot langkawachi Ispiritun Apudyus kan Peter ot laidchen si kilabyelin ot kalala, “Chikayun papangat ya pallakayon. 9 Lu sumeɏyaonyu chikami si sala mipanggop si bibiɏuʼn killingwami si allaʼn lapilay ya imusonyu kan chikami in-ilolaʼn lummin-awa, 10 chongɏonyu ta ipakaammuk kan chikayu ya cha losan un taguʼd Israel, un lummin-awa chi allaʼn leɏaki si sangwalanyu mipagapu si kilabyelin chi ngachen Jesu Kristu un iNazareth. Siya hachiʼn illansayu si krus, ngim tilagun Apudyus kasin.

12 “Siya abus un Malagu kan chitaku. Ti lappun uchum si ngachen si intilun chi lubung un imbuun Apudyus un malagu kan chitaku malaksig kan Jesus.”

13 Laschaaw cha Kukunsiseɏ un langitullong si kilateɏod cha Peter kan John, ti ammucha un tagucha un labyabya saedcha un achipuncha lan-acheɏ. O gayam, chicha lituntun-ud un kadkadwan Jesus. 14 Ngim achipuncha misulib chi lakwa ti inggew chi hachiʼn leɏakiʼn lummin-awa un summisiked udchi si cheeg cha apostoles. 15 Ot pileɏawacha cha Peter ta man-uugudcha. 16 Kalancha, “Simma koon taku kan cha allaʼn tagu? Ti ammun cha losan un tagu utla Jerusalem cha lakaskaschaaw un killingwacha ked achipun makwaʼn misulib taku. 17 Si sala og-ogyaton taku chicha ta achipuncha ug-ugguchon kasin kan cha tagu chi mipanggop si ngachen Jesus, pakalawa ta chongɏon cha uchum chi mipanggop kan siya.”

18 Ot ilayagencha cha apostoles kasin ot bililincha chicha un kalancha, “Masapuɏʼn achiyu ikasin ibyegbyega chi ngachen Jesus. Ya achiyu ibyegbyega ya itudtuchu chi mipanggop kan Jesus ulay siluʼn tagu.”

19 Ngim summongbyat cha Peter kan John un kalancha, “Somsomkonyu, lu silu pion Apudyus un tuttuwaonmi, chikayu willu si Apudyus? 20 Ti chikami, achipun makwaʼn iyageymi un mangibyegbyega si cha intullongmi ya chingngeɏmi kan Jesus.”

21 Hachi ked ilog-ogyat cha Kukunsiseɏ chicha kasin ot imbukatcha chicha ti lappun gapun chi manchusaancha kan chicha, ti cha achuʼn tagu chaychayawoncha si Apudyus si lakaskaschaaw un lakwa. 22 Ha leɏakiʼn lummin-awa ked lasuɏuk un opat puɏu tawonla.

23 Libukat pun cha Peter kan John, langulincha si igew cha kadwachaʼn mamati ot imbyegacha kan chicha cha losan un imbyegan cha ap-apun cha papachi ya pallakayon. 24 Chingngeɏn pun cha kadwachaʼn mamati, lan-os-ossaaloncha somsomokcha un lalluwalu kan Apudyus un kalancha, “Mallakabyelin un Apu un langwa si langit ya pita ya byeybyey ya losan un inggew. 25 Illidchon Apudyus mipagapu si Ispiritula cha allaʼn ugud kan Ari David un langibyega,

27 “Ha imbyegan David, ti cha Ari Herod ya Pontius Pilate ya cha Gentil ya cha taguʼd Israel lachagupcha utla Jerusalem ta mantutuɏegchaʼn patoyon si Jesus un lappun byasuɏla un chilutukam siyaʼn Messias. 28 Lakwa losan un killingwacha mipagapu si kilabyelinlu ya ingkodchonglu si awi un makwa. 29 Ked si sala Apu, chongɏom cha iyog-ogyatcha kan chikami ya idchem cha bubùulom si kilateɏod un mangibyegbyega si ugudlu. 30 Ipailam chi kilabyelinlu ta makwaʼn man-agas kami kan cha lasakit ya koonmi cha uchum un lakaskaschaaw mipagapu si ngachen Jesus, un lappun byasuɏla un bubùulom.”

31 Lagamputcha pun lalluwalu, lanyuggayug chi byeɏoy un lachagupancha. Ot langkawachi Ispiritun Apudyus ot laidchen cha losan si kilabyelin ot lateɏodcha un langibyegbyega si ugud Apudyus.

32 Lan-os-ossaan cha losan un mamati si somsomok ya panggopcha. Lappun mangibyegaʼn uwak si kukkuwala ngim id-idchencha losan cha kacha osa kan chicha. 33 Ot gapu si amod un kilabyelin un laatod kan cha apostoles, intuytuɏuychaʼn mantistigu un ummuli latagu kasin si Apu Jesus ot amod chi kachegun Apudyus un laluɏung kan cha losan un lamati. 34 Lappun osà makuɏangan kan chicha, ti cha awed pitacha willu byeɏoycha illakucha, 35 ot illidchoncha ngilala kan cha apostoles ta chicha mangatod kan cha mamati un makasapuɏ.

36 Si hachiʼn timpu, inggew si Joseph, osaʼn Levita un iCyprus. Lingachelancha apostoles siyà Bernabas (piolaʼn uguchon, “Sumegeg”). 37 Illakula pitala ot illidchola ngilala kan cha apostoles.