1 Lansisila kami pun kan chicha, lanlugen kami si bapur ot langawkaw-as kami ud Cos. Labigat pun, ummoy kami ud Rhodes, ot kasin labigat, ud Patara ot udchi lanchissaagenmi. 2 Ot inchesanmi osaʼn bapur un umoy ud Phoenicia, ot lanlugen kami. 3 Si machuwigi, maotapmi ud Cyprus un langoyanmi, ot langawkaw-as kami ud Tyre un osaʼn ili si probinsiyan chi Syria. Lanchissaeg kami udchi, ti siya mangichissaagen chi bapur kan cha keɏgala. 4 Udchi inchesanmi cha uchum un mamati ot illinggew kami kan chicha si pituʼn eɏgew. Gapu si Ispiritun Apudyus ilàaɏokcha si Paul ta achila ituɏuy un umoy ud Jerusalem. 5 Ngim lagamput pu illinggewanmi udchi, intuɏuymi un lambiyasi. Losan cha mamati pati cha byebbyebyai ya cha aalakcha litun-ud kan chikami inggala lichuum kami si teɏanteg. Udchi lampalintuming kami si teɏanteg ot lalluwalu kami. 6 Ot imbyegamiʼn ingkami si kacha osa ot lanlugen kami si bapur ked langulincha si byebbyeɏoycha.

7 Intuɏuymi un lambiyasi ot gummatong kamiʼd Ptolemais un lampeɏpuʼd Tyre, ot lanchissaeg kami. Ot ummoymi gileggakay cha mamati ot illinggew kami kan chicha si osaʼn eɏgew. 8 Ummoyon kami si labigat ot ummoy kami ud Caesarea. Gummatong kami pun udchi, illinggew kami ud byeɏoycha Philip, osaʼn mangibyegbyega si bibiɏuʼn chameg. Siya osa kan cha pituʼn lachutukan ud Jerusalem un tumuɏung kan cha apostoles. 9 Awed cha opat un alaklaʼn byebyeɏasang un mangibyegbyega si ugud Apudyus. 10 Si illinggewanmi udchi si pigaʼn eɏgew, gummatong chi osaʼn propeta un mangngachen Agabus, un lampeɏpuʼd Judea. 11 Ummali kan chikami ot illaɏala sintulun Paul ot siya lamaɏudla si imala ya ikila. Ot kalala, “Allaya imbyegan chi Ispiritun Apudyus, ‘Kamatla bo koon cha Judio ud Jerusalem un mamaɏud si singkuwa si allaʼn sintulun ked impuɏangcha siya kan cha Gentil.’ ”

12 Chingngeɏmi pu alla, ilàaɏokmi kan cha tagu udchi ta achipun umoy si Paul ud Jerusalem. 13 Ngim kalala, “Pakayuggey sin-iibin ya paasusuwon chi somsomokku? Lakasagalaak un mabyaɏud ya ulay pay matoy ud Jerusalem mipagapu kan Apu Jesus.”

14 Gapu ta achipunmi maàaɏok, gummilok kami ot kalanmi, “Otyan lu siyad makwa pion Apudyus.”

15 Achipun labyeyeg chi illinggewanmi ot lansagala kami ot ummoy kamiʼd Jerusalem. 16 Kiladwaan chikami kan cha uchum un mamatiʼn iCaesarea. Gummatong kami pun, illiyoycha chikami ud uwancha Mnason un iCyprus, osa kan cha ummun-ulaʼn mamati ot illinggew kami ud uwacha.

17 Gummatong kami pun ud Jerusalem, amod chi tileɏok cha mamatiʼn lammangili kan chikami. 18 Labigat pun ummoymi kan cha Paul gilaggakay si James. Wechewed cha pallakayon cha mamati. 19 Si pilakumustan Paul chicha, ilug-uggudla cha losan un killingwan Apudyus kan cha Gentil mipagapu si kawachila.

20 Chingngeɏcha pu alla, chilaychayawcha si Apudyus. Ot kalancha kan Paul, “Sulud, pionmi un somsomkom un kalibulibu cha Judio un lamati kan Jesus ked siya iyaangoscha tuttuwaon chi lintog takuʼn Judio. 21 Chingngeɏcha un intudtuchum kan cha Judio un billumɏoy si igew cha Gentil un man-awichen cha lintog Moses. Ibyegbyegam kalu kan chicha un achipuncha sogyatan cha aalakcha willu achipuncha suɏuton cha ugalin cha Judio. 22 Ked simma koon taku lù ta maammuwanchaʼn chakampun si tuttuwa chingngeɏcha, sigulachuʼn chongɏonchaʼn gummatongka. 23 Bibiɏu lu siyà koom cha alla. Awed cha opat kan chikami un lelleɏaki un lansapata kan Apudyus. 24 Mibiɏunka kan chicha si templo ta mampailaka kan pachi ked makakopyaka kan chicha si ugalin mampapeɏkas. Lu magamput, byayachem chi masapuɏcha un peɏtiyon, ta makwa un apulugen pachi uɏucha ta maila un lagamput chi sapatacha.*21:24 v. 23-24, Numbers 6:13-20 Ta ammuwon cha tagu un lappun katuttuwaan chi ugud un chingchingngeɏcha mipanggop kan sika ngim sika mismu ked tuttuwaom chi lintog taku. 25 Ngim kan cha Gentil un lamati, allaya abus cha imbilinmi insuɏat kan chicha un masapuɏʼn tuttuwaoncha. Achipuncha kalon cha michatun si silan-apudyus ya achicha bo kalon chi chaɏa willu cha ischaʼn chi mapseɏn ayam ya achicha makachegchegas.” Allaya cha imbyegan James kan Paul.

