1 Ha allayaʼn liblu, ked mipanggop si impakaammun Apudyus kan Jesus Kristu un makwa si umaliʼn eɏgew. Ilulan Jesu Kristu impakaammu taplu maawatan cha losan un mansimbi kan siya cha makwa si umaliʼn eɏgew. Achipun mabyeyeg ked makwa cha alla losan. Ha in-ilon Jesu Kristu un langipatigammu kan John un mansimbi kan siya, ked imbuunla anghel un mangibyega kan siya. 2 Ot imbyegan John cha losan un intullongla ya chingngeɏla. Ked ha allayaʼn liblu langigiliyala si ugud Apudyus un tilakcheɏan Jesu Kristu. 3 Ked binchisyulan Apudyus chi taguʼn mambyasa si sangwalan cha uchum, ya mabinchisyulan bo cha losan un manchongeɏ lu tuttuwaoncha ibyegbyegala, ti achipun mabyeyeg ked makwa cha alla losan!

4 Sakon si John. Allaya suɏatku kan chikayuʼn mamati un pin-a manchetchetong si pituʼn ili si probinsiyan chi Asia.

Si Apudyus, sigud un illinggew ulay si chamchamun cha losan, ya pasig iinggew, ulay si sala ya si ing-inggala. Ked otyan ta tuɏutuɏungan chitaku losan kan Apudyus ya palin-awaola somsomok taku losan, ya ha Ispiritula un pituʼn kalasi kalobbongala, un pasig iinggew si sangwalan Apudyus un Ap-apu, 5 ya si Jesu Kristu bo un malagpati un mangipatigammu si ibyegan Apudyus. Si Jesu Kristu kaulaan un ummuli latagu kan cha latoy, ya siya bo mangituray kan cha losan un ari utla lubung.*1:5 4-5 si allaʼn liblu, ha lambye un pitu ked likasikasin. Ha piolaʼn uguchon si somsomok cha Judio, ustu-ustu, wechewed, lappun kuɏangla,

Ya si Jesu Kristu, amod chi ayatla kan chitaku, ked ha latoyala un libukbukan chi chaɏala lanwayawayaala kan chitaku, ti isun chi imbyabyaɏud chitaku si byasuɏ, 6 ya impatila chitaku si mampangatala, lambyalilola bo chitaku pachi un mansimbi kan Amalaʼn Apudyus.†1:6Exodus 19:6 Ked chaychayawon taku si Jesu Kristu un kangatuwan ya mallakabyelin un manturay si ing-inggala! Amen.

7 Somsomkonyu allaya: Kasin umali si Jesu Kristu un manggagawa si libuu, ked losan cha tagu itullong, ulay cha hachiʼn lallut-uk kan siya. Ked losan cha tagu si kaili-ili mamayogpog si ogyatcha si umaliyala ti hachi machusaancha. Ked sigulachuʼn makwa cha alla!

8 Kalan Apudyus un mallakabyelin, “Sakon chi Alpha un luglugi ya sakon bo Omega un alungus cha losan, ti sigud un illiinggew siya si luglugin cha losan ya awed bo si sala ya iinggew bo si ing-inggala.”‡1:8 Alpha ked umula un letter si Greek un alphabet. Omega chi alungus un letter.

9 Sakon si John un suludyu, biɏunku chikayu un mangiyalu-alus si maligligatan taku gapu si lamatiyan taku kan Jesu Kristu, ya biɏunku bo chikayu si mipatiyan taku si mampangatan Apudyus, ulay awechak si sala utla Patmos un osaʼn ili un langgagawa si byeybyey. Illiyoyak utla gapu si langitudtuchuwak si ugud Apudyus ya katuttuwaan un impatigammun Jesus kan sakon. 10 Osaʼn Chuminggu un manchaychayawan kan Apudyus, awed chi impain-ilop chi Ispiritun Apudyus kan sakon, ked awed chi chingngeɏk un chakeɏʼn ginga un isun chi tangguyub un lituptup si ochogek. 11 Ot kalala kan sakon, “Isuɏatlu losan cha mipaila ya mipadngeɏ kan sika, ta ipaw-itlu kan cha mamati un pin-a manchetchetong si pituʼn ili un Ephesus, Smyrna, Pergamum, Thyatira, Sardis, Philadelphia ya Laodicea.”

12 Lantuwiliyak pun un mangitullong si hachiʼn makaug-uggud kan sakon, intullongku pituʼn papattayan chi pagsilawan, un pasig byalituk. 13 Ked illinggew chi osaʼn langgagawa un isun chi taguʼn mallagolagoyon chi silupla ya libyalikis chi bilalituk un takyed si biɏukungla. 14 Ked ha buukla, amod chi putilakla un isun chi kapas. Ya ha atala bo, isun chi byaɏa. 15 Ked ha chepanla, mansilisiling un isun chi bilunsi un laboseɏ. Ked ha gingala, isun chi alaas chi tumeteub un chelum.§1:15 Daniel 7:9, 13, 10:5-6 16 Ked ha machuwalan un imala, ilooglela pituʼn bituwon. Ked ha tupokla, lummoswa mantachom un sabli un lansupang chi tachomla. Ked ha lupala, mansiling un isun chi seɏan ilit chi kilapigsala.

17 Ked si hachiʼn langitullongak kan siya, lalitwechak si sangwalanla un isuk chi latoy si amod un ogyatku. Oli pun iloglela sakon si chuwalan un imala, ot kalala, “Achika umogyat! Sakon chi luglugin cha losan, ya sakon bo alungus cha losan.”*1:17 Isaiah 44:6 18 Sakon si Apudyus un lappun matoyala! Impalubusku long-egku un mapatoy, ked si sala achipulak akit matoy. Sakon chi simbiyang si otoy ya alla bo kalobbongak si inggewan cha latoy.

19 “Ked isuɏatlu losan un mipaila kan sika, un makwa si sala, ya cha makwa si umaliʼn eɏgew. 20 Ha piolaʼn ipaila cha allaʼn pituʼn bituwon un itutullonglu si machuwalan un imak, ya cha allaʼn pituʼn papattayan chi pagsilawan un byalituk, kamatla piolaʼn uguchon un lappun laligammu. Ha pituʼn bituwon, chicha miyaligen cha pituʼn angheles cha hachiʼn pituʼn simbyaan. Ked ha pituʼn papattayan chi pagsilawan, chicha miyaligen cha taguʼn mamati si hachiʼn pituʼn simbyaan.”