1 Ot si hachi, laatod kan sakon chi osaʼn palaisong un isun chi sekud, ot kalan chi hachiʼn langatod kan sakon, “Ingka isngon chi templon Apudyus ya ipatim chi altar. Bilangom bo cha taguʼn inggew un malaychayaw kan siya si templo. 2 Ngim achim ipati isngon chi lasin chi templo ti siya lipuɏang kan cha taguʼn Gentil. Ked mapalubusancha un maloschos si hachiʼn laapudyusan un ili un Jerusalem si ulog chi opatpuɏu ya chuwaʼn buɏan. 3 Ngim si cha hachiʼn eɏgew un 1,260, idchek si kilabyelin cha chuwaʼn tistiguk un umoy mangipakaammu si pion Apudyus un ipakaammu, ked mansisillupcha si guti.”* 11:3 Cha propeta si awi, mansilup cha si guti, singkumaɏu cha porpetan mangibyegbyega un masapuɏn mambyabyawi cha si byasuɏcha. Ha guti sinyeɏn cha mallangchu

4 Cha hachiʼn chuwaʼn tistigu, chicha miyaligen cha chuwaʼn kayu un olivo ya chuwaʼn silaw, un imbyegbyegan cha propeta si awi, un awed si sangwalan Apudyus un Apun chi lubung. 5 Ked lu awed mangipachas mangam-amis kan chicha, lumoswa apuy si tupokcha un manggob si kabusuɏcha, ked kamatchi matoyan cha losan un mangipachas mangam-amis kan chicha. 6 Awed bo kilabyelinchaʼn mamlot ud langit ta achipun umuchen si ulog chi mangibyeg-ancha si ugud Apudyus. Isula bo kan cha losan un chelum, alla bo kilabyelinchaʼn mambyalilon chaɏa chelum. Ya alla kilabyelincha un mamaligat kan cha tagu si kilalasin chi ligat ngim insigun si pioncha.

7 Ngim lu magamput chi mangibyeg-ancha si ugud Apudyus, hachi lumoswaan chi patunged kaog-ogyat un isun chi atap un ayam un lampeɏpu si abut un lappun kiged chi kachaɏomla, ked gubyatola cha hachiʼn chuwa. Ked abyakola chicha ya patoyola chicha.† 11:7 Daniel 7:7-21 8 Ked ha lechegcha, mibyebyellat si kesan chi hachiʼn chakeɏʼn ili un lilansaan chi Apucha. Ha mangiyaligencha si hachiʼn ili, isun chi Sodom willu Egypt, gapu si lawwing un laklakwa si hachiʼn ili. 9 Ked umoy si tiɏuʼn eɏgew ya godwa mamubuyyaan cha tagu si lechegcha un achipuncha palubusan chi milobolan cha hachiʼn chuwa. Ked lappun achi lamuyaʼn tagu kan chicha un lampeɏpu si kaili-ili si allaʼn lubung ya losan un kilalasiʼn ugud. 10 Ked magalasan cha taguʼn achipun mamati utla pita si latoyan cha hachiʼn chuwa. Ked mangganggalascha ya man-asiatodcha si awed un maatodcha gapu si amod un galascha si latoyancha, ti cha hachiʼn chuwa, propetan Apudyus un pilatungedcha kalu cha tagu utla pita pilaligatan.

11 Ngim lummaus pu tiɏuʼn eɏgew ya godwa, tilagun Apudyus chicha kasin ot lummibbyatcha ked cha hachiʼn lamubuya kan chicha lappun miyisuwan chi ogyatcha. 12 Ot si hachi, chingngeɏn cha hachiʼn chuwa chakeɏʼn ginga un lampeɏpud langit, un kalala kan chicha, “Wayyu utla!” Ked ha mangitutullongan cha losan un kabusuɏcha, lipangatucha si libuu ud langit.

13 Ot si hachi bo, chummita si lapigsa ot layam-an chi ingkasimpuɏun chi hachiʼn ili, ya latoy cha pituʼn libu un tagu. Ked cha uchum un taguʼn labun-an, patunged cha ummogyat ot chayawoncha kilangatun Apudyus ud langit.

14 Ked kamatchi makwaan chi mikadwaʼn kaog-ogyat un ligat.‡ 11:14 Ha mikadwaʼn kaog-ogyat un ligat, ha kabyayu un libyega si 9:13-21. Mipanggop si paat un papin ya chuwaʼn tistigu 10:1--11:13, achipun partin chi mikadwaʼn kaog-ogyat un ligat. Ngim misagsagulud chi mikatlu!

15 Lagamput pun losan cha hachi, pilagingan chi mikapituʼn anghel chi tangguyubla, ot chingngeɏk cha achu ya chakeɏʼn ginga ud langit un kalancha, “Inggala si sala, lappun uchum si mangipangat kan cha losan un tagu lu achi abus chi Apu takuʼn Apudyus ya hachiʼn imbuunla utla pita un Kristu, ked siya manturay si ing-inggala!”

16 Ot cha hachiʼn chuwampuɏu ya opat un pin-a mangipangpangu un umaammuy si sangwalan Apudyus, lampalintumingcha un malaychayaw kan siya, 17 un kalancha,

19 Ot intullongkuʼn lalukatan chi templon Apudyus ud langit, ked mamàila kasun un laiggaan chi hachiʼn liigili un intuɏeg Apudyus si awi. Oli pun kummilakilat ya kummuchukuchuɏ si mantobyeg, chummita bo, ya ummuchen si chuwaɏu.