1 Chikayuʼn aalak, masapuɏʼn potgonyu amayu kan ilayu, ti siya ustuʼn koon chi mamati kan Apu Jesus. 2 Ti siya lintog Apudyus un kalala, “Masapuɏʼn potgonyu amayu kan ilayu.” Hachi umulaʼn bilin Apudyus un awed chi gunggula lu potgon, ti ha ingkarin Apudyus, kalala, 3 “Lu potgonyu allaya, bibiɏu biyegyu utla pita ya anchu mataguwanyu utla pita.” * 6:3 Deuteronomy 5:16

4 Chikayuʼn ama kan ila, achiyu pasangaon cha alakyu ngim tudtuchuwanyu chicha ya disiplilaonyu chicha un isun chi killingwan Apu Jesus kan chitaku.

5 Chikayuʼn musassu, masapuɏʼn ammanyu potgon chi simmusassu kan chikayu ya ipotogyu chicha, ha koonyu, potgonyu chicha un lappun lawwing si somsomokyu un isun chi Jesu Kristu potgonyu. 6 Chakampun bo un abus chi mangitutullongancha kan chikayu mangwaanyu si ustu, ta lu kamatchi koonyu, ha singtonyu ked ha michayawanyu. Ha koonyu otyan, ibilangyu un si Jesu Kristu simmusassu kan chikayu, ya iggayu kabyeeɏanyu un mangwa si pion Apudyus si losan un somsomokyu. 7 Bibiɏu otyan chi somsomokyu un mangwa si losan un pakwacha kan chikayu, ti ha katuttuwaan, chakampun un tagu simmusassu kan chikayu, ti si Apu Jesu Kristu. 8 Ammu taku un cha losan un mangwa si bibiɏu, gunggulaan Apudyus chicha, ulay musassu willu chakampun.

9 Chikayu un awed musassula, masapuɏʼn bibiɏuwonyu koonyu kan chicha. Achiyu chicha og-ogyaton. Ammuyu un chitaku losan, ulay musassu willu simmusassu, os-ossaan chi Apu takuʼd langit. Ked lappun piliyala si tagu ti man-iisuwola losan ulay silu kilasasaedcha.

10 Ha alungus chi ibyegak kan chikayu: Awatonyu pallakabyelin Apu Jesus ta useɏonyu si mangipapattiyanyu un mangwa kan cha losan un pion Apudyus. 11 Masapuɏʼn useɏonyu losan un illidchon Apudyus un mangaɏaseg si long-eg ta awed in-ilonyuʼn mangisiked kan Satalas un amod chi sikapla. 12 Ti ha katuttuwaan, chakampun un tagu kagubyat taku, ngim cha pangat cha aɏan ya losan un achipun maila un alla kilabyelincha ya pasig lawwing cha awed si somsomokcha, ked chicha mangituray si tagu utla pita. 13 Ked useɏon taku losan un illidchon Apudyus kan chitaku un mangaɏaseg si long-eg, ta achi taku maabyak lu chumtong chi lawwing. Ked mangɏog taku lu magamput chi gubyat.

14 Ked mansasaggala kayu un isun chi suɏchachu. Ha suɏchachu, masapuɏla sintulun. Ked siyad isun chi mansintulunyu katuttuwaan. Ha osa bo, masapuɏn chi suɏchachu solod chi biɏukungla. Ked siyad isun chi mansolodyu, ha mangwaanyu si bibiɏu ya ustu. 15 Ked ha isun chi ikapatusyu, lakasagala kayu un mangibyega si bibiɏuʼn chameg mipanggop si lumin-awaan un idchon Apudyus. 16 Ked masapuɏ boʼn popotpotanyu pammatiyu kan Jesu Kristu ti siya isun chi keɏasegyu. Ya mantegod kayu kan siya, ti siya mangkeɏasegyu si losan un kaog-ogyat un koon Satalas un isun chi bumaɏabyaɏan tubyey. 17 Ked ha kilagan byetukungyu, siya lalaguwan Jesu Kristu kan chikayu, ti siya malapaya si somsomokyu. Ya ikakayyayyu bo pachin un illidchon chi Ispiritun Apudyus, un siya ugud Apudyus.

18 Masapuɏʼn malluwaluwalu kayu kan Apudyus ya ichawatyu si losan un timpu ta ichaɏan chikayu si Ispiritu. Ked achipunyu bo maliwatan un manchawat si tuɏung Apudyus para kan cha losan un tagula, ngim allechenyu ya ipupuutyu mangiluwaluwalu para kan chicha. 19 Ya ipatiyu bo sakon iluwalu ta ipasomsomok Apudyus chi ustuʼn uguchok lu mawayaalak un man-ugud. Ya iluwaluyu bo ta tumeɏochak un mangibyega si bibiɏuʼn chameg un achipun lipakaammu inggala si sala. 20 Ti gapu si hachi, sakon chi mampabyegaon Jesu Kristu, un siya gapun chi labyaɏuchek. Ked pasigyu otyan sakon iluwalu ta tumeɏochak un mangibyegbyega si allaʼn impiyeɏn Apudyus kan sakon.

21 Achu piok un ibyega mipanggop kan sakon, ngim ustu ti allat un umali si Tychicus ta ipakaammula kan chikayu cha makmakwa kan sakon. Siya sulud takuʼn ay-ayatok ya mantegochen un mansimbi kan Apu Jesus. 22 Hachi panggopkuʼn mangibuulan kan siya utlat, ta ug-ugguchola mipanggop kan chikami utla ya segagola chikayu.

23 Ked susulud, iluwaluk kan Ama takuʼn Apudyus ya Apu takuʼn Jesu Kristu ta palin-awaoncha somsomokyu ya pakoskoscheɏoncha pammatiyu ya ulay bo ay-ayatyu. 24 Iluwaluk bo ta kacheguwan Apudyus cha losan un lappun kiged chi man-aayatcha kan Apu Jesu Kristu.