1 Ked chikayuʼn aalak Apudyus un patungedla ay-ayaton, masapuɏʼn tuɏachonyu ugalila. 2 Masapuɏʼn man-asiay-ayat kayu un isun chi man-aayat Jesu Kristu kan chitaku, un inchuyala long-egla ta matoy para kan chitaku. Ked ha latoyala, isun chi mambyanguʼn chatun un mat-opan Apudyus.

3 Gapu ta tagun Apudyus chikayu, achi kayu otyan mangwa si lawwing un isun chi maagum ya makachegchegas. Ulay chi mangug-ugguchen si kamatchiʼn kopya, achiyu otyan koon. 4 Ya achi kayu otyan man-ugud si lawwing, willu mansallubyak ya man-ugud kan cha lappun simbila ya cha amod un soysoyog, ngim paingsaonyu otyan un manyaman kan Apudyus. 5 Ti cha taguʼn kachechegchegas ya pasig kabibiin cha pin-acha koon, ked ammuyu un sigulachuʼn achipuncha mipati si Mampangatan Kristu ya si Amalaʼn Apudyus. Ulay cha maagum si losan un ochon ya siya man-apudyuscha, ti siya potpotgoncha un chakampun kan Apudyus. 6 Allechenyu ta achi kayu maallilaw kan cha masikap un mangibyega si chakampun un tuttuwa. Ti cha achipun mamati si katuttuwaan, sigulachuʼn apitoncha sangan Apudyus. 7 Ked achi kayu mitimbuɏuy kan cha taguʼn kakammatchi.

8 Si sin-eɏgew, manggikbot chi inggewanyu ti lappun ammuyu kan Apudyus. Ngim si sala, pummadcha somsomokyu gapu si lamatiyanyu kan Apu Jesus. Ked masapuɏʼn ha mambibiyegyu miyulud si pummadchaan chi somsomokyu, 9 ked ha ibungala, bumaɏu mansosomsomokyu ya maluɏachenyu si katuttuwaan ya cha losan un bibiɏuwon Apudyus. 10 Siyad achaɏonyuʼn koon cha makaay-ayu kan Apudyus. 11 Achi kayu mitimbuɏuy si lappun simbila un kokòon cha taguʼn manggikbot chi inggewancha, ngim siyad koonyu cha bibiɏu ta mapadchaan chi kilalawwing cha killingwacha. 12 Kan ulay chi man-uguchencha kan cha intataɏuchaʼn langwa, ked patunged kabibiin. 13-14 Ked lu mapadchaan chi kilalawwing cha pin-acha koon, pumatak chi mangilasilancha si kilalawwing ta pabiɏuwoncha otyan. Ked hachi ibyegbyegan chi kanta un kalala,

15 Allechenyu otyan cha mambibiyegyu ta achiyu isu cha achipun makaawat si ustu, ti chikayu, laaawwatanyuʼn ustu. 16 Ked lu awed wayayu un mangwa si bibiɏu, siya otyan cha koonyu, ti cha allaʼn lawwing, maam-amodcha lumawilawing si sala. 17 Ked achi kayu mantingtingngang ngim siyad singtonyu cha pion Apudyus un ipakwa kan chikayu. 18 Achiyu ipalubus un mabuuk kayu, ti yumam-an cha kamatchi. Ngim ha koonyu, ipalubusyu Ispiritun Apudyus un mangituray kan chikayu. 19 Ta lu man-asilallallus kayu, man-asibyasa kayu si ugud Apudyus un Salmo ya ganggalasonyu malayawanyu kan siya si laispirituwan un kankanta. 20 Ulay silu makwa, pasig kayu manyaman kan Ama takuʼn Apudyus si ngachen Apu takuʼn Jesu Kristu.

21 Kacha osa kan chikayu, masapuɏʼn mampakumbyabya kan cha biɏunla ti kamatchi main-an chi mampakumbyabyaanyu kan Kristu.

22 Chikayuʼn byebyai, masapuɏʼn mampakumbyabya kayu si asawayu un isun chi mampakumbyabyaanyu kan Apu Jesus. 23 Ti ha leɏaki, siya mangituray si asawala un isun chi mangiturayan Jesu Kristu kan cha losan un mamati, ya si Jesus taguwola cha losan un mamati, un miyalig long-egla. 24 Ha isun chi mampakumbyabyaan cha mamati kan Kristu, katchi otyan chi isun chi mampakumbyabyaanyuʼn byebyai si asawayu.

25 Chikayu boʼn leɏaki, masapuɏʼn ayatonyu asawayu un isun chi man-aayat Jesu Kristu kan chitakuʼn mamati. Ti si Jesus, gapu si ayatla kan chitaku, inchuyala biyegla para kan chitaku. 26 Ti mambyalilola chitaku lapeɏkas gapu si laluɏsala kan chitaku si chelum ya ugud Apudyus, 27 ta siya mangingkuwaala kan chitakuʼn mamati, lappun byasuɏ taku ya lappun bod lawwing taku, ti patunged taku bibiɏu si sangwalanla.

28 Ked chikayuʼn leɏaki, masapuɏʼn ay-ayatonyu asawayu un isun chi man-aayatyu si long-egyu. Ked lu silu mangay-ayat si asawala, ay-ayatola bo long-egla, ti lan-ossaan kayu un long-eg, 29 ked lappun tagu si lawingola long-egla, ngim pakalala ya lelemala. Ked hachi isun chi koon Jesu Kristu, ti ayyuwalala ya ay-ayatola chitakuʼn mamati 30 ti chitaku mibilang un long-egla. 31 Hachi impaigilin Apudyus si ugudla un kalala,

32 Lachaɏom chi piolaʼn ibyega, un ha man-aawatku, mitipug si Jesu Kristu kan cha losan un mamati ta mambyalincha ossaan. 33 Ked isula bo mauseɏala si man-asawa. Ti ha leɏaki, masapuɏʼn ay-ayatola asawala un isun chi man-aayatla si long-egla, ked ha byebyai, masapuɏ boʼn ipotogla asawala.