1 Susulud, ammuk un maawatanyu cha allaʼn ibyegak ti ammuyu mit chi mipanggop si lintog. Iturayan chi lintog chi tagu si katattagula. 2 Isun chi osaʼn byebyai un langasawa, lu sissiyaʼn matattagu asawala achipun chi lintog ipalubus un ichangan chi byebyai asawala ya likabyeɏoy si sabyalin leɏaki. Ngim lu matoy chi asawala, ipalubus chi lintog chi byebyai un kasin mangasawa lu piola. 3 Ngim lu mikabyeɏoy chi byebyai si sabyaliʼn leɏaki un sissiyaʼn matattagu asawala, hachi kalanchaʼn lakachegchegas. Ngim lu latoy chi asawala, achipun chi lintog singilon siya ti chakampun un mibilang makachegchegas lu kasin mangasawa.

4 Ked isula bo kan chikayu, susulud. Lakakatoy kayu si kilabyelin chi lintog, ti lipati kayu si long-eg Kristu un latagu kasin. Ked si sala, pauseɏ kayu kan siya ta mansimbi kayu kan Apudyus. 5 Si chamu, siyad suysuɏuton taku cha sigud un pipion chi long-eg taku. Lanturay kan chitaku cha lawwing un pipion chi long-eg taku un impaloswan chi lintog. Ot killingwala long-eg taku un musassu un ha alungusla ked matoyan. 6 Ngim si sala, gapu ta lipati taku kan Kristu si latoyala lawayawayaan taku si lintog un lamaɏud kan chitaku, ked mansimbi taku kan Apudyus un ichaɏan chi Ispiritun Apudyus, chakampun un ha lintog.

7 Ked simma mibyega taku lù? Ha ibyega taku un lawwing chi lintog? Chakampun! Ti ha lintog chi langipakaammu kan sakon lu simma byasuɏ. Achipunku bo laammuwan lu simma kilaagum lu lappun lintog un langibyega,*7:7 Exodus 20:17, Deut. 5:21 “Achim aguman cha kukkuwan cha uchum un tagu.” 8 Ngim gapu ta alla lintog un mangipalit si kilaagum, hachi langipaloswa un awed chi kilaagum kan sakon. Ta lu lappun lintog, achipun milasin chi byasuɏ. 9 Isun chi chaampunku mangammuwan si lintog, kalak pun lu bibiɏuwak un lappun byasuɏk. Ngim laawatak pu lintog, laawatak bo un malagbyasuɏak, 10 ked lobbongkuʼn matoy. Ti ha bilin un langikariʼn mangtod otyan si biyeg, siya bo mangipuyut si matoyan.

11 Ked gapu si allayaʼn bilin, ilallilawak si byasuɏ un sigud un inggew kan sakon ot lambyaleg un siya matoyak. 12 Ti laapudyusan chi lintog ya losan un bilinla, ti bibiɏu ya ustu itudtuchula.

13 Ked ha piola kamman un ibyega un pabyasuɏok chi bibiɏuʼn lintog ti siya gapun chi matoyak? Chakampun! Ti siyad langwa allaʼn byasuɏ un awed kan sakon. Lauseɏ bibiɏuʼn lintog ta mipaila un lakabyasuɏak ked mambyaleg un matoyak. Ya gapu bo si bibiɏuʼn lintog, lipaila kilalawwing chi byasuɏ.

14 Ammu taku un ha lintog ked laispirituan ti lampeɏpu kan Apudyus. Ngim sakon taguwak laing un aliglaʼn lailakuʼn musassun chi byasuɏ. 15 Isuk un achipunku maawatan cha pin-ak koon. Ti cha bibiɏuwok un koon, siya bo achipunku koon. Ngim cha lawwing un issak un koon, siya bo pin-ak koon. 16 Ked lu cha lawwingok cha pin-ak koon, takcheɏak un bibiɏu lintog. 17 Ked chakampun un sakon chi mangwa kan cha alla, ngim ha byasuɏ un awed kan sakon. 18 Ti ammuk un lappun bibiɏu un inggew kan sakon gapu si lawwing un kilatataguk. Ti ulay lu piok un koon cha bibiɏu, achipulak makakopya. 19 Ked achipulak makakopya si bibiɏu un piok. Ngim cha lawwing un issak, siya buggey bo pin-ak koon. 20 Ked lu kook cha lawwingok un koon, chakampun kan sakon chi langwa, ti ha byasuɏ un inggew kan sakon.

21 Ked maawatak si allaʼn mataguwan taku, lu piok un koon cha bibiɏu, siya bo makwak cha lawwik. 22 Ti amod chi ayat chi somsomokku un mangwa si lintog Apudyus, 23 ngim mailak un sabyali un lintog chi awed si long-egku. Osaʼn lintog un bumusuɏ si lintog un pion chi somsomokku. Ked mambyalilolak byaɏud si allaʼn lintog chi byasuɏ un inggew kan sakon. 24 Ked kachegcheguwak. Silu sillobbong un maleɏaklib kan sakon si allaʼn long-eg un siya mangitiɏud si matoyak? 25 Ked manyamalak kan Apudyus ta awed si Jesu Kristu un Apu taku un Malagu kan sakon.

Ked ha kasasaedku, ha somsomokku ked piola un mansimbi si lintog Apudyus, ngim ha long-egku siyad mansimbiyala lintog chi byasuɏ.