Salmo 4
4
Kararag Sin Labi
1 Sik-a ay Diyos ay mangitonton sin kalintegak,
somongbat ka kod mo mankararagak.
Magay nanposiposak ed idi sin napaligatak,
ngem gapo sin tolong mo, naiwayaanak.
Ed wani, someg-ang ka ay Apo,
ta dengngem kasin nan adawag ko.
2 Dakayo ay ipogaw, pig-an ngin di somaldengan yo
ay manglaslasoy ya mangibabain sin kaipogaw ko?
Apay nga laylayden yo pay laeng din magay silbi na
ya on-onodan yo din baken tet-ewa?
3 Nemnemen yo ay si Diyos et inkasina
din matalek ya nadiyosan ay ipogaw para en sisya,
isonga din karkararag ko et dengdengngena.
4 Manpayegpeg kayo komas egyat yo
ya isaldeng yo san basol yo.*Di esa abe ay kaiologan nina sin Hebreo et: Adi kayo koma manbasol mo bomonget kayo.
Mo bomaktad kayo ta maseyep kayo,
mannemnem kayo ay kosto.
5 Mantalek kayo en Yahweh ay Diyos tako
ya idawat yo en sisya di kosto ay daton yo.
6 Ad-ado di mangwani, “Sino di mangipasiged sin biyag tako?”
O Diyos, ipailam kod en dakami din layad ya seg-ang mo.
7 Dakdakdake din ragsak ko ay indawat mo
mo din ragsak di ad-adoy inani na
ya din ad-adoy danom di obas ay arak na.
8 Mo ibaktad ko ay maseyep, natalna di nemnem ko,
tan sik-a anggoy, Yahweh, di salaknib ko.