26 Labigat pun, lakaoy si Paul kan cha hachiʼn opat un lelleɏaki ot lakakopya si hachiʼn ugaliʼn mampapeɏkas si long-egcha. Oli pun ummoycha si templo, ot imbyegan Paul kan pachi chi eɏgew un magamputan chi ugalichaʼn mampapeɏkas. Ked hachi mampeɏtiyan cha kadwalan opat si michatun ya mampakuskuscha si uɏucha.

27 Alla pun akit un magamput chi pituʼn eɏgew, inggew cha uchum un Judio un lampeɏpuʼd Asia un langitullong kan Paul si templo. Ot silubsubcha cha amod un tagu ta sumangacha, ot chilokmaancha si Paul. 28 Lampakuycha kalan un, “Chikayuʼn iyIsrael! Tuɏunganyu chikami! Ti allaya taguʼn langibyegbyega kan cha tagu un chitakuʼn Judio lawwik ya lawwik bo lintog Moses ya templo taku. Ked si sala ummoyla bo chilimok chi templo taku ti illillokla cha uchum un Gentil.”†21:28 Cha Judio ibilangcha un paliyaw lu lumlok chi Gentil si templocha. Mibyaseɏ si lintog, lu awed Gentil un lumlok udchi, makwaʼn otoyoncha siya. 29 Imbyegacha hachi ti intullongcha si Trophimus un iyEphesus un libiɏun kan Paul si ummoyancha si siudad. Ked kalancha lu illillok Paul siya si templo.

30 Achipun labyeyeg ot lagulu cha tagu ot langgunggulod cha losan ummoy si templo. Ot chilokmaancha si Paul ot giluyuguyudcha impeɏawaʼd lasin ot kakmacha inyolob. 31 Alla oyyan otoyoncha si Paul, mangwa ked chi osaʼn tagu ummoyla imbyega si komander cha suɏchachuʼn iRoma un lagulu cha umili. 32 Kakman chi komander lan-ayeg kan cha kapitan ya cha susuɏchachu ot sintotodchakchaʼn ummoy si inggewan cha amod un tagu. Ot intullong pun cha tagu si komander ya cha susuɏchachula, kakmacha inggilok un malateɏ kan Paul. 33 Oli pun ummoy chi komander chilokmaan siya ot imbilinla un byaɏuchoncha si chuwaʼn kaweɏ. Ot ilimusla kan cha tagu, “Silu tagun alla? Simma killingwala?” 34 Ngim mansabyasabyali ip-ipkawcha ibyega ya amod atingeɏcha. Gapu ta achipun chi komander maawatan chi tuttuwaʼn lakwa, imbilinla kan cha susuɏchachu un itallaycha si Paul ud kampucha. 35 Lichuumcha pun si eɏ-eɏchen chi kampu, impangatun cha susuɏchachu siya ti manggegeyamsan cha amod un tagu gapu si sangacha. 36 Michogchogchog cha amod un tagu un ip-ipkawcha kalan un, “Patoyon taku siya!”

37 Si langipelokancha kan Paul si kampu, kalala si komander, “Awed chi ibyegak kan sika?” Laschaaw chi komander, ti Griego ilugudla, ot kalala, “Mugga ammum gey un man-ugud si Griego? 38 Kalak pun lu sika hachiʼn iyEgypt un langgulu si gubillu si sin-eɏgew. Siya langipangpangu si opat libuʼn lelleɏakiʼn kapapatoy si lugeɏ un lappun ummili.”

39 Summongbyat si Paul, “Sakon ked, Judiowak un lampeɏpuʼd Tarsus si probinsiyan chi Cilicia, un osaʼn machaychayaw un siudad. Kewam ta makauguchak kan cha allaʼn tagu.”

40 Impalubus chi komander siya, ot summiked si Paul si eɏ-eɏchen ot impangatula imala ta pagingkola cha amod un tagu. Gummilokcha pun, illugilan lan-ugud si Hebrew un ugud cha Judio. Kalala,