1 Ngim chikayuʼn susulud, gapu si lamatiyanyu kan Kristu, lakatagu kayu kan siya ud langit un ummaammuy si machuwalan Apudyus. Ked masapuɏʼn potgonyu cha laapudyusan un byaleg. 2 Ked isosomokyu cha laapudyusan un byaleg, chakampun un cha lailubungan un byaleg. 3 Ti isuyu lalattoy si lummaus un lambibiyegyu, ngim latattagu kayu si lakataguwanyu kan Kristu si sala un litimpuyug kayu kan Apudyus. 4 Si umaliʼn eɏgew, lu mampaila si Kristu un siya tuttuwan biyegyu, ked mipati kayu bo si lumangɏangan chi kilachayawla.

5 Kaalonyu cha lawwing un pion cha tagu utla pita un isun cha kachechegchegas ya kaisaw un somsomok. Achiyu bo ipalubus cha lawwing un pion chi long-egyu ya kilaagum, ti siya isun chi malayawan si silan-apudyus. 6 Ked gapu kan cha hachi, kaog-ogyat chi ichusan Apudyus kan cha achipun tumuttuwa kan siya. 7 Kamatchi isun chi kabibiyegyu si chaampunyu lamatiyan un litimbuɏuy kayu si kamatchi. 8 Ngim si salaʼn lamatiyanyu, masapuɏʼn kaalonyu cha allaʼn lawwing, isun chi sumangasanga, mabobos-eɏ, mammumulit, makiyap ya mamabyaɏang un man-ugud. 9 Ya achi kayu bo man-asituli, ti kilaanyu cha sigud un lawwing un mansosomsomokyu pati cha lawwing un ugaliyu 10 ti ilawatyu baruʼn somsomok un illidchon Apudyus un ituɏutuɏuyla pabiɏuwon ta miyisu kayu kan siya ya maammuwanyu siya un ustu. 11 Ked si sala, lappun Gentil willu Judio, cha lasogyatan willu achipun, cha lakaacheɏ ya cha achipun, cha musassu ya cha lawayawayaan, ti si Kristu losan ya inggew siya kan cha losan un mamati.

12 Gapu ta chilutukan Apudyus chikayu un tagula un ay-ayatola, masapuɏʼn ipailayu un malagchegu kayu, bibiɏu kayu, mallaay kayu, lapakumbyabya kayu, achi kayu mamaspasweɏ ya man-asiillalus kayu. 13 Alusanyu ituɏged cha susuludyu ya lu awed makabyasuɏ kan chikayu, manpillakawan kayu, un isun chi lampapakawan Apu Jesu Kristu kan chikayu, ked masapuɏʼn pakawalonyu cha uchum. 14 Ked ha kapotgen kan cha alla, man-asiayat kayu ti siya malakod si mantitimpuyugen un lappun mangkuɏangan.

15 Ha lin-awan illidchon Kristu masapuɏʼn manturay otyan si somsomokyu, ti siya langayagela kan chikayu ta man-ossaan kayu un long-eg Jesu Kristu. Ya pasig kayu manyaman kan Apudyus. 16 Sosomkonyu cha lapotog un tudtuchun Kristu. Useɏonyu losan un kilalaing un illidchola taplu man-asitudtuchu kayu kan man-asisegeg kayu. Mangkanta kayu si mikankanta un ugud Apudyus ya uchum un kankantan cha mamati ya laispirituwan un kankanta un manyaman kayu kan Apudyus si somsomokyu. 17 Ulay silu koonyu ya ibyegayu, koonyu losan si ngachen Apu Jesus ya mipagapu kan siya manyaman kayu kan Apudyus un Ama.

18 Chikayuʼn byebyaiʼn laasaw-an, mampaituray kayu si asawayu ti siya ustuʼn koon chi mamati kan Apu Jesu Kristu.

19 Chikayu boʼn leɏakiʼn laasaw-an, masapuɏʼn ayatonyu asawayu, maalus kayu ya achiyu paligatan chicha.

20 Chikayuʼn aalak, masapuɏʼn tuttuwaonyu cha langiyalak kan chikayu si losan, ti siya mampagalas kan Apudyus.

21 Chikayuʼn Aamma, achiyu amochon cha man-oomeɏyu kan cha alakyu, ta achicha chumauy.

22 Chikayuʼn musassu, masapuɏʼn tuttuwaonyu cha losan un ibyegan cha apuwonyu utla pita. Chakampun un abus chi allaancha mangwaanyu si pakwacha ta mas-omcha kan chikayu. Ngim koonyu si tuttuwaʼn somsomokyu gapu si mangibiilanyu kan Apu Jesus. 23 Ulay silu koonyu, ipapatiyu kabyeeɏanyu un mangwa, un kamad Apu Jesus chi mansimbiyanyu, chakampun kan cha tagu. 24 Ti ammuyu un awed chi gunggula un idchon Apu kan chikayu un laksunyu. Ti si Kristu un Apu mansimsimbiyanyu. 25 Ti cha mangwa si lawwing, awed bo subyalit cha kingwacha, ti man-iisuwon Apudyus cha tagu si manguisala.