10
Ha Paat Un Papin Un Ilooglen Chi Osaʼn Anghel
Oli ked, intullongku bo lan-osog un osaʼn mangkoscheɏʼn anghel un lampeɏpuʼd langit ked lakulibuchen si libuu ya laabungusan si tileg. Ha lupala, isun chi siling chi ilit, ya ha ikila, isun chi latutuud un gileb chi apuy. Ked ilooglela paat un papin un labubukyed. Ked gilussan chi chuwalan un ikila byeybyey ya ha machuwigila pita. Ot lampakuy si mantobyeg, un isun chi agukom chi layun. Ot summongbyat cha pituʼn kuchuɏ. Lagamput pu kichung chi hachiʼn kuchuɏ, ilugik oyya un mangigili si imbyegala. Ngim chingngeɏk bo ginga un lampeɏpuʼd langit un mangipalit, kalala, “Achim igili hachiʼn gingan cha pituʼn kuchuɏ ti achipun mipakaammu hachi.”
Oli pun, ha anghel un intullongkuʼn summisiked un lansasakkaang si byeybyey ya pita, intayegla chuwalan un imala un langisapata kan Apudyus un matatagu si ing-inggala, ya siya langwa si langit ya pita ya byeybyey, ya cha losan un inggew kan chicha. Ot kalala, “Lappun kasin mauway, allà akit chi makwaala, ti ha malangguyubyen chi mikapituʼn anghel, hachi mangamputan Apudyus kan cha losan un chaampun maammuwan un simsimmoklaʼn koon, ked hachi imbyegala kan cha propeta un lansimbi kan siya si sin-eɏgew.”
Oli ked chingngeɏk kasin chi ginga un lampeɏpuʼd langit, ot kalala kan sakon, “Ingka eɏan chi hachiʼn paat un papin un labubukyed un ilooglen chi anghel un lansasakkaang si byeybyey ya pita.”
Ot ummoyku chilawat si hachiʼn anghel chi hachiʼn papin, ot kalala kan sakon, “Allaya, eɏam ked kalom. Mammiis si tupoklu un isun chi chilu, ngim lu ukmulom pasigabola buwanglu.” 10 Illaɏak chi hachiʼn paat un papin un ilooglen chi anghel ot killanku. Tuttuwaʼn mammais si tupokku un isun chi chilu. Ngim ilukmunku pun, pilasigebla buwangku. 11 Oli ked libyega kan sakon un, “Masapuɏʼn ipakaammum bo imbyegan Apudyus un makwa kan cha losan un ari ya cha losan un tagu si kaili-ili un mansabsabyali ugudcha.”