1 “Susulud kan aamma, chongɏonyu allaʼn malongbyatku kan chikayu.” 2 Ot chingngeɏcha pun un lan-ugud si Hebrew kan chicha, gummilokcha. Ot intuɏuy Paul kalan un, 3 “Judiowak un liyalak ud Tarsus ud Cilicia, ngim chummakeɏak utla Jerusalem ya lan-iswilaak kan Gamaliel. Ammala intudtuchu kan sakon cha losan un lintog cha aappu taku. Lapingotak un lansimbi kan Apudyus un isuyu si sala. 4 Ti pilaligatak cha mamati kan Jesus ya impapatoyku bo cha uchum. Lelleɏaki ya byebbyebyai, chilokmaak chicha ot impaibyaɏudku chicha. 5 Ked pilaloklokan chi kangatuwan un pachi ya cha kukunsiseɏ un tuttuwa, ti chicha mismu langipaw-it si suɏat kan sakon un ilawitku kan cha susulud ud Damascus. Ot ummoyak udchi manchokma kan cha mamati ked inggetongku chicha ud Jerusalem un byaɏud ta machusacha.

6 “Ngim inggewak pun si chaɏan si mamatuk un ummachaliʼd Damascus, maeg chi lalisingak si amod chi lilanglaʼn lampeɏpuʼd langit, 7 ot laodchegak ot chingngeɏk chi ginga un kalala, ‘Saul, Saul, puggey sakon palpaligatan?’

8 “Ot ilimusku, ‘Siluka, Apu?’ Ot kalala, ‘Sakon si Jesus un iNazareth un pin-am palpaligatan.’ 9 Intullong cha kadwak chi lummilang, ngim achipuncha chingngeɏ chi imbyegan chi gumminga.

10 “Ot ilimusku, ‘Apu, simma kook?’ Ot kalala kan sakon, ‘Lumibbyatka ta ingka ud Damascus, ti awed udchi mangibyega kan sika si cha losan un simsimmokkun ipakwa kan sika.’ 11 Ngim achipulak makatullong ti lalisingak si hachiʼn lummilang, ot kiliwichak kan cha kadwak ot ipuyutak ud Damascus.

12 “Inggew chi osaʼn leɏaki un mangngachen Ananias. Mangapudyus un tungtungpaɏola lintog taku ya mas-oman cha losan un Judio un inggew udchi. 13 Ummali kan sakon ot summiked si cheegku. Ot kalala, ‘Suludkuʼn Saul, mantullongka kasin.’ Ot si hachiʼn uras lakatullongak ot lailak siya. 14 Lagamput pu hachi kalala, ‘Si Apudyus un chilaychayaw cha chachakkeɏ taku, chilutukala sika ta agammuwom cha piola ya itullonglu lappun byasuɏla un Alakla un lansimbi kan siya ya chongɏom bo gingala. 15 Ti sika mangitistigu kan cha losan un tagu si cha intullonglu ya chingngeɏm. 16 Ked si sala, simman bo uwayom? Lumibbyatka ta ingka mampabunyeg ked iluwalum kan Apu Jesus ta pakawalola cha byasuɏm.’ Kalan Ananias kan sakon.

17 “Langulilak pun ud Jerusalem, ummoyak lalluwalu si templo ot inggew chi impailan Apudyus kan sakon un isun chi in-ilop. 18 Intullongku si Apu Jesus un kalala kan sakon, ‘Chesam! kakmam telan ud Jerusalem, ti achipun cha tagu utla mamati si ibyegbyegam mipanggop kan sakon.’

19 “Ngim summongbyatak, ‘Apu, mamaticha lin, ti ammucha un sakon chi pin-a ummoy kan cha sinagoga lanchokma kan cha lamati kan sika ot imbyaɏudku ya bilautak chicha. 20 Ammucha bo un lagalasalak si lamatoyancha kan Stephen un lantistigu mipanggop kan sika. Ti inggewak un langachug si silup cha lamatoy kan siya.’

21 “Ot kalala kan sakon, ‘Ingkan, ti ibuunku sika si adchayuwan si cha tagun Gentil.’ ”

22 Imbyegan pun Paul hachi, cha amod un tagu lanchochongngeɏcha kan siya, illugicha impakuy, “Patoyon taku siya! Achiyu ipalubus un matagu!” 23 Ot lampakupakuycha ya impayapayapaycha silupcha ya lan-igap-uɏcha tapuk si ngatu. 24 Ot imbilin chi komander kan cha suɏchachulaʼn iyoycha si Paul ud kampu ked silapchukancha taplu ammuwola lu puggey simpapakuy cha tagu kan siya. 25 Ngim si lamaɏuchencha ta sapchukancha siya, kalan Paul si kapitan un summisiked udchi, “Ha ipalubus kamman chi lintog un sapchukam chi osaʼn tagu un Romano lu chaampunlu imbistigeɏon?”

26 Chingngeɏn pun chi kapitan chi hachi, ummoyla imbyega kan komander. Kalala, “Man-alledka si koom si allaʼn tagu, ti osa siya un Roman.”

27 Ot ummoy chi komander kan Paul ot ilimusla kan siya, “Kewam ta ibyegam kan sakon, ha Romanka?”

Ot kalala, “O.”

28 Ot kalan chi komander, “Chakeɏ lambyayedku si lambyalilak un Romano.”

“Ngim sakon, liyalakak un Romano,” kalan Paul.

29 Ot kakma lan-olat cha suɏchachuʼn mangimbistigeɏ kan siya, ked ulay chi komander, ummogyat ti laammuwala un Romano si Paul ya imbilinlan mabyaɏud siya.

30 Pion chi komander un ammuwon lu simma ustuʼn ipabyasuɏ cha Judio kan Paul. Ot labigat pun, impaayegla cha ap-apun cha papachi ya cha losan un kukunsiseɏ ta mammimitingcha. Ot illiyoyla si Paul si igew cha mammimiting ot pilasikedla si sangwalancha.