1 Ked si sala, losan taku un litimpuyug kan Jesu Kristu, achipun taku machusa. 2 Ti ha Ispiritun Apudyus chi mangatod kan chitaku si biyeg, gapu si litimpuyugen taku kan Jesu Kristu. Ya siya manwayawaya kan chitaku si kilabyelin chi byasuɏ ya otoy. 3 Killingwan Apudyus chi achipun chi lintog kabyeeɏan gapu ta achipun chi tagu makatungpeɏ si lintog gapu si kilakapsut chi long-eg takuʼn tagu. Imbuunla mismuʼn Alakla un mambyalin isu takuʼn tagu un malagbyasuɏ ta siya machusa para kan cha byasuɏ taku taplu kaalon Apudyus chi kilabyelin chi byasuɏ un mangituray kan chitaku. 4 Kamatchi killingwan Apudyus ta matungpeɏ cha losan un lintog kan chitaku un maluɏut si pion chi Ispiritun Apudyus un chakampun kan cha lawwing un pipion chi long-eg taku.

5 Ti cha taguʼn maluɏut si lawwing un pion chi long-egcha, siya bo mangituray si somsomokcha cha pipion chi long-egcha un lisisigud si tagu. Ngim cha taguʼn maluɏut si pion chi Ispiritun Apudyus, ked potgoncha bo Ispiritu un mangituray si somsomokcha. 6 Lu ha pion chi long-eg chi mangituray si somsomok taku, mambyaleg un matoyan taku. Ngim lu Ispiritun Apudyus chi mangituray si somsomok taku, matatagu taku ya lumin-awa somsomok taku. 7 Ti cha taguʼn siyad sosomkoncha sigud un pipion chi long-egcha, chicha kabusuɏn Apudyus ti achipuncha suɏuton chi lintog Apudyus. Ya achipuncha makasuɏut si hachi, 8 ti cha taguʼn siyad suɏutoncha sigud un pipion chi long-egcha, achipuncha makwa mampagalas kan Apudyus.

9 Ngim sabyali kan chitaku, ti chakampun un ha pipion chi long-eg chi mangituray kan chitaku, ti ha Ispiritun Apudyus chi mangituray lu tuttuwaʼn inggew kan chitaku. Ti ha taguʼn lappun chi Ispiritun Kristu kan siya, chakampun un tagun Kristu. 10 Ngim lu tuttuwaʼn awed si Kristu kan chitaku, ulay lu matoy chi allaʼn long-eg taku gapu si byasuɏ, matagu taku gapu si Ispiritun Apudyus*8:10 Ha piolaʼn uguchon si Greek, lu awed si Kristu kan chikayu, ulay lu matoy chi long-egyu gapu si byasuɏ, ha Ispiritun Apudyus mangtod si biyegyu un mallalayun, ti imbilang Apudyus chitaku lalintog. 11 Ked lu awed kan chitaku Ispiritun Apudyus un kasin lalagu kan Jesu Kristu, taguwola bo cha allaʼn long-eg taku gapu si Ispiritula un inggew kan chitaku.

12 Ked susulud, alla kalobbongan taku un matagu, ngim chakampun un suɏuton taku sigud un pipion chi long-eg. 13 Ti lu cha pipion chi long-eg chi suɏuton taku, matoy taku un misila kan Apudyus. Ngim lu awaton taku tuɏung chi Ispiritun Apudyus ta man-awichen taku cha lawwing un pin-a taku koon, matagu taku si ing-inggala. 14 Ti losan un taguʼn ichaɏan chi Ispiritun Apudyus, chicha aalak Apudyus. 15 Ti ha Ispiritun Apudyus un laatod kan chitaku, chakampun un mammusassuwon chitaku ta umogyat taku kan Apudyus. Ngim mambyalilola chitaku aalak Apudyus. Ked gapu si kilabyelin chi Ispiritu, hachi mangawagen taku kan Apudyus, “Ama!” 16 Ked ha Ispiritun Apudyus, siya mangipagikla si ispiritu taku un tuttuwaʼn aalak Apudyus chitaku. 17 Ked gapu ta aalak Apudyus chitaku, makatawid taku kan cha ipatawidla kan cha losan un tagula. Ya makatawid taku bo kan cha losan un impatawidla kan Jesu Kristu. Ti lu mipati taku si ligat Kristu, sigulachuʼn mipati taku bo si machayawala.

