1 Chikayuʼn susuludku utlat Colosas ya Laodicea, ya ulay bo cha uchum un chaampun mangitullong kan sakon, piok un ammuwonyu un iggak chi kabyeeɏak para si bumaɏuwanyu. 2 Ti ha piok un para kan chikayu losan, masegeg chi somsomokyu kan meeɏot chi mantitimpuyugenyu gapu si ayatyu, ya maplucha si kilabyaklang chi lamlama un idchon chi ustu-ustuʼn man-aawatyu. Ya ammuwoncha litataɏuʼn panggop Apudyus un mipanggop kan Kristu. 3 Ti si Kristu mangagammuwan taku si losan un lichuchulin un kilalaing ya somsomok Apudyus. 4 Imbyegak cha alla kan chikayu, ta achi kayu otyan maallilaw si chakampun un tuttuwan ibyegbyegan cha kasusukla. 5 Ulay lu lappulak kan chikayu, awechak si ispiritu ti pasigku chikayu sosomkon. Ked matetteɏokak si chingngeɏk un mantitimpuyug kayu ya mangkoscheɏ pammatiyu kan Kristu.

6 Gapu ta ilawatyu si Jesu Kristu un man-Apuyu, masapuɏʼn ituɏuyyu suɏuton chi kabibiyeg un miyapot si taguʼn litimpuyug kan siya. 7 Ha pammatiyu kan Jesu Kristu ked isun otyan chi lummamutan chi osaʼn kayu, ya kumoskoscheɏ pammatiyu kan siya un siya litudtuchu kan chikayu. Ya pasig kayu manyaman kan Apudyus.

8 An-allechenyu ta achi kayu maawis si tudtuchuʼn umallilaw un impatawid cha iyawi ya cha ispiritu un manturay si lubung. Lappun simbila cha allaʼn tudtuchu siya mangallilaw kan cha somsomok ya chakampun kan Kristu lampeɏpuwala ngim ugalin cha iyawi un simsimmokcha ya cha bilin utla pita.

9 Ti lambyalin tagu si Kristu, ngim awed kan siya losan un kila-Apudyus Apudyus. 10 Ked gapu si litimpuyugenyu kan siya, awed kan chikayu lappun mangkuɏangalan biyeg. Ti siya kangatuwan kan cha losan un turay ya kalobbongan.

11 Gapu si litimpuyugenyu kan Kristu, isun chi lasogyatan kayu. Chakampun un sogyat un killingwan chi tagu ngim ha insogyat Kristu kan chikayu ked ha langaalala kan cha ugali takuʼn mangwa si lawwing. 12 Ti si labunyagenyu, siya isun chi lakalobolanyu kan Kristu ya lakataguwanyu si ummuliyala lataguwan. Ked mipagapu si pammatiyu si pallakabyelin Apudyus un langipuuli lalagu kan Jesu Kristu.

13 Si chaampunyu mamatiyan, isuyu lalattoy kan Apudyus gapu si byasuɏyu ya gapu ta chikayu ked Gentil, un lappun ammuyu mipanggop si lintog Apudyus. Ngim si sala, tilagun Apudyus chikayu ked impati chikayu kan siya. Ya pilakawanla cha losan un byasuɏ taku. 14 Ilumasla listaan cha byasbyasuɏ taku pati impabyasuɏn chi lintog kan chitaku ot imbyellula illansa si krus. 15 Gapu si latoyan Kristu si krus, kilaan Apudyus cha kilabyelin ya kalobbongan cha achipun mailaʼn aɏan un manturay. Ked impailala si losan un illogla chicha.

16 Ked susulud, achiyu tuttuwaon cha mampabyasuɏ kan chikayu un mangibyegbyega un masapuɏʼn suɏutonyu achu-achuʼn ngililoncha un isun cha mipanggop si makan ya mailum ya ha koonyu si timpun chi piyasta, summaeɏan buɏan ya Sabyechuʼn man-illongan. 17 Ti losan cha alla, alliliwan cha byaleg un umali, ngim ha katuttuwaan ked si Kristu. 18 Ked achiyu tuttuwaon cha mangak-akit kan chikayu un mangipatut un mangipakumbyabya si long-egyu ta tuttuwaonyu cha ngililoncha ya masapuɏʼn manchayaw kan cha angheles. Cha allaʼn tagu, ibyegbyegacha un langatngatucha kalu lu chikayu ya awed impain-ilop Apudyus kan chicha. Ngim lappun ustu si ilastugcha ti lampeɏpu si lailubungan un somsomokcha. 19 Ked lan-awichencha si Jesu Kristu un siya uɏu takuʼn mamati ya chitaku long-egla. Ha uɏu, siya malingngeɏ si losan un partin chi long-eg taplu man-eɏot chi man-uuluchencha ya mantimpuyugencha. Ked si Kristu mangipachakeɏ sigun si pion Apudyus.

20 Chikayuʼn mamati, gapu si litimpuyugenyu lakakatoy kayu kan Kristu, ya lawayaan kayu kan cha ispiritu un manturay si lubung. Ked puggey un sissiyan suysuɏutonyu cha ugalin cha lailubungan un tagu? Kan payuggey tungpaɏon cha katlaʼn bilin, 21 un isun cha, “Achiyu oglen, Achiyu simsiman, Achiyu appachen!” 22 Ti losan un makan ya uchum un ibyegbyegan cha allaʼn bilin, killingwan Apudyus ta useɏon chi tagu, ked lu maamin, abusla. Ha lampeɏpuwan cha hachiʼn bilin ya tudtuchu ked somsomok chi tagu. 23 Ngim an-allechenyu ti isun chi ustu mangipatutancha si malayawan kan cha angheles ya mampakumbyabyaancha ya mamaligatancha si long-egcha. Ngim lappun simbin cha kamatchi ti achipuncha pabiɏuwon cha lawwing un somsomok ya cha pion chi long-eg.