1 Bigbigat pun, lantutuɏeg cha losan un ap-apun cha papachi ya cha pallakayon cha Judio lu silu in-ilonchaʼn mamatoy kan Jesus. 2 Ot bilaɏud cha siya ot impuɏang cha kan Pilate un gubillachuɏ.

3 Laammuwan pun Judas un langiyibit un lakodchongan si Jesus un matoy, lambyabyawi siya ot inyulinla tiɏumpuɏuʼn byeɏas un palatan pilak kan cha ap-apun cha papachi ya pallakayon cha Judio. 4 Kalala, “Lakabyasuɏak ti inyibitku lappun byasuɏla!”

Kalancha, “Lappun ammumid chi lait. Kiged ka gey si biyanglu!”

5 Ot ingkop-en Judas chi pilak si chaɏom chi templo ot ummoyon ot ummoy lamposeɏ.

6 Ot illaɏan cha ap-apun cha papachi pilak ot kalancha, “Mipalit si lintog taku un mitipug si pilak chi templo, ti byayed chi biyeg chi tagu.” 7 Ot lantutuɏagencha un hachi ingilacha si pitan chi osaʼn manchichiwin si byanga ta awed lolobbolan cha kakkaili. 8 Ot inggan chi hachi, lingachelancha hachiʼn pità, “Pitaʼn Lachimok.” 9 Ot siya latungpaɏan chi imbyegan Jeremiah un propetan Apudyus si awi,

11 Oli pun impasangucha si Jesus kan Pilate un gubillachuɏ. Ot ilimusla kan siya, “Ha sika Arin cha Judio?”

Ot kalan Jesus, “Siya bo ti siya kalam.”

12 Ngim si lampabyasuɏan cha ap-apun cha papachi ya cha pallakayon cha Judio, achipun summongbyat. 13 Oli pun kalan Pilate kan siya, “Ha lappun chongɏom si ipabpabyasuɏcha kan sika?” 14 Ngim lappun insongbyat Jesus ulay ossaan kan cha impabyasuɏcha kan siya, ot laslaschaaw chi gubillachuɏ.

15 Tilawon lu timpun chi Piyastan chi Lallausan, liyugali si gubillachuɏ un mangibukat si osaʼn byaɏud un chawaton cha amod un tagu. 16 Si hachiʼn timpu, inggew chi osaʼn byaɏud un summalingatan, un mangngachen Jesus Barabbas. 17 Lachagup ked cha amod un tagu, ilimus Pilate kan chicha, “Silu pionyu un ibukatku? Si Jesus Barabbas willu si Jesus un ngadloncha Kristu?” 18 Ti ammun Pilate un siya langipuɏangan cha pallakayon cha Judio kan Jesus gapu si aposcha.

19 Si ummaammuyan Pilate si tugew un manguisala kan cha tagu, lambuun si asawala si umoy mangibyega kan siya, “Achim bibiyangan chi taguʼn halat un lappun kabyasbyasuɏala, ti ilin-ilopku si labi un lapaligatalak gapu kan siya.”

20 Ot silugsugen cha ap-apun cha papachi ya cha pallakayon cha Judio cha amod un tagu ta chawatoncha kan Pilate un ibukatla si Barrabas ked impapatoyla si Jesus. 21 Ot ilimus kasin chi gubillachuɏ kan chicha, “Silu kan cha chuwaʼn alla pionyuʼn ibukatku?”

Ot kalancha, “Barabbas.”

22 Ot ilimus Pilate kan chicha, “Simman lù chi kook kan Jesus un ngadloncha Kristu?”

Kalancha losan, “Ilansam si krus!”

23 Ot kalan Pilate, “Puggey, simma byasuɏla?”

Ngim ilam-amodcha impakuy, “Ilansam si krus!”

24 Ot intullong pun Pilate un lappun makwala, ngim lugiyanchaʼn manggulu, langaɏa si chelum ot lambiɏu si sangwalan cha amod un tagu ot kalala, “Lappun biyangku si mangtoyanyu si taguʼn alla. Kiged kayu gey!”

25 Ot summongbyat cha tagu, “Mangamung kami gey ya cha galakmi si supapak chi matoyala!”

26 Oli pun imbukat Pilate si Barabbas. Ot impabyautla si Jesus ot impuɏangla kan cha susuɏchachu ta ilansacha si krus.

27 Ot illaɏan cha susuɏchachun Pilate si Jesus ot impeɏlokcha si byeɏoy chi gubillachuɏ. Ot kilalligun cha losan un suɏchachu siya. 28 Lilusayancha siya ot sililupancha si mancheɏaeg un isun chi silup chi Ari. 29 Ot bummallikugcha si lassi-lassi un isun chi korona ot illiggacha si uɏula. Ot impakchoncha osaʼn salipat si machuwalan un imala. Ot lampalintumingcha si sangwalanla ot ilam-amsiwcha siya un kalancha, “Matataguka un Arin cha Judio!” 30 Ot tiluptuppaancha siya ot illaɏacha salipat si imala ot insaplitcha si uɏula. 31 Lagamputcha pun pin-a ilam-amsiw siya, kilaancha insilupcha kan siya ot illiggacha sigud un silupla kasin. Ot intallaycha ta umoycha ilansa si krus.

