12
Ha Byebyai Ya Kaog-ogyat Un Dragon
1 Ot awed chi lampaila ud langit un patunged kaskaschaaw un sinyeɏ. Awed chi osaʼn byebyai un summisiked si buɏan, ya lasilupan si isun chi siling ilit, ya labyetukungan si korona un simpuɏu ya chuwaʼn bituwon. 2 Umalakon chi hachiʼn byebyai ot lantukituking gapu si amod un sigeb chi umalakala.
3 Oli pun awed bo lipaila ud langit un osa boʼn kaskaschaaw un sinyeɏ, awed chi kaog-ogyat un dragon un mancheɏaeg*12:3 Daniel 7:7. Achu istoryan cha tagu si awi mipanggop si dragon. Si somsomok cha iyEgypt, ha dragon isun chi chakeɏn buwaya. Ha somsomok cha uchum, isun chi anchu-anchu un uɏog un inggew si byeybyey. Miyalig kan Satalas. chi long-egla, pitu uɏula ya simpuɏu sakgudla. Awed chi korona si kacha uɏu. 4 Ot bilautan chi ipusla langkatluwan cha bituwon ud langit ot ibyellula si pita. Ot ummoy si sangwalan chi hachiʼn byebyai un umalakon, ta kalola alakla lu lumoswa. 5 Ngim ummalak pu hachiʼn byebyai, leɏaki ot litodchak laiyoy kan Apudyus si ummaammuyala, ti siya manturay si lubung si umaliʼn eɏgew, ked manchegson chi mantuturayla. 6 Ked hachiʼn byebyai, ummawid un ummoy si lugeɏʼn lappun ummili un inyaallan Apudyus un mantaɏuwala, ta mangayyuwalala kan siya si ulog chi 1,260 un eɏgew.
7 Oli ked bilumtak chi gubyat ud langit. Ked si Michael un pangat cha angheles, impangula cha uchum un angheles un mangubyat si hachiʼn dragon. Ked hachi boʼn dragon ya cha anghelesla, lakagubyatcha kan chicha, 8 ngim laabyakcha, ot achipuncha lapalubusan un inggew ud langit. 9 Ot lapeɏyaw chi hachiʼn kaog-ogyat un dragon, ya libyellu cha losan un anghelesla utla pita. Hachiʼn dragon, siya uɏog si awi un pangat cha aɏan, willu siya Satalas un langallilaw kan cha tagu utla pita.
10 Oli ked chingngeɏk chi chakeɏʼn ginga ud langit, un kalala,
“Sala makwaan chi malaguwan Apudyus kan cha tagu,
ti sala mangipain-ala si pallakabyelinlaʼn manturay!
Ya sala bo mangipain-an Kristu un imbuunla si kalobbongala!
Ti laabyak ya lapeɏyaw chi pangat cha aɏan ud langit un mangichiɏu-chiɏum
kan cha susulud taku kan Apudyus si ileɏgew ya lilabi.
11 Ngim cha susulud taku, ilabyakcha siya gapu si libukbukan chi chaɏan
chi Keɏlilu, ya gapu bo si lansistiguwancha mipanggop si hachiʼn Keɏlilu,
ulay siya ingkatoycha un achipuncha gilagaan cha biyegcha.
12 Ked losan kayu un inggew ud langit, gumalas kayu ti lapeɏyaw si Satalas!
Ngim kadchegu kayu un inggew ud pita ya byeybyey ti siya libyelluwan Satalas.
Ked amod chi sangala ti ammulaʼn akit chi timpulaʼn mangwa kan cha
piolaʼn koon un lawwing.”
13 Ot laammuwan pun chi hachiʼn dragon un libyellu si pita, chilogchogla hachiʼn byebyai un langiyalak si hachiʼn alak un leɏaki. 14 Ngim hachiʼn byebyai, laidchen si chuwaʼn payak un isun chi payak chi chakeɏʼn bukaw ta tumayap un umawid si hachiʼn lugeɏʼn lappun ummili un lisasaggalaʼn maayyuwalala si ulog chi tiɏuʼn tawon ya godwa,†12:14 Daniel 7:25, 12:7 ked achipun chi hachiʼn dragon maochesan. 15 Ot hachiʼn dragon, imbug-isla isun chi chewwang un chelum ta mangaludla si hachiʼn byebyai. 16 Ngim latuɏungan chi hachiʼn byebyai, ti lantakang chi pita ot lebut losan cha hachiʼn chelum un lampeɏpu si tupok chi dragon. 17 Ot laam-amod chi sangan chi hachiʼn dragon si byebyai, ot ummoyla gilubyat cha uchum un aalakla, cha losan un lamotog si imbilin Apudyus ya langipapatiʼn lamopotpot si katuttuwaan un intudtuchun Jesus. 18 Ot ummoy chi hachiʼn dragon si teɏanteg chi byeybyey sumisiked un man-uuway.