2
Ha Kilangatun Kristu Ya Kilakumbyabyala
(Rom. 15:1-4; 2Co. 8:9; 1Pe. 5:5-7)
1 Susulud, ha litimpuyugen taku kan Kristu, siya masegagen chi somsomok taku. Ked ha ayatla kan chitaku, siya bo manliwliwa si somsomok taku. Ked litimpuyug taku si Ispiritun Apudyus, ked man-asiay-ayat taku ya man-asikachegu taku. 2 Ked gapu ta tuttuwa losan cha alla, mantitimpuyug kayu kan man-asiay-ayat kayu un man-os-ossaalonyu somsomokyu ked gamputonyu galasku. 3 Ya ulay silu koonyu, chakampun otyan un mipangatuwanyu willu michayawanyu. Ti ha koonyu otyan, losanyu ipabyabya long-egyu ked ibilangyu cha biɏunyu un langatngatu lu chikayu. 4 Siyad singtonyu bumaɏuwan cha biɏunyu, chakampun un abus cha bumaɏuwanyu.
Tuɏachon Taku Somsomok Jesu Kristu
5 Tuɏachonyu somsomok Jesu Kristu, ta siya isun chi mansosomsomokyu,
6 ti siya, ulay lu man-isucha kan Apudyus, chakampun un ipatutla kila-Apudyusla
7 ngim iwwalinla kilangatula, ked lambyalin un tagu un isu taku ked
impabyabyala long-egla un isun chi bubùulon Apudyus.
8 Ked impabyabyala long-egla un laluttuwa kan Amala ulay siya latoyala,
ti lilansa si krus.
9 Ked hachi langipangatuwan Apudyus kan siya, ked siya kangatuwan
un lappun miyisu kan siya.
10 Ked gumatong chi eɏgew un losan un inggew ud langit ya utla pita,
ulay cha latoy ya chaampun, cha maila ya achipun maila,
losancha mampalintuming si sangwalan Jesus un manchayaw kan siya,
11 ked losan cha tagu ibyega un si Jesu Kristu Ap-apun cha losan.
Ked siya michayawan Ama takuʼn Apudyus.
Ipapati Taku Pammati Taku Kan Apudyus
(Mat. 5:14-16; Eph. 5:1-20; 1Jn. 1:5-7)
12 Susuludkuʼn ay-ayatok, pasigyu tiluttuwa cha losan un imbyegbyegak si illinggewak kan chikayu, ked sin-umamod otyan si sala un lappulak. Ituɏuyyuʼn mangwa kan cha losan un pion Apudyus un siya ibungan chi pammatiyu inggala matungpeɏ malaguwan Apudyus kan chikayu, ibiinyu siya ya umogyat kayu otyan kan siya. 13 Inggew si Apudyus kan chikayu, ked siya mangatod si kabyeeɏanyu ya somsomokyu un mangwa si piola.
14 Susulud, ulay silu koonyu, achi kayu umingu-inguk ya makais-isik 15 taplu lappun lawwingyu ya lappun otyan ipabyasuɏn cha tagu kan chikayu un aalak Apudyus, ulay michochogga kayu kan cha tagu utla lubung un amod chi kilalawwingcha. Ti isuyu cha bituwon un silawancha cha tagu utla lubung. 16 Ti ha ugud Apudyus, siya mataguwancha si ing-inggala. Ti lu kamatchi koonyu, magalasalak si mangulilan Kristu, ti chikayu main-an cha bungan cha losan un killingwak. 17 Ulay lu mapatoyak si sala, lagalasak un mangipuɏang si biyegku kan Apudyus ti mipati kan cha biyegyu un isun chi ichatunyu kan Apudyus gapu si pammatiyu kan siya. Ked makagalasak bo kan chikayu. 18 Siya bò otyan kan chikayu, un makagalas kayu kan sakon.
Ha Miibuulan Cha Timothy Kan Epaphroditus
(Act. 16:1-4)
19 Lu ipalubus Apu Jesus, achipun mabyeyeg ked ibuunku si Timothy utlat un manggeggakay kan chikayu, ta gumalasak otyan lu chongɏok chi mipanggop kan chikayu, 20 ti si Timothy abus chi bumiyang kan chikayu un isun chi killingwak. 21 Ti losan cha uchum, siyad somsomokcha bumaɏuwancha ked inwalincha mipanggop kan Jesu Kristu. 22 Ngim si Timothy, ammuyu kilapotogla. Ked intutullongyu un isumi man-ama, un lantintilluɏung si langibyegbyeg-anmi si bibiɏuʼn chameg. 23 Lamlamaok un ibuunku siya kan chikayu, lu maagammuwan chi makwa kan sakon. 24 Ked lamlamaok bo kan Apu Jesus un mibukatak otyan si sin-akitan ta umaliyak utlat.
25 Ked allaya bo si Epaphroditus, un sulud taku un imbuunyu utla ta tumuɏung kan sakon si losan un masapuɏk. Isun chi tuttuwaʼn suludku ti biɏunku un mansimbi kan Apudyus ya isun bod chi suɏchachun Apudyus. Ngim ha somsomokku, bibiɏu lin lu mangulilok siya si sala 26 ti amod chi ayula kan chikayu losan, ked lachanchalagen ti chingngeɏyu kalu un lasakit. 27 Tuttuwaʼn amod chi sakitla ti allà akit un matoy. Ngim kilacheguwan Apudyus, chakampun un abus siya kilacheguwan Apudyus ngim ulay sakon bo, ti lu latoy, laam-amod chi somsomokku ya ligatku. 28 Ked mangulilok siya si sala un amod chi galasku, ta lu itullongyu siya kasin kayu gumalas ya lumangpaw bo somsomokku. 29 Galasonyu un mamagetong kan siya, ti sulud taku mipagapu kan Apu Jesus. Ked masapuɏʼn potgonyu cha tagu un isula. 30 Ti siya, amas matoy gapu si mangwaala si kawachin Kristu, ti inchuyala biyegla si tummuɏungala kan sakon si lappulanyu.