Salmo 5
5
Kararag Sin Agsapa Ay Mankedaw Si Panalakniban Diyos
1-2 Arik ya Diyos ko, patgam koma nan kararag ko,
dengngem kod nan bayeweng ya adawag ko,
tan sik-ay pankararagak, Apo.
3 Inagsapa ay madngem din kararag ko,
inagsapa ay ipaammok en sik-a din kedaw ko,
yan sedsed-ek din songbat mo.
4 Tan sik-a ay Diyos, kaliliget mo din lawa,
adim ipalobos ay makitee di managbasol en sik-a.
5-6 Din mangipapangatos awak na
yan adi makasag-en en sik-a,
tan am-in ay mangam-amag si lawa—
din maetek, manglilipot, ya makapese si ib-a na—
kaliliget mo ya dosaem daida.
7 Ngem gapo sin adi manbalbaliw ay layad mo,
mabalin ay makasgepak sin nasantoan ay Timplo.
Patgek ya emegyatak en sik-a, Apo,
et mandayawak sin sana ay beey mo.
8 Omipango ka kod, Apo, begew sin kinalinteg mo,*Di esa abe ay kaiologan nina sin Hebreo et: Omipango ka kod, Apo, ta onodak din kinalinteg mo.
itdom kod din pandanak ay kosto,
tan ad-adoy kalaban ko.
9 Din kalaban ko yan adi matalek di kali da,
tan say an-anapen da din panadaelan das gait da.
Kaman naisasagana ay kaot din tepek da.
Pag boladas din kali da.
10 Ay Diyos, keddengam ya dosaem komas daida
ta mantaolin daida din lawa ay panggep da.
Sin sangoanam, pakaanem komas daida,
tan nanbasol ya kinontra das sik-a.
11 Ngem manragsak koma din mankamang en sik-a,
et kanayon ay mankanta da si ragsak da.
Salaknibam koma ay Diyos din manglaylayad en sik-a,
et gapon sik-a, tet-ewa ay manragsak da.
12 Tan bindisyonam din manongtongpal en sik-a.
Din layad mo yan kaman kasay ay salaknib da.