Salmo 50
50
Din Omalian Diyos Ay Mangokom
1 Si Yahweh ay Manakabalin Amin ay Diyos yan ay-ayagana
din kaipoipogaw sin amin ay solin di daga.
2 Si Diyos yan kaman silaw ay napigsa.
Somili din koniniing na
manipod ed Zion ay palalo di kinapintas na.
3 Omali si Diyos tako yan adi gomiginek sin omaliana.
Waday bomidbidang ay apoy sin sangoanana
ya napigsa ay dagem ay nanlikmot en sisya.
4 Ay-ayagana din langit ya din daga
ta saksian da din pangokomanas ipogaw na.
5 “Ayagan yo din napodno ay ipogaw ko,” kanana,
“din nakitolag en sak-en babaen si datdaton da.”*Exodo 24:3-8.
6 Din amin ay wadad daya,
din kinalinteg Diyos di ipaneknek da,
tan din mangokom et sisya.
7 Kanan Diyos, “Dakayo ay Israelita ay ipogaw ko,
dengngen yo din ipaneknek ko ay maikontra en dakayo,
tan sak-en si Yahweh ay Diyos yo.
8 Baken say panyamyamak en dakayo din datdaton yo
ay kaman din kanayon ay idatdaton yo ay maipoo.
9 Ngem adiak pay dedan kasapolan din bomaro ay baka yo
ya kalding ay mapo en dakayo.
10 Tan okak amin ay animal sin kada
ya din wadas kadontodontog ay baka.
11 Okak abe amin ay mantaytayaw
ya amin ay parsua sin payew.
12 Mo kaspangarigan mandagaangak,
baken dakayo di pangibagaak,
tan din daga ya amin ay wadas labaw na yan okak.
13 Ay siya mo mansidsidaak si bomaro ay baka?
Din kalding yan adiak met inomen dada da.
14 Say laydek ay daton yo din en kayo pan-iyamanan
en sak-en ay Diyos ay kangatoan,
siya abe sin panongtongpalan yo
si amin ay ikari yo.
15 Mankararag kayon sak-en sin timpon di ligat yo,
isalakan kos dakayo et omidaydayaw kayon to.”
16 Ngem sin mangam-amag si lawa, kanan Diyos Apo,
“Magay lebbeng mo ay mangibagbaga sin bilbilin ko
ya mangidaddad-at sin intolag ko,
17 tan din pamagbagak yan kaliliget mo,
din kalik yan adi kan ikaskaso.
18 Mo way ilam si mangakew yan makigayyem ka
ya makikadwa ka sin makikamkamalala.
19 Nakasagana ka ay mankali si lawa
ya pag etek di en ka ibagbaga.
20 Olay din kabsat mo yan palawlawaem sisya.
21 In-giginek ko sin nangamagam sina
yan kanam et en kamanak sik-a.
Ngem ed wani, ibagak din basol mo et ilawlawag kon sik-a.
22 Nemnemen yo na, dakayo ay adi omikaskaso,
tan mo maga, bisngibisngitek dakayo
et magay makaisalakan en dakayo.
23 Din kosto ay daton ay pangdayaw yon sak-en
et din panag-iyaman.
Olay sino ay mantongpal en sak-en et enak isalakan.”