Salmo 51
51
Kararag Ay Mankedkedaw Si Pamakawan
1 Someg-ang ka ay Apo.
Begew sin komakaman ay layad mo
ya din dakdake ay seg-ang mo,
ponasem paabe din lawa ay inam-amag ko
2 ta say dadlon madalosan am-in ay inpaksaw ya basol ko.
3 Tan ammok ay lawa di inam-amag ko
et adi polos makaan dana sin nemnem ko.
4 Madagsen kayman san basol ko ay sana,
sik-a anggoy di nangamagak sina,
isonga magay ipambal ko mo ibagam ay basol ko,
tan pag kosto am-in din dosa ay ikeddeng mo.
5 Apaw kayman na, tan sigod dedan ay sibabasolak,
olay sin daanak pay laeng maianak.
6 Laydem ay din nemnem ko et naimposoan ya tet-ewa,
isonga idawat mo din kinasirib ay mapo en sik-a.
7 Dalosam sak-en ta makaan basol ko,
ta kamanak mankikilat ay dalalo.
8 Ipadngem koma en sak-en di pamakawan mo
ta say maragsaragsakanak ay kosto,
tan kamanak namekmek sin dosa ay inkeddeng mo.
9 Baken koma din basol ko di pag mon isisin-eng,
mo adi et linisam komas sak-en.
10 Baro ay nemnem di idawat mo koma,
ay nadalos, baken natapian si lawa,
ta say ipapasnek ko ay mansilbi en sik-a.
11 Adi ka koma omipakaan sin kad-am,
ya adim aben ipalobos ay tomaynan
din Ispiritom ay Nasantoan.
12 Ipataolim kasin din palalo ay ragsak ko
begew sin panangisalakan mo.
Idawat mo koma kasin din layad ko
ay manongpal sin bilbilin mo.
13 Asiak itdoan din managbasol ay gagait ko
ta tongpalen da abe din bilbilin mo.
Dokogan da di lawa ay am-amagen da
et pag dan mantaoli en sik-a.
14-15 Pangaasim kod adi ay Diyos ta omisalakan ka
sin basol ko ay namseak si ib-a*Di esa abe ay kaiologan nina sin Hebreo et: Pangaasim kod adi ay Diyos ta omisalakan ka, ta say adi da gan-gandaten di biyag kos na.
ta say mabalin ay idaydayaw kos sik-a.
Asiak ipaammo din kinalinteg mo
dowan kon ikankanta din dayaw mo.
16 Sigaam ay Diyos din datdaton ay mapooan,
tan mo laydem koma, en nika idatonan.
Ngem adi ka met baw interesado
isnan mapalti ay idaton ko.
17 Din mabalin anggoy ay idaton ko
et din mangibabawiak sin basol ko
ya din napakombaba ay nemnem ko,
tan siya baw dana di daton ay panlaydam, Apo.
18 Et sapay koma ta ipailam seg-ang mo
ed Zion ono Jerusalem ay siyodad mo.
Bangonem kasin san nakayang ay alad na
ta way salaknib na sin kaibaw na.
19 Et mo siya di, awni et malaydan kan to
sin kosto ay maidaton sin altar mo.
Tan bomaro ay baka di iali min to
ay say mapooan isnan altar mo.
*51:14-15 Di esa abe ay kaiologan nina sin Hebreo et: Pangaasim kod adi ay Diyos ta omisalakan ka, ta say adi da gan-gandaten di biyag kos na.