1 Sakon si Jude un osaʼn mansimbi kan Jesu Kristu ya sulud James. Allaya suɏatku kan chikayu un ilayagen ya ay-ayaton Apudyus un Ama, ya aadchugen Jesu Kristu.

2 Iluwaluk ta chogchog-an Apudyus chi kachegula kan chikayu, palin-awaola cha somsomokyu, ya chogchog-ala bo man-aayatla kan chikayu.

3 Potpotgok un susuludku, mallagpotak un maluɏat kan chikayu mipanggop si mataguwan taku losan un mamati. Ngim kasapuɏan un maluɏatak kan chikayu, ta ipapatiyu malakcheɏanyu si pammatiyu un lamingpingsalon Apudyus illidchon kan cha tagula. 4 Ti achipunyu mailasilan un allat cha aginsusuɏu un litipug kan chikayu un lappun somsomokcha kan Apudyus. Ti paspasantancha katuttuwaan mipanggop si kachegun Apudyus. Us-useɏoncha ugud Apudyus un maleincha si kokòoncha un lawwing. Achipuncha bigbigon si Jesu Kristu un ossaan un Mistulu ya Apu taku. Ha machusaancha labyeyeg un impakaammun chi liigili un ugud Apudyus si awi.

5 Ulay lu sigud un ammuyu cha laklakwa si awi, piok un ikasin ipasomsomok kan chikayu chi in-ilon Jesus un lalagu kan cha galak Israel malipud Egypt. Ngim lagamput pun, liyam-anla cha achipun lamati kan siya. 6 Somsomkonyu cha angheles un achipuncha inchagas illiingew si sigud un kasasaedcha ngim tilelancha ustuʼn igewcha. Ti impupuk Apudyus chicha si manggikgikbotan. Lichagascha lakawaɏan inggala si gumatngan chi eɏgew un manguisala kan chicha. 7 Somsomkonyuʼd Sodom ya Gomorrah ya cha lampalikwos un ili.*7 Genesis 19:1-24 Lakabyasuɏcha si chegchegas ya siyad pin-acha kingwa pipion chi long-egcha.†7 Ha uchum kalancha angheles, lakasuyopcha kan cha byebyai utla pita. Itullongyu si Genesis 6:2-4 ya 2 Peter 2:4 Ked laklak-amoncha chusan Apudyus kan chicha un mallalayun un apuy un gumilgillaub un achipun maksop. Liya otyan chi mansampaɏan taku.

8 Kamatchi bo cha pin-acha im-impon cha allaʼn tagu, pin-acha koon cha byasuɏ un malimok si long-egcha. Achipuncha potgon cha turay Apudyus, ya am-amsiwoncha cha machaychayaw un angheles. 9 Ulay si Michael un pangat cha anghel, achipunla killingwa kamatchi. Ti ulay chi lansubogencha kan chimunyu mipanggop si mangaɏa si lecheg Moses, achipun lan-ugud si lawwing. Ngim ha imbyegala, “Kiged Apudyus un malubngeɏ kan sika.”‡9 Daniel 10:13, 21, 12:1 10 Ngim cha allaʼn tagu, byaɏangla uguchonchaʼn lawwing kan cha byaleg un achipuncha maawatan. Cha byaleg un sigud un ammucha, isun chi sigud un liklan cha atap un ayam, ked cha alla manyam-an kan chicha.

11 Kadchegu cha allaʼn tagu! Ti tiluɏedcha killingwan Cain.§11 Genesis 4:1-8, 1 John 3:12 Ked gapu si kilaagumcha si pilak, bilay-ancha un ichaɏan chicha si lawwing un angwat un isun Balaam.*11 Numbers 22-24, 31:16, 2 Peter 2:15-16 Ya tiluɏedcha bo byasuɏn Korah un achipunla tiluttuwa si Moses,†11 Numbers 16:1-35 ked machuchusacha un isun Korah.

12 Cha allaʼn tagu un pin-a makakan kan chikayu chumimokcha gapu ta leɏawotcha ya kabibincha ti mabuubuukcha. Siyad somsomkoncha abus chi long-egcha. Isucha libuu un miyangi-angin un lappun uchenla, ya kayuʼn achipun mamunga ulay lu timpun chi mambubunga, latoychaʼn ustu-ustu ti labyegutcha. 13 Isucha kaog-ogyat un challuyun si byeybyey un peɏoswaola cha mantetebuteb un kaisaw un kabibiin un angwatcha. Isucha bo cha malungachungaw un bituwon un inyaallan Apudyus chi manggikgikbotan un inggewancha si ing-inggala.

14 Si Enoch un mikapituʼn lolap kan cha galak Adam, impadtula si awi machusaan cha kamatchiʼn tagu un kalala, “Ilanyu, umali Apu un kadwala cha kalibu-libuʼn anghelesla. 15 Ta kuisola cha losan ya chusaola cha malagbyasuɏ un lappun Apudyuscha gapu kan cha losan un lawwing un killingwacha ya cha losan un kilokobot un imbyegacha si laluplingancha kan siya.” 16 Cha allaʼn tagu, pasigcha umingu-inguk ya lappun mat-opancha. Ya siyad pin-acha koon cha byaɏanglaʼn lawwing un pipion chi long-egcha. Isaysayawcha long-egcha ya pin-acha soysoygen cha tagu taplu makwaʼn eɏancha pioncha.

17 Ngim chikayuʼn potpotgok un bubuɏun, sosomkonyu cha impadtun cha apostoles kan Jesu Kristu un Apu taku. 18 Kalancha kan chikayu, “Lu chumtong chi alungus chi timpu, lumoswa cha mangam-amsiw kan chikayu. Cha allaʼn tagu un siyad pin-acha suysuɏuton cha lawwing un pipion chi long-egcha.” 19 Cha kamatchiʼn tagu, mangmangwacha si mansisilaanyu.‡19 Ha uchum un piolan uguchon si Greek. Chicha mangisila si long-egcha kan chikayu. Siyad mangituray kan chicha cha lailubungan ya lappun Ispiritun Apudyus kan chicha.

20 Ngim kan chikayu un potpotgok un bubuɏun, ipapatiyu man-asipapigsa si mampeɏkas un pammatiyu. Malluwalu kayu mipagapu si pallakabyelin chi Ispiritun Apudyus. 21 Popotpotanyu ayat Apudyus, si manguuwayanyu si kachegun Apu takuʼn Jesu Krisu un mangatod kan chikayu si biyeg un mallalayun.

22 Tuɏunganyu cha manchuwa-chuwa pammaticha. 23 Ya taguwonyu cha uchum un achipun mamati un isun chi lapsutonyu chicha si apuy. Ya kacheguwanyu cha uchum un mambyasbyasuɏ, ngim sangaonyu cha lawwing un angwatcha ti isucha kiisaw un makamansa.

24-25 Machaychayaw otyan si Apudyus un mangay-ayyuwan kan chikayu taplu achi kayu makabyasuɏ. Siya mangichateg kan chikayu un mampeɏkas ya amod chi galasyu si sangwalanla. Os-ossaan si Apudyus un Malagu kan chitaku mipagapu kan Jesu Kristu un Apu taku, uwala kilachayaw, kilangatu, kilabyelin ya turay malipud si sin-eɏgew, si sala ya si ing-inggala. Amen.