1 Ot ilubyachen pun bo chi Keɏlilu mikapituʼn bobod chi hachiʼn lalulukut un papin, gummilok cha losan un inggew ud langit, umoy si godwan chi uras. 2 Oli ked intullongku cha pituʼn angheles un summisiked si sangwalan Apudyus, ked laidchencha si sin-ossaʼn tangguyub.

3 Ot gummatong chi osaʼn anghel un ilooglela bilalituk un iiggaan chi byangbyangluʼn insenso. Ot ummoy summiked si sangwalan chi bilalituk un altar un inggew si sangwalan chi umaammuyan chi Ari. Ot laatod bo kan siya achuʼn insenso ta ichogala si luwalun cha losan un tagun Apudyus, un ichatunla si altar. 4 Ot ha asuk chi lasgob un insenso un lichoga si luwalun cha tagun Apudyus ked ngummatu losan un lampeɏpu si hachiʼn ilooglen chi anghel un summisiked si sangwalan Apudyus. 5 Oli pun pillun chi hachiʼn anghel chi hachiʼn iiggaan si byangbyanglu si byaɏa un illaɏala si altar, ot igap-uɏla utla pita, ot kummuchuɏ, ya kumilakilat ya chummitachita.

6 Oli pun, cha hachiʼn pituʼn angheles, lansagalachaʼn mamaginga si tangguyubcha. 7 Pilagingan pun chi ummulaʼn anghel chi tangguyubla, ummuchen si chuwaɏu ya apuy un lachaɏaan. Ot lasgob chi langkatluwan chi allaʼn pita ya langkatluwan cha losan un kayu ya lipati bo cha losan un achipun leɏanguʼn luut.

8 Oli ked pilagingan bo chi mikadwaʼn anghel chi tangguyubla, ot lummoswa isun chi chakeɏʼn bilig un gumilegileb ot litup-ung si byeybyey. Ked ha langkatluwan chi byeybyey, lambyalin chaɏa. 9 Latoy cha inggew si langkatluwan chi byeybyey, ya lilutob bo cha losan un bapur un illinggew si hachi.

10 Oli ked pilagingan bo chi mikatluʼn anghel chi tangguyubla, ot laodcheg chi osaʼn chakeɏʼn bituwon un gumilegileb un isun chi pilatud, ot lipisuk si langkatluwan cha chewwang ya chegsi si pita. 11 Hachiʼn bituwon, langachalan si Mampiit. Ot piliitala cha losan un chelum un lipisukala, ot latoy cha achuʼn tagu un langilum si hachiʼn mampiit un chelum.

12 Oli ked pilagingan bod chi mikapat un anghel chi tangguyubla, ot layam-an chi langkatluwan chi ilit ya langkatluwan chi seɏeg, ulay bo langkatluwan cha losan un bituwon. Ked gummikbot cha langkatluwan chi eɏgew ya lappun bo seɏeg si langkatluwan chi labi.

13 Oli ked intullongku bo osaʼn mangngitit un bukaw un mantattayap si langit, un impokawlaʼn kalan, “Kadchegu cha losan un taguʼn achipun mamati un inggew si pita si mangayyupan cha tiɏuʼn angheles un langalungus si tangguyubcha!”