32 Lummawacha pun si siudad, ilabotcha chi osaʼn leɏaki un mangngachen Simon un iCyrene. Ot impatutcha impabukud chi krus Jesus. 33 Ot lichuumcha pun si osaʼn lugeɏʼn ngadloncha Golgotha, piolaʼn uguchon ked “Igew chi Byettukeg.” 34 Illidchencha si Jesus si byeyas un lakamsan si apchu, ngim silimsimala pun, illissala.†27:34 Psalm 69:21

35 Oli pun illansacha si Jesus si krus. Ot lambibillulutcha lu silu mangingkuwa si silupla.‡27:35 Psalm 22:18 36 Ot ummamuychaʼn lamantay kan siya. 37 Si uɏuwan chi krusla, liigili impabyasuɏcha kan siya, un kalala, “Allaya si Jesus un Arin cha Judio.” 38 Oli pun illansacha bo cha chuwaʼn akkawan. Osa si machuwalanla ya osa si machuwigila.

39 Ot sinwiwigiwig cha lumaus ya langamsiw kan Jesus,§27:39 Psalm 22:7 un kalancha, 40 “Lo! Imbyegam un yam-alom chi templo ked pauchom si tiɏuʼn eɏgew. Taguwom chi long-eglu! Ked lu tuttuwaʼn Alak chika kan Apudyus, lumogsedka si krusluʼn halat!”

41 Ilam-amsiw bo cha ap-apun cha papachi ya mimistulun chi lintog ya pallakayon cha Judio, un kalancha, 42 “Tilagum cha uchum ngim achipunla taguwon chi long-egla! Ked siya kalu bo Arin cha Israel. Lu tuttuwa, lumogsed otyan bo siyad chi krus ta mamati taku kan siya. 43 Mantegod kan Apudyus ked kalala boʼn siya Alak Apudyus. Ilan taku amin lu pion Apudyus un taguwon siya si sala!”*27:43 Psalm 22:8 44 Katchi boʼn ilam-amsiw cha akkawan un likrus.

45 Ot lummamatuk pun, gummikbot chi intilun chi pita inggalad chi ummeɏ-eɏgew. 46 Ot si hachi illipkaw Jesus un kalala, “Eli, Eli, lama Sabachthani?” ha piolaʼn ibyega, “Apudyusku, Apudyusku, puggey sakon man-awichen?”†27:46 Psalm 22:1

47 Chingngeɏn pun cha uchum un summisiked chi hachi, kalancha, “Ay-ayagela si Elijah.” 48 Ot kakma osa kan chicha lalodchak ot langaɏa si isun chi kapas ot isawsawla si summukan byeyas ot ipakatla si pauɏ ot ichuweɏla kan siya ta supsupala. 49 Ngim kalan cha uchum, “Oli u, ta itullong taku lu umalin Elijah taguwon siya.”

50 Ot kasin lampokaw si Jesus ot lakaan chi angosla.

51 Ot si hachi, langkadwa lapissay chi ketilan chi templo lallugid chi ngatu inggalad chi cheɏa. Ot chummita si lapigsa ot lapotpotlak cha patungaw. 52 Ot liwalit cha loblobon ked palos cha ummuli latagu un tagun Apudyus. 53 Ot lummawacha si loboncha. Ot ummuli pun latagu si Jesus, ummoycha si laapudyusan un siudad ud Jerusalem ot achu cha langitullong kan chicha.

54 Ummogyat chi kapitan ya cha susuɏchachula un lambyebyentay kan Jesus si laliklacha chita ya intullongcha losan un lakwa. Ot kalancha, “Tuttuwaʼn Alak Apudyus siya.”

55 Illinggew bo achuʼn byebyai udchi un lan-oottap. Chicha cha lituntun-ud ya lansimsimbi kan Jesus malipud Galilee. 56 Cha alla ked, si Mary Magdalene ya si Mary un ilan James kan Joseph ya asawan Zebedee.

57 Lummaschom pun, gummatong chi osaʼn byaklang un iyArimathea, un mangngachen Joseph. Siya bo osaʼn disipulus Jesus. 58 Ummoyla chilawat kan Pilate chi lecheg Jesus. Ot imbilin Pilate un maitod chi lecheg kan siya. 59 Ot ilopas Joseph chi lecheg Jesus si krus ot bilussungla si mampeɏkas un baruʼn luput. 60 Ot ummoyla illimbon si baruʼn lobon un tilikitikan un patungaw. Lagamput pun, liligedla chakeɏʼn byetu un illiplotla si sawang chi lobon ot ummoyon. 61 Illinggew cha Mary Magdalene ya osaʼn Mary un ummamuy si sangun chi lobon.

62 Labigat pun, si Sabyechuʼn man-illongan cha Judio,‡27:62 Ha ugalin cha Judio, mallugi eɏgew un man-illongan si mipisukan chi ilit si kalima ked mangalungus si mipisukan chi ilit si Sabyechu. ummoy cha ap-apun cha papachi ya cha Pariseo kan Pilate. 63 Ot kalancha, “Apu, masmasmokmi si katattagun chi lait un mangallilaw, un imbyegala, ‘Lu lumaus chi tiɏuʼn eɏgew, umuliyak matagu kasin.’ 64 Ked ibilinluʼn byentayanchaʼn ustu-ustu chi lobon inggala si mikatluʼn eɏgew. Langked lu umoy cha disipulusla akawon chi lechegla ked kalancha kan cha taguʼn ummuli latagu siya. Ked lu katchi chi makwacha, singkumaɏu boʼn lawwik chi mangalungus un maallilawan cha tagu lu si chamu.”

65 Ot kalan Pilate kan chicha, “Cho, man-ayeg kayu kan cha susuɏchachu ked ammanyu impabyentay chi lobon un ustu.” 66 Ot ummoyoncha ot ummoycha amman bilantayan chi lobon ot limeɏkaancha chi olobla ot impabyentaycha kan cha suɏchachu.