18 Lu somsomkok cha ligat taku si salaʼn timpu ked achipun miyisu si kilabiɏun chi makwa kan chitaku si umaliʼn eɏgew. 19 Ti losan un killingwan Apudyus utla pita, uuwayoncha mangipain-an Apudyus si kilangatun cha aalakla. 20 Ti cha losan un killingwan Apudyus, lipadtu un lappun tuɏuyla, chakampun un gapu ta piola un achipun mituɏuy,†8:20 Genesis 3:17-19. ngim hachi simsimmok Apudyus un kamatchi koola. Ngim alla lamlama, 21 si umaliʼn eɏgew, mawayawayaancha cha losan un killingwan Apudyus si libyaɏuchencha ta achicha meɏpos. Ked mipaticha si machayawan un pallakawayawayan cha aalak Apudyus.

22 Ti ammu taku un inggala si sala, maligligatan cha losan un killingwan Apudyus un isun chi malliligat chi umalak un byebyai. 23 Ked chakampun bo un abus cha hachi si malligat, ti ulay chitaku un awed chi Ispiritu un isun chi ummula un sagut Apudyus. Maligligatan taku bo un manguuway si mangibilangan Apudyus kan chitaku un gettok un aalakla ya mamasantala si long-eg taku ta achipun kasin matoy. 24 Ti lamlamaon taku un matagu taku, ngim lu mamàila lamlamaon taku, chakampun un tuttuwaʼn lamlama. Ti silu mallamlama si itutullongla? 25 Ngim lu lamlamaon taku achipun taku mitullong, masapuɏʼn alusan taku uuwayon.

26 Ked isula bo un tuɏungan chitaku si Ispiritun Apudyus si kilakapsut taku, ti achipun taku ammu ustuʼn iluwalu taku. Ngim ha Ispiritu mismu un mangiluwalu si chawaton taku kan Apudyus un achipun taku maibungangay. 27 Ked si Apudyus un sin-ammu si somsomok taku ked ammula somsomok chi Ispiritu, ti ha Ispiritu mangiluwalu para kan chitaku un tagula un mitimbuɏuy si pion Apudyus.

28 Ammu taku un cha losan un makmakwa ked kawachin Apudyus para si bumaɏuwan cha mangay-ayat kan siya un chilutukala un mangwa si simsimmokla. 29 Ti cha sigud un chilutukan Apudyus, ked chicha cha sigud un simsimmokla un mambyalin isun chi alaklaʼn Jesu Kristu taplu siya mampanguɏu kan chitaku losan un mansusulud. 30 Ked cha losan un taguʼn chilutukan Apudyus, chakampun un ilayagela abus chicha, ti cha ilayagela imbilangla chicha lalintog. Ked mipaticha si kilachayawla.

31 Ked himman bo kasin taku ibyega lù? Ta lu awed si Apudyus kan chitaku, lappun bò amin makaabyak kan chitaku! 32 Achipun Apudyus gilagaan chi mismuʼn alakla, ngim inchuyala siya para kan chitaku losan. Lu inchuyala Alakla kan chitaku, ha magaga kamman un mangatod si losan kan chitaku? Achipun! 33 Ti lappun mamabyasuɏ kan chitaku un chilutukan Apudyus, ti siya mismuʼn langibilang kan chitaku lalintog. 34 Ked himman bo malusa kan chitaku lù? Si Jesu Kristu? Chakampun, ti siya latoy para kan chitaku, ya tilagun Apudyus kasin, ya awed siya si machuwalan Apudyus si sala, ked siya bo mangitatakcheɏ mangiluwalu kan chitaku. 35 Ked lappun makwaʼn makaisila kan chitaku si ayat Kristu. Ulay achu malibukan willu ligat taku, willu mapampaligatan taku, willu mauɏat taku, ulay awed kaog-ogyat un makwa kan chitaku ya ulay patoyon chitaku. 36 Ti ha liigili un ugud Apudyus, kalala,

37 Ngim ulay lu makwa losan cha kamatchi kan chitaku, mamangɏog taku gapu kan Jesu Kristu un mangay-ayat kan chitaku! 38 Ked sigulachuwok un lappun makaisila kan chitaku si ayat Apudyus, ulay lu otoy willu biyeg, ulay cha angheles willu cha aɏan, ulay kilabyelin, willu mapasamak kan chitaku si salaʼn timpu willu umaliʼn timpu, 39 ulay awed ud langit ya awed si chaɏom chi pita willu losan un killingwan Apudyus, lappun makwaʼn makaisila kan chitaku si ayat Apudyus un impailala gapu kan Apu Jesu Kristu.