1 Oli ked pilagingan bo chi mikalimaʼn anghel chi tangguyubla, ot intullongku osaʼn anghel un isun chi bituwon un lampeɏpuʼd langit un laodcheg si pita. Ked laatod kan siya tebik chi olob chi abut un lappun kiged chi kachaɏomla. 2 Ot bilukatala hachiʼn abut, ot lummoswa amod un asuk un isun chi asuk chi chakeɏʼn sogob, ot gummikbot chi pita ti laseilan chi ilit. 3 Oli ked, awed bo illoswan chi hachiʼn asuk, un isun cha chuchun ot pillumkot si pita, ked laidchencha si kilabyelin un kumtob ked isun chi mangkokotob chi geyyaman. 4 Labilincha un achipuncha yam-alon cha luut ya cha kayu ya ulay siluʼn muɏa, ta siyad kotbyencha cha taguʼn lappun meɏkan Apudyus si kicheycha. 5 Ngim achipuncha lapalubusan un mangtoy si tagu, ti paligatancha cha tagu si ulog chi limaʼn buɏan, ked ha sigeb chi mapampaligatancha isun chi kotbyen chi geyyaman. 6 Ked si hachiʼn ulog chi limaʼn buɏan, mansingit cha tagu si matoyancha, ngim lappun makwacha, ti ulay lu pionchaʼn matoy, achipuncha mapalubusan.

7 Ha kopyan cha hachiʼn chuchun, isucha kabyayu un lisasaggalaʼn umoy makagubyat. Ya isun chi lambyetukungcha si bilalituk un koronan chi Ari. Ked ha lupacha, isun chi lupan chi tagu. 8 Ked ha buukcha bo, anchu un isun chi buuk chi byebyai. Ya ha ngiponcha, isun chi ngipon chi layun. 9 Ked ha biɏukungcha, latap-ulan si isun chi kaga un mantipeɏ si long-egcha. Ya lu tumayapcha, singkakasacha un isun chi kumasaan cha achuʼn kabyayuʼn itodtodchak cha kalisa un umoy makagubyat. 10 Laipusancha bo ya awed tiludcha un isun chi saung chi geyyaman. Ked ha ipuscha inggewan chi kilabyelinchaʼn mamaligat si tagu si ulog chi limaʼn buɏan. 11 Awed bo arichaʼn mangituray kan chicha, siya anghel un simbyentay si abut un lappun kiged chi kachaɏomla. Ha ngachenla si ugud cha Hebrew, Abaddon, ked si ugud cha Griego, Apollyon, un ha piolaʼn uguchon, ha Manyayam-an.

12 Hachi lakwaan chi ummulaʼn kaog-ogyat un ligat, ngim awed bo chuwaʼn chaampun gumatong.

13 Oli ked pilagingan bod chi mikalom un anghel chi tangguyubla, ot chingngeɏk bo ginga un lampeɏpu si opat un sulin chi hachiʼn altar un bilalituk un inggew si sangwalan Apudyus. 14 Ked imbyegan chi hachiʼn ginga si hachiʼn mikalom un anghel un lalangchon si tangguyub, “Ukasam cha hachiʼn opat un angheles un labyabyaɏud si igew chi chakeɏʼn chewwang un Euphrates!” 15 Oli pun libukat cha hachiʼn opat un angheles, un lisasaggalacha un languuway si hachiʼn mismuʼn uras ya eɏgew, buɏan ya tawon ta patoyoncha cha losan un taguʼn inggew si langkatluwan chi pita. 16 Ot lipaila bo kan sakon cha susuɏchachuʼn langakabbyayu, ot libyega kan sakon chi bilangcha un umoychaʼn chuwanggasut un milyun.

17 Ked kamatla langitullongak kan cha hachiʼn langkakabbyayu. Latap-ulan chi biɏukungcha si kaga, un isun chi bumaɏabyaɏaʼn apuy, ya byetuʼn kalanchaʼn sapphire, ya asupli tullongla. Ked ha uɏun chi kabyayucha, isun chi uɏun chi layun, ya lumosloswa si tupokcha apuy ya asuk ya gumilegileb un asupli. 18 Gapu kan cha hachiʼn tiɏuʼn kalasi un lummoswa si tupok cha kabyayu, siya langtoy si langkatluwan cha losan un tagu utla pita. 19 Ti ha kilabyelin cha hachiʼn kabyayuʼn umtoy, inggew si tupokcha ya ulay ipuscha, ti ha ipuscha, isun chi uɏog un lauɏuwan ked kotbyela tagu.

20 Ngim cha hachiʼn leusan un taguʼn achipun lapatoy si kamatchi, sissiyan achipuncha iyagey cha lawwing un pin-acha koon, achipuncha iyagey un malayaw si aɏan ya ulay siluʼn silan-apudyus un kingkingwachaʼn byalituk ya pilak, gambyang, byetu ya kayu un achipun makatullong willu makachongeɏ willu makatidchaɏan. 21 Ked cha allayaʼn tagu, achipuncha ibyabyawi cha pummatoyancha, lansalamangkaancha, lan-akawancha ya cha lilulukuʼn pin-acha killingwa mipanggop kan cha leɏaki ya cha byebyai.